Muⱪeddes Kalam (yǝngi yeziⱪ)
Zǝbur 72
72-küy •••• Tǝhtkǝ olturidiƣan padixaⱨning oƣli toƣruluⱪ dua-tilǝwǝt ⱨǝm bexarǝt •••• 1-ayǝttiki izaⱨatni kɵrüng
Sulayman üqün: —
I Huda, padixaⱨⱪa ⱨɵkümliringni tapxurƣaysǝn;
Padixaⱨning oƣliƣa Ɵz ⱨǝⱪⱪaniyliⱪingni bǝrgǝysǝn. 1
Xundaⱪ bolƣanda u Ɵz hǝlⱪing üqün ⱨǝⱪⱪaniyliⱪ bilǝn,
Sanga tǝwǝ ezilgǝn mɵminlǝr üqün adilliⱪ bilǝn ⱨɵküm qiⱪiridu;
Taƣlar hǝlⱪⱪǝ tinq-amanliⱪ elip kelidu,
Edirliⱪlarmu ⱨǝⱪⱪaniyliⱪ bilǝn xundaⱪ ⱪilidu.
Padixaⱨ hǝlⱪ arisidiki ezilgǝnlǝrgǝ adil ⱨɵkümlǝrni qiⱪiridu;
U namratlarning balilirini ⱪutⱪuzidu,
Zalimlarni bitqit ⱪilidu.
Xundaⱪ bolƣanda kün wǝ ay yoⱪ bolup kǝtmisila,
Əwladtin-ǝwladⱪa hǝlⱪ Sǝndin ǝyminidu. 2 3
U bolsa goya yengidin orƣan otlaⱪⱪa yaƣⱪan yamƣurdǝk,
Yǝr suƣiridiƣan ⱨɵl-yeƣinlardǝk qüxidu. 4
Uning künliridǝ ⱨǝⱪⱪaniylar ronaⱪ tapidu;
Ay yoⱪ bolƣuqǝ tinq-amanliⱪ texip turidu.
U dengizdin-dengizlarƣiqǝ,
Əfrat dǝryasidin yǝr yüzining qǝtlirigiqǝ ⱨɵküm süridu. 5
Qɵl-bayawanda yaxawatⱪanlar uning aldida bax ⱪoyidu;
Uning düxmǝnliri topilarni yalaydu.
Tarxixning wǝ arallarning padixaⱨliri uningƣa ⱨǝdiyǝlǝr tǝⱪdim ⱪilidu,
Xeba wǝ Sebaning padixaⱨlirimu sowƣatlar sunidu. 6
Dǝrwǝⱪǝ, barliⱪ padixaⱨlar uning aldida sǝjdǝ ⱪilidu;
Pütkül ǝllǝr uning hizmitidǝ bolidu;
Qünki u pǝryad kɵtürgǝn yoⱪsullarni,
Panaⱨsiz ezilgǝnlǝrni ⱪutulduridu; 7
U yoⱪsul-ajizlarƣa iqini aƣritidu,
Yoⱪsullarning jenini ⱪutⱪuzidu;
Ularning jenini zulum-zomigǝrliktin ⱨɵrlükkǝ qiⱪiridu,
Ularning ⱪeni uning nǝziridǝ ⱪimmǝtliktur.
Padixaⱨ yaxisun!
Xebaning altunliridin uningƣa sunulidu;
Uning üqün dua tohtawsiz ⱪilinidu;
Uningƣa kün boyi bǝht tilinidu;
Yǝr yüzidiki ⱨosul mol bolidu,
Ⱨǝtta taƣ qoⱪⱪiliridimu xundaⱪ bolidu.
Miƣ-miƣ qüxkǝn mewilǝr Liwandiki ormanlardǝk tǝwrinidu;
Xǝⱨǝrdikilǝr bolsa daladiki ot-yexilliⱪtǝk güllinidu;
Uning nami mǝnggügǝ ɵqmǝydu,
Uning nami ⱪuyax yoⱪalƣuqǝ turidu;
Adǝmlǝr uning bilǝn ɵzlirigǝ bǝht tilǝydu,
Barliⱪ ǝllǝr uni bǝhtlik dǝp atixidu.
Israilning Hudasi, Pǝrwǝrdigar Hudaƣa tǝxǝkkür-mǝdⱨiyǝ bolƣay!
Karamǝt ixlarni Yaratⱪuqi yalƣuz Udur!
Uning xǝrǝplik namiƣa mǝnggügǝ tǝxǝkkür-mǝdⱨiyǝ oⱪulƣay!
Uning xan-xɵⱨriti pütkül dunyani ⱪapliƣay! Amin! Wǝ amin! 8
Yǝssǝning oƣli Dawutning dualiri xuning bilǝn tamam boldi. 9
Source notes (9)
- Footnote ◼ «I Huda, padixaⱨⱪa ⱨɵkümliringni tapxurƣaysǝn; padixaⱨning oƣliƣa Ɵz ⱨǝⱪⱪaniyliⱪingni bǝrgǝysǝn» — xübⱨisizki, bu uluƣ bexarǝtning toluⱪ mǝnisi Sulaymanning ɵzini ǝmǝs, bǝlki uning ǝwladi bolƣan Mǝsiⱨni kɵrsitidu. «Sulayman üqün» — baxⱪa birhil tǝrjimisi «Sulaymanningki» yaki «Sulaymanƣa tǝwǝ».
- Footnote ◼ «Sǝndin ǝyminidu» — demǝk, Hudadin ǝyminidu. «Kün wǝ ay yoⱪ bolup kǝtmisila, ǝwladtin-ǝwladⱪa hǝlⱪ Sǝndin ǝyminidu» — baxⱪa birhil tǝrjimisi (LXX) «Kün wǝ ay yoⱪ bolup kǝtmisila u (padixaⱨ) turidu, künliri ǝwladtin-ǝwladⱪa uzartilidu».
- Cross-reference ◘ Zǝb. 89:36,37
- Cross-reference ◘ 2Sam. 23:4
- Footnote ◼ «Əfrat dǝryasi» — ibraniy tilida pǝⱪǝt «Dǝrya» deyilidu. Xübⱨisi yoⱪki, bu ibarǝ Əfrat dǝryasini kɵrsitidu.
- Footnote ◼ «Tarxix.. arallar... Xeba...Seba...» — «Tarxix»ning dǝl ⱪaysi jay ikǝnliki ⱨazir eniⱪ ǝmǝs, Ispaniyǝ, ximaliy Afriⱪa yaki Əngliyǝni bildürüxi mumkin. Lekin xübⱨǝ yoⱪki, muxu ayǝttiki «Tarxix» ⱨǝm «arallar» dengizdiki ǝng qǝt yǝrlǝrni bildüridu. «Xeba ⱨǝm Seba» — ⱨazirⱪi Ərǝbistanda.
- Cross-reference ◘ Ayup 29:12
- Cross-reference ◘ Qɵl. 14:21; Yǝx. 6:3, 11:9; Ⱨab. 2:14
- Footnote ◼ «Dawutning dualiri xuning bilǝn tamam boldi» — bu küy Dawut pǝyƣǝmbǝrning ǝng ahirⱪi duasi boldi. Biraⱪ «Zǝbur»ning keyinki bɵlümliridǝ biz uning baxⱪa dua-küylirini uqritimiz.
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.