Muⱪeddes Kalam (yǝngi yeziⱪ)
Zǝbur 135
135-küy •••• Hudaning ⱪilƣan uluƣ ǝmǝlliri üqün ibadǝt
Ⱨǝmdusana! Pǝrwǝrdigarning namini mǝdⱨiyilǝnglar,
Uni mǝdⱨiyilǝnglar, Pǝrwǝrdigarning ⱪulliri!
Uni mǝdⱨiyilǝnglar, Pǝrwǝrdigarning ɵyidǝ turƣanlar,
Hudayimizning ⱨoylilirida turƣanlar!
Yaⱨni mǝdⱨiyilǝnglar, qünki Pǝrwǝrdigar meⱨribandur;
Uning namiƣa küy eytinglar;
Qünki muxundaⱪ ⱪilix xerindur;
Qünki Yaⱨ Yaⱪupni Ɵziningki boluxⱪa,
Israilni Ɵz mirasi boluxⱪa talliwaldi. 1
Qünki ɵzüm bilimǝnki, Pǝrwǝrdigar uluƣdur;
Rǝbbimiz barliⱪ ilaⱨlardin üstündur. 2
Pǝrwǝrdigar nemǝ ixni muwapiⱪ kɵrgǝn bolsa,
U asmanlarda,
Zeminda,
Dengizlarda ⱨǝm uning barliⱪ tǝgliridimu xuni ⱪilƣandur.
U yǝr qǝtliridin bulut-tumanlarni ɵrlitidu;
Yamƣurlarƣa qaⱪmaⱪlarni ⱨǝmraⱨ ⱪilidu;
Xamalni Ɵz hǝziniliridin qiⱪiridu. 3
U Misirdiki tunji oƣullarni ⱨalak ⱪildi,
Insanlarning bolsun, ⱨaywanlarning bolsun ⱨǝmmini urup ⱨalak ⱪildi. 4
U alamǝtlǝrni, mɵjizilǝrni aranglarƣa ǝwǝtti, i Misir;
Pirǝwn wǝ uning ⱨǝmmǝ ⱪulliri üstigǝ ǝwǝtti. 5
U uluƣ ǝllǝrni uruwǝtti,
Ⱪudrǝtlik padixaⱨlarni ɵltürüwǝtti; 6
Amoriylarning padixaⱨi Siⱨonni,
Baxanning padixaⱨi Ogni,
Ⱪanaandiki barliⱪ padixaⱨliⱪlarni uruwǝtti.
Ularning zeminini miras ⱪilip,
Ɵz hǝlⱪi Israilƣa miras boluxⱪa tǝⱪdim ⱪildi. 7
Sening naming, Pǝrwǝrdigar, mǝnggügǝ,
Xɵⱨrǝt-hatirǝng dǝwrdin-dǝwrgiqidur. 8
Qünki Pǝrwǝrdigar Ɵz hǝlⱪining dǝwasini soraydu;
Ɵz ⱪulliriƣa rǝⱨim ⱪilidu. 9
Əllǝrning butliri bolsa pǝⱪǝtla kümüx-altundin ibarǝttur,
Ularni insanning ⱪolliri yasiƣandur, halas. 10
Ularning aƣzi bar, biraⱪ sɵzlimǝydu;
Kɵzliri bar, biraⱪ kɵrmǝydu;
Ⱪulaⱪliri bar, biraⱪ anglimaydu,
Aƣzida ⱨeq nǝpǝs yoⱪtur.
Ularni yasiƣanlar ularƣa ohxap ⱪalidu,
Ularƣa tayanƣanlarmu xundaⱪtur.
Israil jǝmǝti, Pǝrwǝrdigarƣa tǝxǝkkür-mǝdⱨiyǝ ⱪayturunglar;
Ⱨarun jǝmǝti, Pǝrwǝrdigarƣa tǝxǝkkür-mǝdⱨiyǝ ⱪayturunglar;
Lawiy jǝmǝti, Pǝrwǝrdigarƣa tǝxǝkkür-mǝdⱨiyǝ ⱪayturunglar;
Pǝrwǝrdigardin ⱪorⱪidiƣanlar, Pǝrwǝrdigarƣa tǝxǝkkür-mǝdⱨiyǝ ⱪayturunglar!
Yerusalemda makanlaxⱪan Pǝrwǝrdigarƣa Ziondin tǝxǝkkür-mǝdⱨiyǝ eytilƣay!
Ⱨǝmdusana!
Source notes (10)
- Cross-reference ◘ Mis. 19:5; Ⱪan. 7:6; Tit. 2:14; 1Pet. 2:9
- Footnote ◼ «Pǝrwǝrdigar... barliⱪ ilaⱨlardin üstündur» — bu ayǝt «ilaⱨlar»ning ⱨǝⱪiⱪiy mǝwjut ikǝnlikini etirap ⱪilmaydu, ǝlwǝttǝ. 95:3 wǝ izaⱨatini kɵrüng.
- Cross-reference ◘ Yǝr. 10:13; 51:16
- Cross-reference ◘ Mis. 12:12,29; Zǝb. 78:51
- Cross-reference ◘ Mis. 7,8,9,10,14
- Cross-reference ◘ Yǝ. 12
- Cross-reference ◘ Zǝb. 78:55
- Cross-reference ◘ Mis. 3:15, Zǝb. 102:12
- Cross-reference ◘ Ⱪan. 32:36, Zǝb. 90:13
- Cross-reference ◘ Zǝb. 115:4
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.