Muⱪeddes Kalam (yǝngi yeziⱪ)
Zǝbur 80
80-küy •••• Huda yolida yurtning güllinixi üqün dua •••• 1-ayǝttiki izaⱨatni kɵrüng
«Nilupǝrlǝr» degǝn aⱨangda; bir guwaⱨliⱪ; Asaf yazƣan küy: —
Ⱪulaⱪ salƣaysǝn, i Israilning padiqisi,
Yüsüpni ⱪoy padisidǝk beⱪip yetǝkligüqi;
I kerublar otturisida Olturƣuqi,
Nurlanƣaysǝn! 1
Əfraim, Binyamin, Manassǝⱨlǝrning aldida ⱪudritingni ⱪozƣiƣaysǝn,
Bizlǝrni ⱪutⱪuzƣili kǝlgǝysǝn!
I Huda, bizni Ɵz yeningƣa ⱪayturƣaysǝn!
Jamalingning nurini qaqⱪaysǝn, xunda biz ⱪutⱪuzulimiz! 2
I Pǝrwǝrdigar, samawiy ⱪoxunlarning Sǝrdari bolƣan Huda,
Hǝlⱪingning dualiriƣa bolƣan ƣǝziping ⱪaqanƣiqǝ yalⱪunlap turidu?
Sǝn kɵz yaxlirini ularƣa nan ornida ⱪilding,
Kɵz yaxlirini ⱪaqa-ⱪaqilap ularƣa iqküzdung.
Bizni ⱪoxnilirimizƣa talaxⱪa ⱪoydung;
Bizni mǝshiridǝ düxmǝnlǝrning aƣzida. 3 4
I samawiy ⱪoxunlarning Sǝrdari bolƣan Huda,
Bizni Ɵz yeningƣa ⱪayturƣaysǝn!
Jamalingning nurini qaqⱪaysǝn, xunda biz ⱪutⱪuzulimiz!
Sǝn Misirdin bir tüp üzüm kɵqitini elip kǝlding;
Yat ǝllǝrni ⱨǝydiwetip, orniƣa uni tikting. 5
Yǝr tǝyyarliding u kɵchǝtkǝ,
Qongⱪur yiltiz tartip kǝng yeyildi u zeminƣa.
Sayǝ taxlidi dǝxti-taƣlarƣa;
Ƣolliri küqlük kedir dǝrǝhliridǝk; 6
U xahlirini dengizƣiqǝ,
Pilǝkliridin Əfrat dǝryasimu ⱪurup ⱪalmidi.
Neqün buzisǝn ⱪaxalirini,
Ⱨǝdiyǝ ⱪilisǝn yoluqilarƣa mewisini?
Ormandiki yawa tongguzlar uni ⱨarap ⱪilmaqta,
Daladiki ⱨaywanatlar ozuⱪ ⱪilmakta.
I samawiy ⱪoxunlarning Sǝrdari bolƣan Huda, ɵtünimiz Sǝndin,
Yenimizƣa ⱪaytⱪaysǝn!
Ərxtin ⱨalimizƣa nǝzǝr salƣaysǝn,
Kelip bu üzüm telidin hǝwǝr alƣaysǝn! 7
Yǝni ong ⱪolung tikkǝn bu yiltizdin,
Ɵzüng üqün mǝzmut yetixtürgǝn bu oƣlungdin hǝwǝr alƣaysǝn!
Mana u otta kɵydürüldi,
Kesiwetildi;
Yüzüngdiki tǝnbiⱨiy ⱪarixingni kɵrüp ular ⱨalak bolmaⱪta;
Ⱪolungni ong ⱪolungdiki adǝmgǝ,
Yǝni Ɵzüng üqün mǝzmut yetixtürgǝn Insan Oƣliƣa ⱪondurƣaysǝn; 8 9
Xundaⱪ ⱪilƣanda biz Sǝndin ⱨǝrgiz qekinmǝymiz;
Bizni yengiliƣaysǝn, xunda biz namingni qaⱪirip Sanga iltija ⱪilimiz.
I Pǝrwǝrdigar, samawiy ⱪoxunlarning Sǝrdari bolƣan Huda,
Bizni Ɵz yeningƣa ⱪayturƣaysǝn!
Jamalingning nurini qaqⱪaysǝn, xunda biz ⱪutⱪuzulimiz!
Source notes (9)
- Footnote ◼ «Ⱪulaⱪ salƣaysǝn, i Israilning padiqisi, Yüsüpni ⱪoy padisidǝk beⱪip yetǝkligüqi; i kerublar otturisida Olturƣuqi, nurlanƣaysǝn!» — bu küy bǝlkim Israilning jǝnubiy tǝripidǝ (jǝnubiy padixaⱨliⱪida, yǝni «Yǝⱨuda»da) miladiyǝdin ilgiriki 734-722 yillarda yezilƣan; xu waⱪitlarda Asuriyǝ imperiyǝsi Israil ximaliy padixaⱨliⱪiƣa bɵsüp kirip, bulangqiliⱪ ⱪilip, ularning kɵp adǝmlirini ǝsirgǝ aldi. Jǝnubiy padixaⱨliⱪtiki bir ⱪisim kixilǝr ǝpsuslinip, ximalidiki ⱪerindixliri üqün dua ⱪilidu. «kerublar otturisida Olturƣuqi» — Hudaning muⱪǝddǝs ibadǝthanisidiki «ǝng muⱪǝddǝs jay»da ǝⱨdǝ sanduⱪining ikki yenida altundin yasalƣan birdin «kerub», yǝni küqlük pǝrixtining seymasi turidu. Huda ǝslidǝ Ɵz ⱨuzurining bu ikki kerub otturisida boluxiƣa wǝdǝ ⱪilƣan.
- Cross-reference ◘ Zǝb. 4:6; 31:16; 67:1-2; Dan. 9:17
- Footnote ◼ «Bizni ⱪoxnilirimizƣa talaxⱪa ⱪoydung» — bǝzi kona kɵqürmilǝrdǝ: — «Sǝn bizni ⱪoxnimizƣa mazaⱪ obyekti ⱪilding» degǝn sɵzlǝr tepilidu.
- Cross-reference ◘ Zǝb. 44:13-14; 79:4
- Cross-reference ◘ Yǝx. 5; Yǝr. 2:21; Əz. 15; 17:3-10; Yuⱨ. 15:1
- Footnote ◼ «küchlük kedir dǝrǝhliridǝk..» — yaki «Tǝngrining kedir dǝrǝhliridǝk...».
- Footnote ◼ «... Kelip bu üzüm telidin hǝwǝr alƣaysǝn» — ibraniy tilida: — «...bu üzüm telini yoⱪliƣaysǝn» degǝn bilǝn ipadilinidu.
- Footnote ◼ «ong ⱪolungdiki adǝm... yǝni Ɵzüng üqün mǝzmut yetixtürgǝn Insan oƣli..» — «ong ⱪolungdiki adǝm», «Ɵzüng üqün mǝzmut yetixtürgǝn Insan Oƣli» xübⱨisizki Mǝsiⱨ toƣruluⱪ aldin’ala eytilƣan bexarǝtlik sɵz.
- Cross-reference ◘ Zǝb. 110:1; Dan. 7:13, 14; Mat. 16:27; Ibr. 1:3; 8:1; 10:12; 12:1; 1Pet. 3:22
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.