Muⱪeddes Kalam (yǝngi yeziⱪ)

Mikaⱨ 2

Jǝbir-zulum üstigǝ qüxidiƣan jaza

Ornida yetip ⱪǝbiⱨlikni oylaydiƣanlarƣa wǝ yamanliⱪ ǝyligüqilǝrgǝ way!

Pǝⱪǝt ularning ⱪolidin kǝlsila, ular tang etixi bilǝnla uni ada ⱪilidu;

Ularning aqkɵz kɵzi etizlarƣa qüxsila, ular zorawanliⱪ ⱪilip buliwalidu;

Ɵylǝrgimu ⱪiziⱪipla ⱪalsa, bularnimu elip ketidu;

Ular batur kixinimu jǝmǝti bilǝn bulaydu,

Adǝmni ɵz mirasliri bilǝn ⱪoxup qanggiliƣa kirgüzüwalidu. 1 2

Xunga Pǝrwǝrdigar mundaⱪ dǝydu: —

Mana, Mǝn bu ailigǝ ⱪarap, boyunliringlardin qiⱪiralmaydiƣan yaman bir boyuntururⱪni oylap tǝyyarliwatimǝn;

Silǝr ǝmdi gidiyip mangmaysilǝr;

Qünki xu künlǝr yaman künlǝr bolidu. 3

Xu küni ular silǝr toƣranglarda tǝmsilni tilƣa elip,

Eqinixliⱪ bir zar bilǝn zarlaydu: —

«Biz pütünlǝy bulang-talang ⱪilinduⱪ!;

U hǝlⱪimning nesiwisini baxⱪilarƣa bɵlüwǝtti;

Uni mǝndin xunqǝ dǝⱨxǝtlik mǝⱨrum ⱪildi!

U etizlirimizni munapiⱪⱪa tǝⱪsim ⱪilip bǝrdi! 4

Xunga Pǝrwǝrdigarning jamaiti arisidin,

Silǝrdǝ qǝk taxlap zemin üstigǝ tana tartip nesiwǝ bɵlgüqidin birsimu ⱪalmaydu. 5

Sahta pǝyƣǝmbǝrlǝrning Hudaning pǝyƣǝmbǝrliridin rǝnjixi

Ular: «bexarǝt bǝrmǝnglar!» — dǝp bexarǝt beridu!

Əgǝr pǝyƣǝmbǝrlǝr bu ixlar toƣruluⱪ bexarǝt bǝrmisǝ, ǝmdi bu ar-nomus bizdin ⱨǝrgiz kǝtmǝydu! 6 7

I Yaⱪup jǝmǝti,

«Pǝrwǝrdigarning Roⱨi sǝwr-taⱪǝtsizmu?

Bu ixlar rast Uning ⱪilƣanlirimu?» — degili bolamdu?

Mening sɵzlirim durus mangƣuqiƣa yahxiliⱪ kǝltürmǝmdu? 8

Biraⱪ tünügünla Mening hǝlⱪim ⱨǝtta düxmǝndǝk ornidin ⱪozƣaldi;

Silǝr hatirjǝmliktǝ yoldin ɵtüp ketiwatⱪanlarning tonini iq kiyimliri bilǝn salduruwalisilǝrki,

Ularni huddi uruxtin ⱪaytⱪanlardǝk kiyimsiz ⱪaldurisilǝr. 9

Hǝlⱪim arisidiki ayallarni ɵzlirining illiⱪ ɵyliridin ⱪoƣlaysilǝr;

Ularning yax balilirini silǝr Mening güzǝl gɵⱨirimdin mǝnggügǝ mǝⱨrum ⱪilisilǝr. 10

Ornunglardin turup neri ketinglar;

Qünki ⱨalakǝtni,

Yǝni azabliⱪ bir ⱨalakǝtni kǝltüridiƣan napakliⱪ tüpǝylidin,

Bu yǝr silǝrgǝ tǝwǝ aramgaⱨ bolmaydu.

Əgǝr biⱨudiliktǝ, yalƣanqiliⱪta yürgǝn birsi yalƣan gǝp ⱪilip: —

«Mǝn xarab wǝ ⱨaraⱪⱪa tayinip silǝrgǝ bexarǝt berimǝn» — desǝ,

Mana, u xu hǝlⱪⱪǝ pǝyƣǝmbǝr bolup ⱪalidu! 11

Hudaning «Israilning ⱪaldisi»ƣa bolƣan wǝdisi

Mǝn qoⱪum seni bir pütün ⱪilip uyuxturimǝn, i Yaⱪup;

Mǝn qoⱪum Israilning ⱪaldisini yiƣimǝn;

Mǝn ularni Bozraⱨdiki ⱪoylardǝk,

Ɵz yayliⱪida yiƣilƣan bir padidǝk jǝm ⱪilimǝn;

Ular adimining kɵplükidin warang-qurungluⱪⱪa tolidu. 12 13

Bir «bɵsüp ɵtküqi» ularning aldiƣa qiⱪip mangidu;

Ular bɵsüp qiⱪip, ⱪowuⱪⱪa yetip berip, uningdin qiⱪti;

Ular bɵsüp qiⱪti,

Yǝni ⱪowuⱪⱪa yetip berip, uningdin qiⱪti;

Ularning Padixaⱨi ularning aldida,

Pǝrwǝrdigar ularning aldiƣa ɵtüp mangidu. 14 15

Source notes (15)

Footnote ◼ «.. batur kixinimu jǝmǝti» — yaki «... batur kixinimu ɵyi».
Cross-reference ◘ Yǝx. 5:8
Cross-reference ◘ Am. 5:13
Footnote ◼ «U (Pǝrwǝrdigar) etizlirimizni munapiⱪⱪa tǝⱪsim ⱪilip bǝrdi!» — «munapiⱪ» bǝlkim ɵz ǝⱨdisidǝ ⱨeq turmaydiƣan Asuriyǝ padixaⱨini kɵrsitidu.
Cross-reference ◘ Ⱪan. 32:8, 9
Footnote ◼ «Ular: «bexarǝt bǝrmǝnglar!» — dǝp bexarǝt beridu! Əgǝr pǝyƣǝmbǝrlǝr bu ixlar toƣruluⱪ bexarǝt bǝrmisǝ, ǝmdi bu ar-nomus bizdin ⱨǝrgiz kǝtmǝydu!» — bu ayǝttǝ «bexarǝt berix» degǝn peilning yǝnǝ bir tǝrjimisi: «xal qeqix» (kinayilik gǝp). Baxⱪa birnǝqqǝ hil tǝrjimiliri; (1) «Bu ixlar toƣruluⱪ bexarǝt bǝrmǝslik kerǝk!» (ular dǝydu) «Əmdi ar-nomus (bizdin) ⱨǝrgiz kǝtmǝydu!» (Mikaⱨ dǝydu); (2) «Dǝrwǝⱪǝ ular (pǝyƣǝmbǝrlǝr) bu ixlar toƣruluⱪ bexarǝt berixkǝ tohtaydu! Əmdi ar-nomus bizdin kǝtmǝydu!».
Cross-reference ◘ Yǝx. 30:10; Am. 7:16
Footnote ◼ «I Yaⱪup jǝmǝti, «Pǝrwǝrdigarning Roⱨi sǝwr-taⱪǝtsizmu? Bu ixlar rast Uning ⱪilƣanlirimu?» — degili bolamdu?» — demǝk, Israil (xübuⱨisizki, sahta pǝyƣǝmbǝrlǝrning tǝlimliri bilǝn): «Huda bizni sɵyidu, biz Hudaning alaⱨidǝ hǝlⱪi, U bizgǝ ⱨǝrgiz yamanliⱪni yǝtküzmǝydu» — dǝweridu. Baxⱪa birhil tǝrjimisi: «I «Yaⱪup jǝmǝti» dǝp atalƣuqi, Pǝrwǝrdigar sǝwr-taⱪǝtsizmu? Bular (bu yaman ixlar) uning ⱪilƣanlirimu?».
Footnote ◼ «... silǝr hatirjǝmliktǝ yoldin ɵtüp ketiwatⱪanlarning tonini iq kiyimliri bilǝn salduruwalisilǝrki, ularni huddi uruxtin ⱪaytⱪanlardǝk kiyimsiz ⱪaldurisilǝr» — baxⱪa birhil tǝrjimisi: «... huddi uruxtin ⱪaytiwatⱪanlardin alƣandǝk silǝr ularning tonini iq kiyimliri bilǝn elip bulisilǝr» (uruxtin ⱪaytⱪanlar bolsa hatirjǝmliktǝ mangidu, ǝlwǝttǝ).
Footnote ◼ «Mening güzǝl gɵⱨirim» — (yaki «Mening zibuzinnitimdin») — bǝlkim Ⱪanaan zeminining ɵzini kɵrsitidu.
Footnote ◼ «Mǝn xarab wǝ ⱨaraⱪⱪa tayinip silǝrgǝ bexarǝt berimǝn...» — baxⱪa birhil tǝrjimisi: «Birsi «xarab ⱨǝm ⱨaraⱪning kɵp bolidiƣanliⱪi toƣrisida bexarǝt berimǝn» desǝ, u muxu hǝlⱪⱪǝ taza muwapiⱪ bir pǝyƣǝmbǝr bolidu».
Footnote ◼ «Ɵz yayliⱪida yiƣilƣan bir padidǝk jǝm ⱪilimǝn; ular adimining kɵplükidin warang-qurungluⱪⱪa tolidu» — bǝzi alimlar «adǝmlǝrning kɵplüki»ni düxmǝnlǝrning kɵplüki, dǝp ⱪaraydu. Biraⱪ bir pada ⱪoylar jǝm ⱪilinƣinida, bǝribir qong «warang-qurung» kɵtürilidu.
Cross-reference ◘ Yǝr. 49:13, 14; Wǝⱨ. 12:6
Footnote ◼ «Bir «bɵsüp ɵtküqi» ularning aldiƣa qiⱪip mangidu; ular bɵsüp qiⱪip, ⱪowuⱪⱪa yetip berip, uningdin qiⱪti; ular bɵsüp qiⱪti, ... ularning padixaⱨi ularning aldida, Pǝrwǝrdigar ularning aldiƣa ɵtüp mangidu» — bu uluƣ bexarǝt Hudaning Yǝⱨudani Asuriyǝ imperiyǝsidin ⱪutⱪuzidiƣanliⱪini kɵrsitidu; bizningqǝ bexarǝt yǝnǝ ikki ⱪetim ǝmǝlgǝ axurulidu. «Ⱪoxumqǝ sɵz»imizdǝ biz u toƣruluⱪ yǝnǝ azraⱪ xǝrⱨlǝymiz.
Cross-reference ◘ Yǝx. 32:4-5; 52:12; Ⱨox. 1:11; Zǝk. 12:8; Mat. 3:5; 11:11-14; Yuⱨ. 10:2-4

Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.