Muⱪeddes Kalam (yǝngi yeziⱪ)

Zǝbur 12

12-küy •••• Rǝzil dunyadin saⱪlax

Nǝƣmiqilǝrning bexiƣa tapxurulup, xeminit bilǝn oⱪulsun dǝp, Dawut yazƣan küy: —

Ⱪutⱪuzƣaysǝn, Pǝrwǝrdigar, qünki ihlasmǝn adǝm tügǝp kǝtti;

Adǝmlǝr arisidin sadiⱪ mɵminlǝr ƣayip boldi. 1

Ⱨǝrbirsi ɵz yeⱪinliriƣa yalƣan eytidu;

Huxamǝtqi lǝwlǝrdǝ, alikɵngüllük bilǝn sɵzlixidu.

Pǝrwǝrdigar barliⱪ huxamǝtqi lǝwlǝrni,

Ⱨakawurlarqǝ sɵzlǝydiƣan tilni kesiwǝtkǝy!

Ular: «Tilimiz bilǝn ƣǝlibǝ ⱪilimiz;

Lǝwlirimiz bolsa ɵzimizningkidur;

Kim bizgǝ Rǝb bolalisun?» — dǝydu.

«Ezilgüqi ajizlarni basⱪan zulum wǝjidin,

Miskinlǝrning aⱨuzarliri wǝjidin,

Ⱨazirla ornumdin turay» — dǝydu Pǝrwǝrdigar,

«Mǝn ularƣa, ular zariⱪip kütkǝn azadliⱪni yǝtküzimǝn». 2

Pǝrwǝrdigarning sɵzliri bolsa sap sɵzlǝrdur;

Ular yǝttǝ ⱪetim saplaxturulƣan,

Sapal ⱪazanda tawlanƣan kümüxtǝktur. 3

Sǝn Pǝrwǝrdigar, ularni saⱪlaysǝn;

Sǝn mɵminlǝrni muxu dǝwrdin mǝnggügǝ ⱪoƣdaysǝn; 4

Qünki rǝzil adǝmlǝr ⱨǝryanda ƣadiyip yürüxidu,

Pǝskǝxlik insan baliliri arisida aliyjanabliⱪ dǝp mahtalmaⱪta!

Source notes (4)

Footnote ◼ «xeminit bilǝn oⱪulsun dǝp...» — «xeminit» bǝlkim, «sǝkkiz tarliⱪ saz» yaki «sǝkkiz notiliⱪ küy» degǝn mǝnidǝ.
Footnote ◼ «Mǝn ularƣa, ular zariⱪip kütkǝn azadliⱪni yǝtküzimǝn» — baxⱪa birhil tǝrjimisi: «Ularni «tüfi!» dǝp mazaⱪ ⱪilƣuqilardin azad ⱪilimǝn»
Cross-reference ◘ 2Sam. 22:31; Zǝb. 18:30; 19:8; 119:140; Pǝnd. 30:5
Footnote ◼ «Sǝn Pǝrwǝrdigar, ularni saⱪlaysǝn» — «ular» 5-ayǝttǝ tilƣa elinƣan «ezilgǝnlǝr» wǝ «miskinlǝr»ni kɵrsitidu.

Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.