Muⱪeddes Kalam (yǝngi yeziⱪ)

Batur Ⱨakimlar 5

Nusrǝt nǝzmisi

Xu küni Dǝboraⱨ wǝ Abinoamning oƣli Baraⱪ mundaⱪ nǝzmǝ oⱪudi: —

Israilda yetǝkqilǝr yol baxliƣini üqün,

Hǝlⱪ ihtiyarǝn ɵzlirini pida ⱪilƣini üqün,

Pǝrwǝrdigarƣa tǝxǝkkür-mǝdⱨiyǝ oⱪunglar!

Əy padixaⱨlar, anglanglar,

Əy ǝmirlǝr, ⱪulaⱪ selinglar!

Mǝn, mǝn Pǝrwǝrdigarƣa atap nǝzmǝ oⱪuymǝn,

Mǝn Israilning Hudasi Pǝrwǝrdigarƣa küy eytimǝn.

I Pǝrwǝrdigar, sǝn Seirdin qiⱪⱪiningda,

Edomning yayliⱪidin qiⱪip yürüx ⱪilƣiningda,

Yǝr titrǝp, asmanlardin sular tamqidi,

Xundaⱪ, bulutlar yamƣurlirini yaƣdurdi; 1

Taƣlar Pǝrwǝrdigarning aldida tǝwrǝndi,

Ənǝ Sinay teƣimu tǝwrinip kǝtti,

Israilning Hudasi Pǝrwǝrdigarning aldida. 2 3

Anatning oƣli Xamgarning künliridǝ,

Ⱨǝm Yaǝlning künliridǝ,

Qong yollar taxlinip ⱪelip,

Yoluqilar ǝgri-toⱪay qiƣir yollar bilǝn mangatti;

Israilda ǝzimǝtlǝr yoⱪap kǝtti,

Taki mǝnki Dǝboraⱨ ⱪozƣilip,

Israilda bir ana süpitidǝ pǝyda bolƣinimƣiqǝ. 4

Israillar yengi ilaⱨlarni tallidi;

Urux dǝrwaziliriƣa yetip kǝldi.

Ⱪiriⱪ mingqǝ Israilliⱪning arisida,

Ya bir ⱪalⱪan ya bir nǝyzǝ tepilisiqu?! 5

Ⱪǝlbim Israilning ǝmirlirigǝ ⱪayildur,

Ular hǝlⱪ arisida ɵzlirini ihtiyarǝn pida ⱪildi;

Pǝrwǝrdigarƣa tǝxǝkkür-mǝdⱨiyǝ oⱪunglar!

I aⱪ exǝklǝrgǝ mingǝnlǝr,

I nǝpis zilqilǝrning üstidǝ olturƣanlar,

I yolda yürgǝnlǝr, kɵngül bɵlünglar! 6

Su ǝkilidiƣan jaylarda olja bɵlüxüwatⱪanlarning juxⱪun awazilirini anglanglar!

Ular xu yǝrlǝrdǝ Pǝrwǝrdigarning ⱨǝⱪⱪaniy ǝmǝllirini mǝdⱨiyilǝp,

Uning Israildiki ǝzimǝtlirining ⱨǝⱪⱪaniy ǝmǝllirini tǝriplixidu.

Xu waⱪitta Pǝrwǝrdigarning hǝlⱪi qüxüp dǝrwazilarƣa yetip kelip: — 7

«I Dǝboraⱨ, oyƣan, oyƣan!

Oyƣan, oyƣan, ƣǝzǝl eytⱪin!

Ornungdin tur, i Baraⱪ,

Əsirliringni yalap mang, i Abinoamning oƣli!» — deyixidu. 8

Mana hǝlⱪning az bir ⱪaldisi aliyjanablarƣa ǝgixix üqün qüxti,

Pǝrwǝrdigarning hǝlⱪi yenimƣa palwan kǝbi qüxüp kǝldi. 9

Mana, Əfraimlardin Amalǝktǝ yiltiz tartip ⱪalƣanlar kǝldi;

Mana, Binyaminlarmu ⱪowmliringƣa ⱪoxulup ǝgixip kǝldi;

Makirdin ǝmirlǝr qüxüp kǝldi,

Zǝbulundin sǝrdarliⱪ ⱨasisini tutⱪanlar yetip kǝldi. 10

Issakarning ǝmirliri Dǝboraⱨⱪa ⱪoxuldi;

Baraⱪ nemǝ ⱪilƣan bolsa Issakarmu xundaⱪ ⱪilip,

Uning kǝynidin jilƣiƣa tap basturup etilip qüxti!

Rubǝnning ailǝ-jǝmǝtliridikilǝrning arisida xunqǝ uluƣ niyǝtlǝr ⱪǝlblirigǝ pükülgǝnidi! 11

Sǝn nemixⱪa ⱪotanlarning iqidǝ turup,

Ⱪoylarƣa qelinƣan nǝyning awazini anglaxni halap ⱪalding?

Rubǝnning ailǝ-jǝmǝtliridikilǝrning arisida xunqǝ uluƣ niyǝtlǝr ⱪǝlblirigǝ pükülgǝnidi!

Gileadlar bolsa Iordan dǝryasining u tǝripidǝ turup ⱪaldi;

Danlarmu nemixⱪa kemilǝrning yenida tohtap ⱪaldi?

Axirlar bolsa dengiz boyida jim olturuwaldi,

Dengiz ⱪoltuⱪlirida turup ⱪaldi.

Zǝbulunlar janlirini ɵlümgǝ tǝwǝkkül ⱪildi;

Naftalilarmu jǝng mǝydanidiki yuⱪiri jaylarda ⱨǝm xundaⱪ ⱪildi!

Padixaⱨlar ⱨǝmmisi kelip, soⱪuxti,

Ⱪanaaniylarning padixaⱨlirimu uruxⱪa qiⱪti;

Taanaⱪta, Megiddoning su boylirida uruxti.

Lekin bir’azmu kümüx olja alalmidi!

Asmanlarda yultuzlarmu jǝng ⱪildi,

Orbitiliridin Siseraƣa ⱪarxi jǝnggǝ atlandi.

Kixon dǝryasining eⱪini düxmǝnni eⱪitip kǝtti;

Xu ⱪǝdimiy dǝrya, u Kixon dǝryasidur!

Əy mening jenim, pütün küqüng bilǝn alƣa basⱪin! 12

Ularning atlirining tuyaⱪliri takirang-takirang ⱪilmaⱪta,

Tulparliri qapmaⱪta, qapmaⱪta.

Mǝrozƣa lǝnǝt oⱪunglar, dǝydu Pǝrwǝrdigarning Pǝrixtisi,

U yǝrdǝ olturƣuqilarƣa lǝnǝt oⱪunglar,

Ⱪattiⱪ lǝnǝt oⱪunglar;

Qunki ular Pǝrwǝrdigarƣa yardǝmgǝ kǝlmidi,

Zalimlarƣa ⱪarxi Pǝrwǝrdigarƣa yardǝmgǝ kǝlmidi. 13

Ayallar iqidǝ kǝniylik Ⱨǝbǝrning ayali Yaǝl bǝht-bǝrikǝtlǝnsun,

Qedirda turƣan ayallar iqidǝ u bǝht-bǝrikǝt tapsun!

Sisera su soriwidi, u uningƣa süt bǝrdi,

Esilzadilǝrgǝ layiⱪ bir ⱪaqida ⱪaymaⱪ tutti;

U sol ⱪolini qedir ⱪozuⱪiƣa,

Ong ⱪolini tɵmürqining bolⱪisiƣa uzatti;

Siserani urup,

Bax sɵngükini qeⱪip,

Qekisidin yanjip ɵtküzüwǝtti. 14

Sisera uning ikki putining ariliⱪiƣa ⱪiysaydi,

U yiⱪildi, u ɵlüktǝk yatti,

U uning ikki putining ariliⱪiƣa ⱪiysaydi, u yiⱪildi,

Ⱪiysayƣan yǝrdǝ u yiⱪilip, jan bǝrdi.

Siseraning anisi pǝnjiridin sirtⱪa sǝp saldi,

U pǝnjirining rojikidin towlap: —

«Uning jǝng ⱨarwisi nemixⱪa xunqǝ uzaⱪⱪiqǝ kǝlmǝydu?

Jǝng ⱨarwilirining atlirining tuyaⱪ sadasi nemixⱪa xunqǝ ⱨayal bolidu? — dedi.

Uning dedǝkliri arisida danalar jawab beridu,

Xundaⱪla, u dǝrwǝⱪǝ ɵz-ɵzigǝ jawab beridu: —

«Ular oljilirini yiƣip bɵlüxüwatⱪan bolmisun yǝnǝ?!

Ⱨǝrbir ǝrkǝkkǝ ayaƣ asti ⱪilixⱪa bir-ikkidin ⱪiz tǝgkǝndu,

Siseraƣa rǝngdar kiyimlǝr,

Gül kǝxtilǝngǝn rǝngdar kiyimlǝrdin olja tǝgkǝndu,

Bulangqining boyniƣa aldi-kǝyni kǝxtilǝngǝn rǝngdar kiyimlǝr tǝgkǝn bolsa kerǝk! 15

I Pǝrwǝrdigar, Sening barliⱪ düxmǝnliring ǝnǝ xundaⱪ yoⱪitilƣay!

Lekin Seni sɵygǝnlǝr ⱪuyaxning ɵrlǝwatⱪandiki ⱪudritidǝk küqlük bolƣay!».

Xuning bilǝn zemin ⱪiriⱪ yilƣiqǝ tinq-amanliⱪ tapti.

Source notes (15)

Cross-reference ◘ Zǝb. 68:7, 8, 9
Footnote ◼ «... Ənǝ Sinay teƣimu tǝwrinip kǝtti, Israilning Hudasi Pǝrwǝrdigarning aldida» — yaki «yǝni Sinay teƣida ayan bolƣan Hudaning aldida, — Israilning Hudasi Pǝrwǝrdigarning aldida».
Cross-reference ◘ Mis. 19:18; Zǝb. 68:15, 16, 17; 97:5
Footnote ◼ «Israilda ǝzimǝtlǝr yoⱪap kǝtti» — yaki «Israilda kǝnt-ⱪixlaⱪlar yoⱪap kǝtti».
Footnote ◼ «Urux dǝrwaziliriƣa yetip kǝldi» — demǝk, Israil tirik Hudani taxlap butlarni talliwalƣini üqün Hudaning xu jazasi ularning bexiƣa qüxti.
Footnote ◼ «nǝpis zilqilǝrning üstidǝ olturƣanlar» — yaki «toⱪumlarning üstidǝ olturƣanlar». «I aⱪ exǝklǝrgǝ mingǝnlǝr, i nǝpis zilqilǝrning üstidǝ olturƣanlar, i yolda yürgǝnlǝr...» — bu ayǝttǝ puritilƣan mǝnǝ bǝlkim «I, Israilda ⱨazir raⱨǝt künlǝrni kɵrgüqilǝr, silǝr üqün ɵz ⱨayatini tǝwǝkkül ⱪilƣanlarni ǝslǝnglar!» degǝndǝk boluxi mumkin.
Footnote ◼ «Su ǝkilidiƣan jaylarda olja bɵlüxüwatⱪanlar...» — demǝk, nusrǝt ⱪazanƣanliⱪtin ⱨǝtta su ǝkǝlgili qiⱪⱪanlarmu oljidin ɵzara bɵlüxidu. Baxⱪa birhil tǝrjimisi: — «Oⱪyaqilarning ƣowƣasidin ⱪutulƣanlar su alidiƣan jaylarda turup, Pǝrwǝrdigarning ⱨǝⱪⱪaniy ǝmǝllirini mǝdⱨiyilǝp, uning Israildiki ǝzimǝtlirining ⱨǝⱪⱪaniy ǝmǝllirini tǝriplixidu. Xu waⱪitta...».
Footnote ◼ «I Dǝboraⱨ, oyƣan, oyƣan! ... ornungdin tur, i Baraⱪ!...» — 12-ayǝttiki nǝzmǝ hǝlⱪ ⱪeqip qiⱪiwalƣan taƣliⱪtin aman-esǝn qüxüp, ɵz xǝⱨirining dǝrwaziliriƣa kǝlgǝndǝ huxalliⱪidin Dǝboraⱨ wǝ Baraⱪⱪa eytⱪan sɵyünüx sɵzliri bolsa kerǝk.
Footnote ◼ «Mana hǝlⱪning az bir ⱪaldisi aliyjanablarƣa ǝgixix üqün qüxti» — demǝk, Hudaƣa sadiⱪ bolƣan «hǝlⱪ ⱪaldisi» az bolsimu, Baraⱪ wǝ baxⱪa jasarǝtlik ǝzimǝtlǝrgǝ ǝgǝxkǝn. Baxⱪa birhil tǝrjimisi: «Hǝlⱪning az bir ⱪaldisi küqlüklǝrning üstidin ƣalib kǝldi». «Pǝrwǝrdigarning hǝlⱪi yenimƣa palwan kǝbi qüxüp kǝldi» — baxⱪa birhil tǝrjimisi: «Pǝrwǝrdigarning hǝlⱪi zalimlarƣa ⱪarxi qiⱪixⱪa mening yenimƣa qüxti». Bu ayǝtning yǝnǝ birnǝqqǝ hil tǝrjimiliri uqrixi mumkin.
Footnote ◼ «Mana, Əfraimlardin Amalǝktǝ yiltiz tartip ⱪalƣanlar kǝldi» — Əfraim ⱪǝbilisi ǝslidǝ Amalǝklǝrning zeminini igiligǝn wǝ ularni ⱨǝydiwǝtkǝnidi. «Makirdin...» — «Makir» muxu yǝrdǝ Manassǝⱨ ⱪǝbilisigǝ wǝkillik ⱪilidu.
Footnote ◼ «Rubǝnning ailǝ-jǝmǝtliridikilǝrning arisida» — yaki «Rubǝnning eⱪinlirining boyida». «Rubǝnning ailǝ-jǝmǝtliridikilǝrning arisida xunqǝ uluƣ niyǝtlǝr ⱪǝlblirigǝ pükülgǝnidi!» — bu naⱨayiti ⱨǝjwiy, kinayilik gǝp. Rubǝnlǝrdǝ xunqǝ yüksǝk niyǝt bolƣini bilǝn ⱨeqnemǝ ⱪilmidi (16-ayǝtni kɵrüng).
Footnote ◼ «Kixon dǝryasining eⱪini ularni eⱪitip kǝtti» — muxu sɵzlǝr yuⱪiriⱪi «asmanlardiki yultuzlar jǝng ⱪildi» degǝn sɵzlǝrni yorutidu. Yazda Kixon dǝryasi eⱪinida su yoⱪ deyǝrlik bolidu; ⱪixta küqlük aⱪidu. Xunga, xu hulasigǝ kelimizki, ⱨawa rayi ɵzgirip, kɵp yamƣur yaƣⱪaqⱪa, Kixon dǝryasi texip, Siseraning jǝng ⱨarwilirini eⱪitip kǝtti yaki ularni patⱪaⱪⱪa paturup ⱪoydi (4-ayǝttǝ xu ⱪattiⱪ yamƣur tilƣa elinidu).
Footnote ◼ «Zalimlarƣa ⱪarxi Pǝrwǝrdigarƣa yardǝmgǝ kǝlmidi» — yaki «Baturlirini elip, Pǝrwǝrdigarƣa yardǝmgǝ kǝlmidi».
Footnote ◼ « Yaǝl sol ⱪolini qedir ⱪozuⱪiƣa, ... qekisidin yanjip ɵtküzüwǝtti» — bu ayǝtlǝrgǝ ⱪariƣanda Yaǝl Siseraning bexiƣa ⱪaⱪⱪan ⱪozuⱪni bolⱪa bilǝn üq ⱪetim urƣan.
Footnote ◼ «Bulangqining boyniƣa aldi-kǝyni kǝxtilǝngǝn rǝngdar kiyimlǝr tǝgkǝn bolsa kerǝk!» — yaki «Mening boynumƣa ikki aldi-kǝyni kǝxtilǝngǝn kiyimlǝr olja ⱪilip tǝgkǝn bolsa kerǝk!».

Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.