Muⱪeddes Kalam (yǝngi yeziⱪ)
Zǝbur 45
45-küy •••• Padixaⱨning toy munajiti •••• 1-ayǝttiki izaⱨatni kɵrüng
Nǝƣmiqilǝrning bexiƣa tapxurulup, «Nilupǝrlǝr» degǝn aⱨangda oⱪulsun dǝp, Koraⱨning oƣulliriƣa tapxurulƣan, «sɵyümlük yar üqün» degǝn «Masⱪil» munajat-nahxa: —
Ⱪǝlbimdin güzǝl ix toƣrisida sɵzlǝr urƣup qiⱪmaⱪta;
Padixaⱨⱪa beƣixliƣan munajitimni eytimǝn;
Tilim goya maⱨir xairning ⱪǝlimidur; 1
Insan baliliri iqidǝ sǝn ǝng güzǝldursǝn;
Lǝwliring xapaǝt bilǝn toldurulƣandur;
Xunga Huda sanga mǝnggügǝ rǝⱨmǝt ⱪildi.
I büyük bolƣuqi,
Ⱪiliqingni asⱪin yeningƣa,
Ⱨǝywiting wǝ xanu-xǝwkiting bilǝn!
Ⱨǝⱪiⱪǝt, kǝmtǝrlik ⱨǝm adalǝtni alƣa sürüxkǝ atlanƣiningda,
Xanu-xǝwkǝt iqidǝ ƣǝlibǝ bilǝn alƣa bas!
Xuning bilǝn ong ⱪolung ɵzünggǝ karamǝt ⱪorⱪunqluⱪ ixlarni kɵrsitidu! 2
Sening oⱪliring ɵtkürdur,
Ular padixaⱨning düxmǝnlirining yürikigǝ sanjilidu;
Pütün ǝllǝr ayiƣingƣa yiⱪitilidu.
Sening tǝhting, i Huda, ǝbǝdil’ǝbǝdliktur;
Padixaⱨliⱪingdiki Xaⱨanǝ ⱨasang, adalǝtning ⱨasisidur. 3 4
Sǝn ⱨǝⱪⱪaniyliⱪni sɵyüp, rǝzillikkǝ nǝprǝtlinip kǝlgǝnsǝn;
Xunga Huda, yǝni sening Hudaying, seni ⱨǝmraⱨliringdin üstün ⱪilip xadliⱪ meyi bilǝn mǝsiⱨ ⱪildi. 5 6
Sening kiyimliringdin murmǝkki, muǝttǝr wǝ darqin ⱨidi kelidu;
Pil qixi sarayliridiki sazǝndilǝrning tarliⱪ sazliri seni hursǝn ⱪilidu. 7
Padixaⱨlarning mǝlikiliri ⱨɵrmǝtlik kenizǝkliringning ⱪatarididur;
Hanixing Ofirdiki sap altun zibu-zinǝtlǝrni taⱪap ong ⱪolungda turidu; 8
«Angliƣin, i ⱪizim, kɵrgin, sɵzlirimgǝ ⱪulaⱪ salƣin;
Ɵz ⱪǝbilǝng wǝ ata jǝmǝtingni untup ⱪal!
Xuning bilǝn padixaⱨ güzǝl jamalingƣa mǝptun bolidu;
U sening hojang, sǝn uningƣa sǝjdǝ ⱪil».
Tur xǝⱨirining ⱪizi aldingda sowƣa bilǝn ⱨazir bolidu;
Halayiⱪ arisidiki baylar sening xapaitingni kütidu; 9 10
Xaⱨanǝ ⱪizning iqki dunyasi pütünlǝy parlaⱪtur,
Uning kiyimlirimu zǝr bilǝn kǝxtilǝngǝn; 11
U kǝxtilik kiyimlǝr bilǝn padixaⱨning ⱨuzuriƣa kǝltürülidu;
Kǝynidin uningƣa ⱪoldax kenizǝklǝrmu billǝ yeningƣa elip kelinidu; 12
Ular huxal-huram, xadliⱪ iqidǝ baxlap kelinidu;
Ular birliktǝ padixaⱨning ordisiƣa kirixidu.
«Ata-bowiliringning orniƣa oƣulliring qiⱪidu;
Sǝn ularni pütkül jaⱨanƣa ⱨakim ⱪilisǝn. 13
Mǝn sening namingni ǝwladdin-ǝwladⱪa yad ǝtküzimǝn;
Xunglaxⱪa barliⱪ ⱪowmlar seni ǝbǝdil’ǝbǝdgiqǝ mǝdⱨiyilǝydu».
Source notes (13)
- Footnote ◼ «izaⱨat» — gǝrqǝ bu küy Sulaymanning toy künini tǝbriklǝxkǝ yezilƣan bolsimu, uningdiki sɵzlǝr bexarǝt bolup, alǝmning padixaⱨi bolidiƣan Mǝsiⱨnimu aldin’ala kɵrsitidu. «padixaⱨⱪa beƣixliƣan munajitimni eytimǝn» — ibraniy tilida «padixaⱨⱪa beƣixliƣan ǝsirimni eytimǝn».
- Cross-reference ◘ Zǝk. 9:9
- Footnote ◼ «Sening tǝhting, i Huda, ǝbǝdil’ǝbǝdliktur» — Injildiki «ibraniylarƣa» degǝn ⱪisimda (1-babta) kɵrsǝtkǝndǝk, bu sɵzlǝr (xundaⱪla keyinki 7-ayǝtkiqǝ) bexarǝtlik süpǝttǝ padixaⱨning ɵzigǝ (yǝni Mǝsiⱨkǝ) eytilidu («Ibr.» 1:8-9).
- Cross-reference ◘ Ibr. 1:8
- Footnote ◼ «Xunga Huda ... seni ... xadliⱪ meyi bilǝn mǝsiⱨ ⱪildi» — «mǝsiⱨ ⱪilix» toƣruluⱪ 2-küydiki izaⱨatlarni ⱨǝm «Tǝbirlǝr»ni kɵrüng.
- Cross-reference ◘ Yǝx. 61:1-2; Ros. 10:38
- Cross-reference ◘ Yǝx. 61:1-2; Ros. 10:38
- Footnote ◼ «ⱨɵrmǝtlik kenizǝkliringning ⱪatarididur» — yaki «mɵⱨtǝrrǝm meⱨmanliringning ⱪatarididur».
- Footnote ◼ «Tur xǝⱨirining ⱪizi» — Tur xǝⱨiridiki puⱪralarni kɵrsitixi mumkin.
- Cross-reference ◘ Zǝb. 72:10-11
- Footnote ◼ «Xaⱨanǝ ⱪizning iqki dunyasi pütünlǝy parlaⱪtur» — baxⱪa birhil tǝrjimisi: «Padixaⱨning ⱪizi iqki ⱨujrida xǝrǝpliktur».
- Footnote ◼ «Kǝynidin uningƣa ⱪoldax kenizǝklǝrmu billǝ yeningƣa elip kelinidu» — «yeningƣa» toy ⱪiliwatⱪan padixaⱨning yenini kɵrsǝtsǝ kerǝk.
- Footnote ◼ «Ata-bowiliringning orniƣa oƣulliring qiⱪidu; sǝn ularni pütkül jaⱨanƣa ⱨakim ⱪilisǝn...» — bu sɵzlǝr (16- ⱨǝm 17-ayǝt) padixaⱨⱪa biwasitǝ eytilidu.
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.