Muⱪeddes Kalam (yǝngi yeziⱪ)
Zǝbur 137
137-küy •••• Babilda sürgün boluxning dǝrd-ǝlimi
Babildiki dǝrya-eriⱪlar boyida biz olturduⱪ;
Zionni ǝsliginimizdǝ, bǝrⱨǝⱪ yiƣa kɵtürduⱪ;
Qiltarimizni arisidiki sɵgǝtlǝrgǝ esip ⱪoyduⱪ.
Qünki bizni sürgün ⱪilƣanlar bizdin nahxa tǝlǝp ⱪildi;
Bizni zarlatⱪuqilar bizdin tamaxa tǝlǝp ⱪilip: —
«Ⱨǝy, Zion nahxiliridin birni bizgǝ eytⱪina» — deyixti. 1
Yaⱪa yurtta turup Pǝrwǝrdigarning nahxisini ⱪandaⱪmu eytayli?
Əy Yerusalem, mǝn seni untusam,
Ong ⱪolum maⱨaritini untusun! 2
Seni ǝslimisǝm,
— Yerusalemni ǝng qong hursǝnlikimdin ǝwzǝl kɵrmisǝm —
Tilim tanglayimƣa qaplixip ⱪalsun!
I Pǝrwǝrdigar, Edom baliliridin ⱨesab alƣanda, Yerusalemning bexiƣa qüxkǝn künini yadingƣa kǝltürgǝysǝn;
Qünki ular: «Uni yǝr bilǝn yǝksan ⱪilinglar,
Uliƣiqǝ yǝr bilǝn yǝksan ⱪilinglar!» deyixti. 3
I bulinix aldida turƣan Babil ⱪizi,
Bizgǝ ⱪilƣan ⱪilmixliringni ɵzünggǝ ⱪayturƣuqi bǝhtliktur! 4
Bowaⱪliringni elip taxⱪa atⱪuqi kixi bǝhtliktur!
Source notes (4)
- Cross-reference ◘ Zǝb. 79:1
- Footnote ◼ «Ong ⱪolum maⱨaritini untusun!» — yaki «Ong ⱪolumni untuƣan bolsam!».
- Cross-reference ◘ Yǝr. 49:7; Əz. 25:12
- Cross-reference ◘ Yǝr. 50:15,29; Wǝⱨ. 18:6
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.