Muⱪeddes Kalam (yǝngi yeziⱪ)
Zǝbur 82
82-küy •••• Hudaning aliy soti
Yuⱨ. 10:22-42
Asaf yazƣan küy: —
Huda Ɵz ilaⱨiy mǝjlisidǝ turup,
U ilaⱨlar ⱨǝkkidǝ ⱨɵküm qiⱪiridu; 1
— Ⱪaqanƣiqǝ silǝr naⱨǝⱪ ⱨɵküm qiⱪirisilǝr,
Ⱪaqanƣiqǝ rǝzillǝrgǝ yüz-hatirǝ ⱪilisilǝr?
Selaⱨ.
Gadaylar wǝ yetim-yesirlarning dǝwasini soranglar,
Ezilgǝnlǝr ⱨǝm ⱨajǝtmǝnlǝrgǝ adalǝtni kɵrsitinglar; 2
Miskinlǝr ⱨǝm namratlarni ⱪutⱪuzunglar,
Ularni rǝzillǝrning qanggilidin azad ⱪilinglar! 3
Nadan wǝ bilimsizdur ularning hǝmmisi,
Yürǝr ular zulmǝt ara,
Tǝwrǝr zeminning ulliri.
Mǝn eytarmǝn: — «Silǝr ilaⱨlarsilǝr,
Ⱨǝmminglar Ⱨǝmmidin Aliy Bolƣuqining oƣulliri silǝr;
Xundaⱪ bolsimu silǝr insanƣa ohxax ɵlisilǝr,
Ⱨǝrⱪandaⱪ ǝmir-bǝgkǝ ohxaxla yiⱪilisilǝr». 4
— Turƣin, i Huda, yǝr-yüzini soraⱪ ⱪilƣaysǝn!
Qünki Sǝn barliⱪ ǝllǝrgǝ waris bolƣuqisǝn! 5 6
Source notes (6)
- Footnote ◼ «Huda Ɵz ilaⱨiy mǝjlisidǝ turup (riyasǝtqilik ⱪilidu), U ilaⱨlar ⱨǝkkidǝ ⱨɵküm qiⱪiridu» — bizningqǝ, bu mǝjliskǝ ⱪatnaxⱪan «ilaⱨlar»ning Hudaning hǝlⱪigǝ sotqi bolƣan yaki Ɵz hǝlⱪi arisida ⱨoⱪuⱪ-mǝs’uliyiti bar adǝmlǝr ikǝnliki tɵwǝndiki ayǝtlǝrdin kɵrülidu. Mǝlum jǝⱨǝtlǝrdin, ular Hudadǝk adǝmlǝr üstidin ⱨɵküm qiⱪiridu; xuning üqün ular bu mǝs’uliyǝtning eƣirliⱪini obdan qüxinixi kerǝk. «U ilaⱨlar ⱨǝkkidǝ ⱨɵküm qiⱪiridu» — baxⱪa xǝrⱨqilǝr bolsa «ilaⱨlar» degǝnni yǝr yüzidiki padixaⱨ-ⱨoⱪuⱪdarlarni kɵrsitidu, dǝp ⱪaraydu. Muzu xǝrⱨqilǝr 6-ayǝttiki «silǝr ilaⱨlar» degǝnni kinayilik sɵz dǝp ⱪaraydu; qünki xu dǝwrdiki padixaⱨlardin kɵp ⱪismi ɵzlirini «Huda» dǝp ⱪaraytti, hǝlⱪidin ɵzigǝ ibadǝt ⱪilixini tǝlǝp ⱪilatti. Lekin Rǝbbimizning «Yuⱨ.» 10:33-36dǝ eytⱪan xǝrⱨi boyiqǝ, bu sɵzlǝr kinayilik sɵz ǝmǝs; xunga yuⱪiriⱪi qüxǝndürüximiz toƣra, dǝp ⱪaraymiz.
- Footnote ◼ «...yetim-yesirlarning dǝwasi» — ibraniy tilida «... atisizlarning dǝwasi».
- Cross-reference ◘ Pǝnd. 24:11
- Footnote ◼ «Xundaⱪ bolsimu silǝr insanƣa ohxax ɵlisilǝr, ⱨǝrⱪandaⱪ ǝmir-bǝgkǝ ohxaxla yiⱪilisilǝr» — 1-ayǝt wǝ uningdiki izaⱨatni kɵrüng. Birinqi jümlining baxⱪa birhil tǝrjimisi: «Xundaⱪ bolsimu silǝr Adǝmgǝ (demǝk, Adǝmatimizƣa) ohxax ɵlisilǝr».
- Footnote ◼ «Sǝn barliⱪ ǝllǝrgǝ waris ⱪilisǝn» — bu sɵz bǝlkim Mǝsiⱨkǝ eytilixi mumkin.
- Cross-reference ◘ Zǝb. 2:8; Ibr. 1:2
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.