Pǝnd-nǝsiⱨǝtlǝr 10

Padixaⱨ Sulaymanning ⱨekmǝtlik sɵzliri

1Padixaⱨ Sulaymanning pǝnd-nǝsiⱨǝtliri: —

Dana oƣul atisini xad ⱪilar;

Əⱪilsiz oƣul anisini ⱪayƣu-ⱨǝsrǝtkǝ salar. 1

2Ⱨaram bayliⱪlarning ⱨeq paydisi bolmas;

Ⱨǝⱪⱪaniyǝt insanni ɵlümdin ⱪutuldurar. 2

3Pǝrwǝrdigar ⱨǝⱪⱪaniy adǝmning jenini aq ⱪoymas;

Lekin u ⱪǝbiⱨlǝrning nǝpsini boƣup ⱪoyar.

4Ⱨurunluⱪ kixini gaday ⱪilar;

Ixqanliⱪ bolsa bayaxat ⱪilar. 3 4

5Yazda ⱨosulni yiƣiwalƣuqi — dana oƣuldur;

Lekin orma waⱪtida uhlap yatⱪuqi — hijalǝtkǝ ⱪalduridiƣan oƣuldur.

6Bǝrikǝt ⱨǝⱪⱪaniy adǝmning bexiƣa qüxǝr;

Əmma zorawanliⱪ yamanlarning aƣziƣa urar. 5

7Ⱨǝⱪⱪaniy adǝmning yadikari mubarǝktur;

Yamanlarning nami bolsa, sesiⱪ ⱪalar.

8Dana adǝm yolyoruⱪ-nǝsiⱨǝtlǝrni ⱪobul ⱪilar;

Kot-kot, nadan kixi ɵz ayiƣi bilǝn putlixar. 6

9Ƣubarsiz yürgǝn kixining yürüx-turuxi turaⱪliⱪtur,

Yollirini ǝgri ⱪilƣanning kiri ahiri axkarilinidu.

10Kɵz ixaritini ⱪilip yüridiƣanlar adǝmni daƣda ⱪaldurar;

Kot-kot, nadan kixi ɵz ayiƣi bilǝn putlixar.

11Ⱨǝⱪⱪaniy adǝmning aƣzi ⱨayatliⱪ buliⱪidur,

Əmma zorawanliⱪ yamanning aƣziƣa urar. 7 8

12Ɵqmǝnlik jedǝl ⱪozƣar;

Meⱨir-muⱨǝbbǝt ⱨǝmmǝ gunaⱨlarni yapar. 9

13Əⱪil-idraklik adǝmning aƣzidin danaliⱪ tepilar;

Əⱪilsizning dümbisigǝ palaⱪ tegǝr. 10

14Dana adǝmlǝr bilimlǝrni ziyadǝ toplar;

Lekin ǝhmǝⱪning aƣzi uni ⱨalakǝtkǝ yeⱪinlaxturar.

15Mal-dunyaliri goya mǝzmut xǝⱨǝrdǝk bayning kapalitidur;

Miskinni ⱨalak ⱪilidiƣan ix dǝl uning namratliⱪidur.

16Ⱨǝⱪⱪaniylarning ǝjirliri janƣa jan ⱪoxar,

Ⱪǝbiⱨlǝrning ⱨosuli gunaⱨnila kɵpǝytixtur. 11

17Nǝsiⱨǝtni anglap uni saⱪliƣuqi ⱨayatliⱪ yoliƣa mangar;

Tǝnbiⱨlǝrni rǝt ⱪilƣan kixi yoldin azƣanlardur.

18Adawǝt saⱪliƣan kixi yalƣan sɵzlimǝy ⱪalmas;

Tɵⱨmǝt qapliƣanlar ǝhmǝⱪtur. 12

19Gǝp kɵp bolup kǝtsǝ, gunaⱨtin haliy bolmas,

Lekin aƣziƣa igǝ bolƣan ǝⱪilliⱪtur.

20Ⱨǝⱪⱪaniy adǝmning sɵzi huddi sap kümüx;

Yamanning oyliri tolimu ǝrzimǝstur. 13

21Ⱨǝⱪⱪaniy adǝmning sɵzliri nurƣun kixini ⱪuwwǝtlǝr;

Əhmǝⱪlǝr ǝⱪli kǝmlikidin ɵlǝr.

22Pǝrwǝrdigarning ata ⱪilƣan bǝrikiti adǝmni dɵlǝtmǝn ⱪilar;

U bǝrikitigǝ ⱨeqbir japa-muxǝⱪⱪǝt ⱪoxmas. 14

23Əhmǝⱪ ⱪǝbiⱨlikni tamaxa dǝp bilǝr;

Əmma danaliⱪ yorutulƣan kixining hursǝnlikidur. 15 16

24Yaman kixi nemidin ⱪorⱪsa xuningƣa uqrar;

Ⱨǝⱪⱪaniy adǝmning arzusi ǝmǝlgǝ axurular.

25Yaman adǝm ⱪuyundǝk ɵtüp yoⱪar;

Lekin ⱨǝⱪⱪaniy adǝm mǝnggülük uldǝktur.

26Adǝm aqqiⱪ su yutuwalƣandǝk,

Kɵzigǝ is-tütǝk kirip kǝtkǝndǝk,

Ⱨurun adǝmni ixⱪa ǝwǝtkǝnmu xundaⱪ bolar. 17

27Pǝrwǝrdigardin ǝyminix ɵmürni uzun ⱪilar,

Yamanning ɵmri ⱪisⱪartilar. 18

28Ⱨǝⱪⱪaniy adǝmning ümidi hursǝnlik elip kelǝr;

Lekin rǝzilning kütkini yoⱪⱪa qiⱪar. 19

29Pǝrwǝrdigarning yoli durus yaxawatⱪanlarƣa baxpanaⱨdur;

Ⱪǝbiⱨlik ⱪilƣuqilarƣa bolsa ⱨalakǝttur. 20

30Ⱨǝⱪⱪaniylarning orni mustǝⱨkǝmdur;

Yamanlar zeminda uzun turmas.

31Ⱨǝⱪⱪaniy adǝmning aƣzidin danaliⱪ qiⱪar;

Lekin xumluⱪ til kesip taxlinar.

32Ⱨǝⱪⱪaniy adǝmning sɵzi kixigǝ mok huxyaⱪar;

Yaman adǝmning aƣzidin xumluⱪ qiⱪar.