Muⱪeddes Kalam (yǝngi yeziⱪ)
Zǝbur 108
108-küy •••• Hudaning ƣǝlibisigǝ bolƣan tǝxna-tilawǝt
Dawutning küy-nahxisi: —
Iradǝm qing, i Huda, iradǝm qing;
Mǝn mǝdⱨiyǝ nahxilirini eytip,
Bǝrⱨǝⱪ, Seni küylǝymǝn, pütün roⱨim bilǝn! 1
I nǝƣmǝ-sazlirim, oyƣan!
Mǝn sǝⱨǝr ⱪuyaxinimu oyƣitimǝn!
Hǝlⱪ-millǝtlǝr arisida Seni uluƣlaymǝn, i Pǝrwǝrdigar;
Əllǝr arisida Seni küylǝymǝn!
Qünki ɵzgǝrmǝs muⱨǝbbiting ǝrxlǝrgǝ yǝtküdǝk uluƣdur;
Ⱨǝⱪiⱪiting bulutlarƣa taⱪaxti. 2
I Huda, xan-xɵⱨriting ǝrxlǝrdin yuⱪiri uluƣlanƣay,
Xan-xǝriping yǝr yüzini ⱪapliƣay!
Ɵz sɵygǝnliringning nijatliⱪ tepixi üqün,
Ong ⱪolung bilǝn ⱪutⱪuzƣaysǝn,
Duayimni ijabǝt ⱪilƣaysǝn.
Huda Ɵz pak-muⱪǝddǝslikidǝ xundaⱪ degǝn: —
«Mǝn tǝntǝnǝ ⱪilimǝn,
Mǝn Xǝkǝm diyarini bɵlüp berimǝn,
Sukkot wadisini tǝⱪsim ⱪilixⱪa ɵlqǝymǝn.
Gilead Manga mǝnsuptur,
Manassǝⱨmu Manga mǝnsuptur;
Əfraim bolsa beximdiki dubulƣamdur,
Yǝⱨuda Mening ǝmr-pǝrman qiⱪarƣuqimdur; 3
Moab Mening yuyunux jawurumdur;
Edomƣa qoruƣumni taxlaymǝn;
Mǝn Filistiyǝ üstidin tǝntǝnǝ ⱪilimǝn!». 4
Kim Meni bu mustǝⱨkǝm xǝⱨǝrgǝ baxlap kirǝlisun?
Kim Meni Edomƣa elip baralisun?
I Huda, Sǝn bizni rasttinla qǝtkǝ ⱪaⱪtingmu?
Ⱪoxunlirimiz bilǝn billǝ jǝnggǝ qiⱪmamsǝn? 5
Bizni zulumlardin ⱪutuluxⱪa yardǝmlǝxkǝysǝn,
Qünki insanning yardimi bikardur!
Huda arⱪiliⱪ biz qoⱪum baturluⱪ kɵrsitimiz;
Bizgǝ zulum ⱪilƣuqilarni qǝyligüqi dǝl U Ɵzidur!
Source notes (5)
- Footnote ◼ «Dawutning küy-nahxisi: —....» — oⱪurmǝnlǝr kɵrǝlǝyduki, bu küyning ayǝtliri 57-küydiki 7-11-ayǝtlǝr, 60-küydiki 5-12-ayǝtlǝrgǝ ohxap ketidu. Xunga bu ayǝtlǝrning izaⱨatliri muxu küygimu tǝwǝ, ǝlwǝttǝ. «... Seni küylǝymǝn, pütün roⱨim bilǝn!» — «roⱨim» muxu yǝrdǝ ibraniy tilidiki «mening xǝripim»ning tǝrjimisi.
- Cross-reference ◘ Zǝb. 36:5; 57:10
- Footnote ◼ «Əfraim bolsa beximdiki dubulƣamdur» — ibraniy tilida «Əfraim bolsa beximdiki ⱪoƣdiƣuqidur». «Yǝⱨuda Mening ǝmr-pǝrman qiⱪarƣuqimdur» — baxⱪa birhil tǝrjimisi «Yǝⱨuda Mening xaⱨanǝ ⱨasa mdur».
- Footnote ◼ «Moab Mening yuyunux jawurum» — bǝlkim Moabning Huda wǝ Uning hǝlⱪi üqün mǝynǝt hizmǝt ⱪilidiƣanliⱪini bildüridu. «Edomƣa qoruⱪumni taxlaymǝn» — ayaƣ kiyimni mǝlum yǝr üstigǝ taxlax axu yǝrgǝ igǝ bolƣanliⱪni bildürüxi mumkin; yaki bolmisa, Edomning ɵz Igisining ayaƣlirini elip yiƣixturidiƣan ⱪuldǝk ikǝnlikini kɵrsitiximu mumkin. «Filistiyǝ, Mening sǝwǝbimdin tǝntǝnǝ ⱪilinglar!» — Dawut padixaⱨning dǝwridǝ Filistiyǝ Dawutⱪa, xundaⱪla Hudaning ɵzigǝ boysunup, bǝhtlik ⱨayatⱪa igǝ bolƣan («2Sam.» 8:1ni, xundaⱪa «Yar.» 12:1-3nimy kɵrüng).
- Cross-reference ◘ Zǝb. 60:1-3
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.