Muⱪeddes Kalam (yǝngi yeziⱪ)
Zǝbur 66
66-küy •••• Ibadǝtkǝ türtkǝ bolidiƣan guwaⱨliⱪ
Nǝƣmiqilǝrning bexiƣa tapxurulup, tarliⱪ sazlar bilǝn oⱪulsun dǝp, küy-nahxa: —
Pütkül jaⱨan, huxalliⱪ bilǝn Hudaƣa tǝntǝnǝ ⱪilinglar!
Uning namining uluƣluⱪini nahxa ⱪilip jakarlanglar,
Uning mǝdⱨiyilirini xǝrǝplǝndürünglar!
Hudaƣa: «Sening ⱪilƣanliring nǝⱪǝdǝr ⱪorⱪunqluⱪtur!
Ⱪudriting zor bolƣaq,
Düxmǝnliring aldingda zǝiplixip tǝslim bolidu;
Barliⱪ yǝr yüzidikilǝr Sanga sǝjdǝ ⱪilip,
Seni küylǝp, nahxa eytixidu;
Ular namingni küylǝp nahxa ⱪilip eytidu» — dǝnglar!
Selaⱨ!
Kelinglar, Hudaning ⱪilƣanlirini kɵrünglar;
Insan baliliri aldida ⱪilƣan karamǝtliri ⱪorⱪunqluⱪtur.
U dengizni ⱪuruⱪluⱪⱪa aylandurdi;
Əjdadlirimiz dǝryadinmu piyadǝ ɵtti;
Biz u yǝrdǝ uningdin hursǝn bolduⱪ. 1
U ⱪudriti bilǝn mǝnggü ⱨɵküm süridu;
Uning kɵzliri ǝllǝrni kɵzitip turidu;
Asiyliⱪ ⱪilƣuqilar mǝƣrurlanmisun!
Selaⱨ! 2
I ⱪowmlar, Hudayimizƣa tǝxǝkkür-mǝdⱨiyǝ eytinglar;
Uningƣa bolƣan mǝdⱨiyǝ-ⱨǝmdusanalarni yangritinglar!
U jenimizni ⱨayatliⱪ iqigǝ tikkǝn,
Putlirimizni teyilip ketixkǝ yol ⱪoymaydu.
Qünki Sǝn, i Huda, bizni siniding;
Kümüxni otta tawliƣandǝk bizni tawliding.
Sǝn bizni torƣa qüxürdung;
Belimizgǝ eƣir yükni yükliding.
Hǝⱪlǝrni beximizƣa mindürdüng;
Biz ot wǝ kǝlkünni besip ɵttuⱪ;
Sǝn ahir bizni kǝngriqilikkǝ qiⱪarding.
Mǝn kɵydürmǝ ⱪurbanliⱪlarni elip ɵyünggǝ kirǝy;
Sanga ⱪilƣan ⱪǝsǝmlirimgǝ ǝmǝl ⱪilimǝn;
Bǝrⱨǝⱪ, beximƣa kün qüxkǝndǝ lǝwlirim qiⱪarƣan,
Eƣizim eytⱪan wǝdilirimni ǝmǝlgǝ axurimǝn.
Mǝn Sanga bordaⱪ mallarni kɵydürmǝ ⱪurbanliⱪ ⱪilip sunimǝn,
Ⱪoqⱪarlarning hux puraⱪ yeƣini kɵydürimǝn;
Ɵküz wǝ ɵqkilǝrni ǝkilip sunimǝn.
Selaⱨ!
Hudadin ǝymingüqi ⱨǝmminglar, kelinglar, ⱪulaⱪ selinglar!
Uning mǝn üqün ⱪilƣan karamǝtlirini bayan ⱪilimǝn;
Aƣzim eqip uningƣa pǝryad kɵtürdüm,
Uning uluƣluⱪini jakarliƣan mǝdⱨiyilǝr tilimda boldi.
Kɵnglümdǝ gunaⱨni kɵzlǝp yürgǝn bolsam,
Rǝb duayimni anglimiƣan bolatti.
Biraⱪ Huda anglidi;
U duayimƣa ⱪulaⱪ saldi.
Hudaƣa tǝxǝkkür-mǝdⱨiyilǝr yaƣdurulƣay!
U mening duayimni yandurmidi,
Ⱨǝm mǝndin ɵzgǝrmǝs muⱨǝbbitini elip kǝtmidi!
Source notes (2)
- Cross-reference ◘ Mis. 14:21-31; Yǝ. 3:14
- Cross-reference ◘ 2Tar. 16:9; Ayup 28:24; Zǝb. 33:13-14
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.