Zǝbur 92

92-küy •••• Mǝdⱨiyǝ

1Xabat küni üqün bir nahxa-küy: —

Pǝrwǝrdigarƣa tǝxǝkkür eytix,

Namingni küylǝx ǝladur, i Ⱨǝmmidin Aliy Bolƣuqi! 1

2Ɵzgǝrmǝs muⱨǝbbitingni sǝⱨǝrdǝ,

Jakarlax ⱨǝⱪiⱪǝt-sadaⱪitingni tünlǝrdǝ,

3On tarliⱪ saz wǝ rawabni qelip,

Qiltar bilǝn mungluⱪ aⱨangda qelix ǝladur!

4Qünki Sǝn Pǝrwǝrdigar, Ɵz ⱪilƣining arⱪiliⱪ meni hursǝn ⱪilding,

Ⱪolliringning ⱪilƣanliri bilǝn mǝn roⱨlinip nahxa eytimǝn.

5Pǝrwǝrdigar, ⱪilƣan ixliring nemidegǝn uluƣdur!

Oyliring naⱨayiti qongⱪurdur!

6Biƣǝm kixi buni bilmǝs,

Ⱨamaⱪǝt buni qüxǝnmǝs, 2

7Rǝzillǝr ot-qɵptǝk ayniƣanda,

Ⱪǝbiⱨlik ⱪilƣuqilarning ⱨǝmmisi güllǝngǝn bilǝn,

Mǝnggü ⱨalak bolup ketidiƣanlar xulardur!3

8Lekin Sǝn, i Pǝrwǝrdigar, ǝbǝdil’ǝbǝd üstün turisǝn.

9Qünki mana düxmǝnliring, i Pǝrwǝrdigar,

Mana düxmǝnliring yoⱪilidu;

Barliⱪ ⱪǝbiⱨlik ⱪilƣuqilar tiripirǝn ⱪiliwetilidu!

10Münggüzümni yawayi buⱪiningkidǝk kɵtürisǝn;

Beximƣa yengi may sürkilip, mǝsiⱨ ⱪilinidu.

11Meni ⱪǝst ⱪilƣanlarning mǝƣlubiyitini ɵz kɵzum kɵridu;

Manga ⱪarxilixixⱪa ⱪozƣalƣan rǝzillik ⱪilƣuqilarning tǝn bǝrgǝnlikinimu ⱪuliⱪim anglaydu.

12Ⱨǝⱪⱪaniy adǝm horma dǝrihi kǝbi güllǝp-yaxnaydu;

U Liwandiki kedr dǝrihidǝk ɵsidu. 4

13Pǝrwǝrdigarning ɵyigǝ tikilgǝnlǝr,

Hudayimizning ⱨoylilirida güllinidu;

14Ular ⱪeriƣandimu yǝnǝ mewǝ beridu,

Suluⱪ ⱨǝm yexil bolar;

15Xuning bilǝn ular Pǝrwǝrdigar durustur, dǝp ispatlaydu;

U mening ⱪoram teximdur,

Uningda naⱨǝⱪsizlik yoⱪtur!