Muⱪeddes Kalam (yǝngi yeziⱪ)
Ⱨoxiya 8
«Ular xamal teriydu, ⱪara ⱪuyunni oridu!»
Kanayni aƣzingƣa salƣin!
Pǝrwǝrdigarning ɵyi üstidǝ bir ⱪorultaz aylinip yüridu!
Qünki ular Mening ǝⱨdǝmni buzƣan,
Tǝwrat-ⱪanunumƣa itaǝtsizlik ⱪilƣan. 1 2
Ular Manga: «I Hudayim, biz Israil hǝlⱪi Seni tonuymiz!» dǝp warⱪiraydu.
Israil yahxiliⱪ-meⱨribanliⱪni taxliwǝtkǝn;
Xunga düxmǝn uni ⱪoƣlaydu. 3
Ular ɵzliri padixaⱨlarni tikligǝn, biraⱪ Mǝn arⱪiliⱪ ǝmǝs;
Ular bǝzilǝrni ǝmir ⱪilƣan, biraⱪ uningdin hǝwirim yoⱪ;
Ular ɵz jeniƣa zamin bolux üqün,
Ɵzlirigǝ butlarni kümüx-altunliridin yasiƣan. 4
I Samariyǝ, sening moziying seni taxliwǝtti!
Mening ƣǝzipim ularƣa ⱪozƣaldi;
Ular ⱪaqanƣiqǝ pakliⱪtin yiraⱪ turidu? 5
Xu nǝrsǝ Israildin qiⱪⱪanƣu —
Uni bir ⱨünǝrwǝn yasiƣan, halas; u Huda ǝmǝs;
Samariyǝning moziyi dǝrwǝⱪǝ parǝ-parǝ qeⱪiwetilidu!
Qünki ular xamal teridi, xunga ⱪara ⱪuyunni oridu!
Ularning xadisida ⱨeq baxaⱪlar yoⱪ, u ⱨeq ax bǝrmǝydu;
Ⱨǝtta ax bǝrgǝn bolsimu, yat adǝmlǝr uni yutuwalƣan bolatti. 6
Israil yutuwelindi;
Ular yat ǝllǝr arisida yarimas bir ⱪaqa bolup ⱪaldi;
Qünki ular yalƣuz yürgǝn yawayi exǝktǝk Asuriyǝni izdǝp qiⱪti;
Əfraim «axna»larni yalliwaldi.
Gǝrqǝ ular ǝllǝr arisidin «yalliwalƣan» bolsimu,
Əmdi Mǝn ularni yiƣip bir tǝrǝp ⱪilimǝn;
Ular tezla «Əmirlǝrning xaⱨi»ning besimi astida tolƣinip ketidu. 7 8
Əfraim «gunaⱨ ⱪurbanliⱪ»liri üqün ⱪurbangaⱨlarni kɵpǝytkini bilǝn,
Bular gunaⱨ ⱪozƣaydiƣan ⱪurbangaⱨlar bolup ⱪaldi. 9
Mǝn uning üqün Tǝwrat-ⱪanunumda kɵp tǝrǝplimǝ nǝrsilǝrni yazƣan bolsammu,
Ular yat bir nǝrsǝ dǝp ⱨesablanmaⱪta.
Ular ⱪurbanliⱪlarƣa amraⱪ! Ular Manga ⱪurbanliⱪlarni ⱪilip, gɵxidin yǝydu,
Biraⱪ Pǝrwǝrdigar bulardin ⱨeq hursǝnlik almaydu;
U ularning ⱪǝbiⱨlikini ⱨazir esigǝ kǝltürüp,
Gunaⱨlirini ɵz bexiƣa qüxüridu;
Ular Misirƣa ⱪaytidu! 10
Qünki Israil ɵz Yasiƣuqisini untup, «ibadǝthana»larni ⱪuridu;
Yǝⱨuda bolsa istiⱨkamlaxturulƣan xǝⱨǝrlǝrni kɵpǝytkǝn;
Biraⱪ Mǝn ularning xǝⱨǝrliri üstigǝ ot ǝwǝtimǝn,
Ot bularning ⱪǝl’ǝ-ordilirini yǝp ketidu. 11
Source notes (11)
- Footnote ◼ «Pǝrwǝrdigarning ɵyi üstidǝ bir ⱪorultaz aylinip yüridu!» — ⱪorultaz pǝⱪǝt ɵlüklǝrgǝ yaki «ɵlǝy dǝp ⱪalƣan» janiwarlarƣa ⱪiziⱪidu, ǝlwǝttǝ (baxⱪa hil tǝrjimiliridǝ «bürküt» deyilidu).
- Cross-reference ◘ Ⱪan. 28:49; Ⱨox. 6:7
- Footnote ◼ «Israil yahxiliⱪ-meⱨribanliⱪni taxliwǝtkǝn» — bu ikki bisliⱪ sɵz; ular ɵzliri yahxiliⱪ ⱪilixtin ⱪol üzgǝn wǝ xuning bilǝn tǝng, Hudaning yahxiliⱪidin mǝⱨrum bolƣan.
- Footnote ◼ «Ular ɵzliri padixaⱨlarni tikligǝn, biraⱪ mǝn arⱪiliⱪ ǝmǝs» — «uningdin hǝwirim yoⱪ» — demǝk, bu ix Manga yat boldi, Mǝn uni etirap ⱪilmidim.
- Footnote ◼ «I Samariyǝ, sening moziying seni taxliwǝtti!» — bu kinayilik gǝp. Israildiki mozay xǝklidiki but ularni ⱪutⱪuzmiƣan. «Baal» wǝ ularning ǝng qong tawapgaⱨi «Bǝyt-Əl»diki butmu «mozay xǝkli»dǝ idi (baxⱪa hil tǝrjilirimu bar).
- Footnote ◼ «Ular xamal teridi, xunga ⱪara ⱪuyunni oridu! Ularning xadisida ⱨeq baxaⱪlar yoⱪ, u ⱨeq ax bǝrmǝydu; ⱨǝtta ax bǝrgǝn bolsimu, yat adǝmlǝr uni yutuwalƣan bolatti» — Israillar ⱨǝrdaim «Baal»din yahxi ⱨosul tilǝtti. Ularning oylixiqǝ «Baal»ning «alaⱨidiliki» «mol ⱨosul berix»mix.
- Footnote ◼ «Ular tezla «ǝmirlǝrning xaⱨi»ning besimi astida tolƣinip ketidu» — «ǝmirlǝrning xaⱨi» Asuriyǝ padixaⱨining mǝhsus bir unwani.
- Cross-reference ◘ Yǝx. 10:8
- Footnote ◼ «Əfraim «gunaⱨ ⱪurbanliⱪ»liri üqün ⱪurbangaⱨlarni kɵpǝytkini bilǝn, bular gunaⱨ ⱪozƣaydiƣan ⱪurbangaⱨlar bolup ⱪaldi» — «gunaⱨ ⱪurbanliⱪi»lar toƣruluⱪ «Law.» 4-5-bablarni kɵrüng. Mǝzkur ⱪurbangaⱨlarni «Pǝrwǝrdigarƣa atap» yasalƣanidi. Əslidǝ Hudaning kɵrsǝtmiliri boyiqǝ Yerusalemdindiki ibadǝthanining ⱪurbangaⱨidin baxⱪa, Israillarning ⱨeqⱪandaⱪ ⱪurbangaⱨni yasimasliⱪi kerǝk. Dǝrwǝⱪǝ, ular yasalƣandin keyin, tezla butpǝrǝs tawapgaⱨlarƣa aylinip ⱪalƣanidi.
- Footnote ◼ «Ular ⱪurbanliⱪlarƣa amraⱪ! Ular Manga ⱪurbanliⱪlarni ⱪilip, gɵxidin yǝydu,...» — bu ayǝtning ⱨǝrhil tǝrjimiliri bolƣini bilǝn, omumiy mǝnisi tǝrjimimizningkidǝk. «Gunaⱨlirini ɵz bexiƣa qüxüridu; ular Misirƣa ⱪaytidu!» — Misir Israillar tunji ⱪetimliⱪ ǝsirlikkǝ yaki ⱪulluⱪⱪa qüxkǝn jay.
- Cross-reference ◘ 2Tar. 26:10, 27:4, Yesh. 22:9-11, 2Pad. 18:12
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.