Muⱪeddes Kalam (yǝngi yeziⱪ)
Zǝbur 84
84-küy •••• Pǝrwǝrdigarning ⱨuzurini seƣinix
Nǝƣmiqilǝrning bexiƣa tapxurulup, «Gittif»ta qelinsun dǝp, Koraⱨning oƣulliri üqün yezilƣan küy: —
Makanliring nǝⱪǝdǝr ǝzizdur,
Samawi ⱪoxunlarning Sǝrdari bolƣan Pǝrwǝrdigar! 1
Jenim Pǝrwǝrdigarning ⱨoyliliriƣa tǝxna bolup,
Seƣinip ⱨǝtta ⱨalidin ketar,
Dilim wǝ ǝtlirim ⱨayat Tǝngrigǝ tǝlmürüp nida ⱪilar; 2
Mana, ⱪuqⱪaqmu tapⱪan mubarǝk bir makanni,
Ⱪarliƣaqmu ɵzigǝ ⱨǝm bala tuƣidiƣan uwa yasaydiƣan jayni tapⱪan,
— Yǝni Sening ⱪurbangaⱨliringdin,
I samawi ⱪoxunlarning Sǝrdari bolƣan Pǝrwǝrdigar,
— Mening Padixaⱨim, mening Hudayim!
Nǝⱪǝdǝr bǝhtliktur Sening ɵyüngdǝ turuwatⱪanlar !
Toxtimastin Seni mǝdⱨiyilǝydu.
Selaⱨ.
Küq-ⱪudriti Sǝndin bolƣan kixi bǝhtliktur —
Ⱪǝlbidǝ kɵtürülmǝ yollar bolƣanlar; 3
Yiƣa wadisidin ɵtkǝndǝ,
Ular uni bulaⱪliⱪⱪa aylandurar;
Bǝrⱨǝⱪ, küz yamƣurliri uni bǝrikǝtlǝrgǝ toldurar. 4
Ular küqigǝ-küq ulap mengiwerǝr;
Ⱨǝrbiri Zionƣa yetip kelip, Hudaning ⱨuzurida ⱨazir bolar.
I samawiy ⱪoxunlarning Sǝrdari bolƣan Pǝrwǝrdigar, duayimni angliƣaysǝn;
I Yaⱪupning Hudasi, ⱪulaⱪ salƣaysǝn!
Selaⱨ.
Ⱪara, i ⱪalⱪinimiz bolƣan Huda,
Ɵzüng mǝsiⱨ ⱪilƣiningning yüzigǝ iltipat bilǝn ⱪariƣin! 5
Qünki Sening ⱨoyliliringda ɵtkǝn bir kün
Baxⱪa yǝrdǝ ɵtkǝn ming kündin ǝladur;
Rǝzillǝrning qedirliridǝ yaxiƣandin kɵrǝ,
Hudayimning ɵyining bosuƣisida turƣinim yahxidur. 6
Pǝrwǝrdigar Huda ⱪuyax wǝ ⱪalⱪandur,
Pǝrwǝrdigar xapaǝt wǝ xan-xɵⱨrǝt bǝhx etidu;
Durus mangƣanlardin U ⱨǝrⱪandaⱪ iltipatni ⱨeq ayimaydu;
Samawiy ⱪoxunlarning Sǝrdari bolƣan Pǝrwǝrdigar,
Bǝhtliktur Sanga tayanƣan insan! 7
Source notes (7)
- Footnote ◼ «Nǝƣmiqilǝrning bexiƣa tapxurulup, «Gittif»ta qelinsun dǝp» — «Gittif»ning mumkinqiliki bar bir mǝnisi: «Gat xǝⱨirining sazi».
- Cross-reference ◘ Zǝb. 42:2; 63:1-2
- Footnote ◼ «...ⱪǝlbidǝ kɵtürülmǝ yollar bolƣanlar» — «kɵtürülmǝ yollar» — kɵtürüp yasalƣan, Yerusalemƣa tawap ⱪilidiƣan yoluqilar mangidiƣan yollar bolsa kerǝk.
- Footnote ◼ «Yiƣa wadisidin ɵtkǝndǝ» — «Yiƣa wadisi» yaki «baka wadisi». Ibraniy tilida «baka» birinqidin «yiƣa»ni bildüridu, ikkinqidin bir hil üjmǝ dǝrihini bildüridu, yǝnǝ «yiƣlaydiƣan dǝrǝh» — kesilgǝn bolsa dǝrǝh süyi yiƣliƣandǝk qiⱪidu. Dawut pǝyƣǝmbǝr ikki ⱪetim bir «Baka wadisi» (yǝni «Rǝfayim jilƣisi»)da ƣǝlibǝ ⱪildi ⱨǝm axu yǝrdǝ uning üq jan-dosti jenini tǝwǝkkül ⱪilip uningƣa su elip kǝldi («2Sam.» 5-, 23-babta). «küz yamƣurliri uni bǝrikǝtlǝrgǝ tolduridu» — Ⱪanaanda (Pǝlǝstindǝ) küz yamƣurliri yǝrni ⱨǝydǝx, ⱨǝm uruⱪ selixⱪa tǝyyar ⱪilidu.
- Footnote ◼ «Ɵzüng mǝsiⱨ ⱪilƣiningning yüzigǝ iltipat bilǝn ⱪariƣin!» — «mǝsiⱨ ⱪilƣini», 2-küydiki izaⱨatlarni, xundaⱪla «Tǝbirlǝr»nimu kɵrüng.
- Footnote ◼ «Hudayimning ɵyining bosuƣisida turƣinim yahxidur» — yǝnǝ birhil tǝrjimisi: «Hudayimning ɵyidǝ ixikbaⱪar bolƣinim yahxidur».
- Cross-reference ◘ Zǝb. 2:12; 34:8
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.