Muⱪeddes Kalam (yǝngi yeziⱪ)
Zǝbur 40
40-küy •••• Bexarǝt — Dawutning ǝwladi bolƣan Ⱪutⱪuzƣuqi-Mǝsiⱨ, Dawut arⱪiliⱪ kelidu
Dawut yazƣan küy: —
Pǝrwǝrdigarƣa tǝlmürüp, küttüm, küttüm;
U manga egilip pǝryadimni anglidi.
U meni ⱨalakǝt orikidin,
Xundaⱪla patⱪaⱪ laydin tartiwaldi,
Putlirimni uyultax üstigǝ turƣuzup,
Ⱪǝdǝmlirimni mustǝⱨkǝm ⱪildi. 1
U aƣzimƣa yengi nahxa-munajatni,
Yǝni Hudayimizni mǝdⱨiyilǝxlǝrni saldi;
Nurƣun hǝlⱪ buni kɵrüp, ⱪorⱪidu,
Ⱨǝm Pǝrwǝrdigarƣa tayinidu.
Tǝkǝbburlardin yardǝm izdimǝydiƣan,
Yalƣanqiliⱪⱪa ezip kǝtmǝydiƣan,
Bǝlki Pǝrwǝrdigarni ɵz tayanqisi ⱪilƣan kixi bǝhtliktur!
I Pǝrwǝrdigar Hudayim,
Sening biz üqün ⱪilƣan karamǝtliring wǝ oy-niyǝtliringni barƣanseri kɵpǝytip, san-sanaⱪsiz ⱪilƣansǝn,
Kimmu ularni bir-birlǝp ⱨesablap Ɵzünggǝ rǝⱨmǝt ⱪayturup bolalisun!
Ularni sɵzlǝp baxtin-ahir bayan ⱪilay desǝm,
Ularni sanap tügitix mumkin ǝmǝs. 2
Nǝ ⱪurbanliⱪ, nǝ axliⱪ ⱨǝdiyǝliri Sening tǝlǝp-arzuyung ǝmǝs,
Biraⱪ Sǝn manga sǝzgür ⱪulaⱪlarni ata ⱪilding;
Nǝ kɵydürmǝ ⱪurbanliⱪ, nǝ gunaⱨ ⱪurbanliⱪini tǝlǝp ⱪilmiding; 3 4
Xunga jawab bǝrdimki —
«Mana mǝn kǝldim!» — dedim.
Oram yazma dǝsturda mǝn toƣruluⱪ pütülgǝn: — 5
«Hudayim, Sening kɵnglüngdiki iradǝng mening hursǝnlikimdur;
Sening Tǝwrat ⱪanunung ⱪǝlbimgǝ pütüklüktur». 6
Büyük jamaǝt arisida turup mǝn ⱨǝⱪⱪaniyliⱪni jakarlidim;
Mana bularni ɵzümdǝ ⱪilqǝ elip ⱪalƣum yoⱪtur,
I Pǝrwǝrdigar, Ɵzüng bilisǝn. 7
Ⱨǝⱪⱪaniyliⱪingni ⱪǝlbimdǝ yoxurup yürmidim;
Wapadarliⱪingni wǝ nijatliⱪingni jakarlidim;
Ɵzgǝrmǝs muⱨǝbbiting wǝ ⱨǝⱪiⱪitingni büyük jamaǝtkǝ ⱨeq yoxurmastin bayan ⱪildim.
I Pǝrwǝrdigar, meⱨribanliⱪliringni mǝndin ayimiƣaysǝn;
Ɵzgǝrmǝs muⱨǝbbiting wǝ ⱨǝⱪiⱪiting ⱨǝrdaim meni saⱪliƣay!
Qünki sansiz külpǝtlǝr meni oriwaldi;
Ⱪǝbiⱨliklirim meni besiwelip, kɵrǝlmǝydiƣan boldum;
Ular beximdiki qeqimdin kɵp,
Jasaritim tügixip kǝtti.
Meni ⱪutⱪuzuxni toƣra tapⱪaysǝn, i Pǝrwǝrdigar!
I Pǝrwǝrdigar, tez kelip, manga yardǝm ⱪilƣaysǝn!
Mening ⱨayatimƣa qang salmaⱪqi bolƣanlar biraⱪla yǝrgǝ ⱪaritilip rǝswa ⱪilinsun;
Mening ziyinimdin hursǝn bolƣanlar kǝynigǝ yandurulup xǝrmǝndǝ bolƣay. 8
Meni: — «Waⱨ! Waⱨ!» dǝp mǝshirǝ ⱪilƣanlar ɵz xǝrmǝndilikidin alaⱪzadǝ bolup kǝtsun!
Biraⱪ Seni izdigüqilǝrning ⱨǝmmisi Sǝndǝ xadlinip huxal bolƣay!
Nijatliⱪingni sɵygǝnlǝr ⱨǝmixǝ: «Pǝrwǝrdigar uluƣlansun» deyixkǝy!
Mǝn ezilgǝn ⱨǝm yoⱪsul bolsammu,
Biraⱪ Rǝb yǝnila meni yad etidu;
Sǝn mening Yardǝmqim, mening azad ⱪilƣuqim;
I Hudayim, keqikmǝy kǝlgǝysǝn!
Source notes (8)
- Footnote ◼ «ⱨalakǝt oriki» — ibraniy tilida: «xawⱪunlaxlarning oriki».
- Footnote ◼ «Kimmu ularni bir-birlǝp ⱨesablap Ɵzünggǝ rǝⱨmǝt ⱪayturup bolalisun!» — baxⱪa birhil tǝrjimisi: «Kimmu Sanga tǝngdax bolup seni tosalisun?!».
- Footnote ◼ «...Sǝn manga sǝzgür ⱪulaⱪlarni ata ⱪilding» — baxⱪa birhil tǝrjimisi boluxi mumkin: «sǝn mening ⱪulaⱪlirimni sanjiding». Musa pǝyƣǝmbǝr arⱪiliⱪ qüxürülgǝn muⱪǝddǝs ⱪanun boyiqǝ, bir ⱪulning ɵz hojayiniƣa mǝnggü hizmǝttǝ bolƣusi bolsa, buni bǝlgilǝx üqün hojayin uning ⱪuliⱪiƣa bigiz sanjiydu («Mis.» 21-babni kɵrüng). Bu hil tǝrjimǝ toƣra bolsa, bu Mǝsiⱨning Hudaƣa mǝnggülük sadiⱪliⱪini bildüridiƣan sɵzdur. «Nǝ ⱪurbanliⱪ, nǝ axliⱪ ⱨǝdiyǝliri... nǝ kɵydürmǝ ⱪurbanliⱪ, nǝ gunaⱨ ⱪurbanliⱪini tǝlǝp ⱪilmiding» — «Law.» 1-7-babta tǝlǝp ⱪilinƣan bǝx hil asasiy ⱪurbanliⱪlarning ⱨǝmmisi muxu 6-ayǝttǝ tilƣa elinidu.
- Cross-reference ◘ Law. 2:1; 3:1; 4:13; Ibr. 10:5-12
- Footnote ◼ «Oram yazma dǝsturda mǝn toƣruluⱪ pütülgǝn» — «oram yazma dǝstur» Musa pǝyƣǝmbǝrgǝ qüxürülgǝn muⱪǝddǝs ⱪanunni kɵrsitidu.
- Cross-reference ◘ Zǝb. 37:31; Yǝx. 51:7
- Cross-reference ◘ Zǝb. 35:18; 111:1
- Cross-reference ◘ Zǝb. 35:4,26; 70:2; 71:13
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.