Muⱪeddes Kalam (yǝngi yeziⱪ)
Ⱨoxiya 6
Israilning yüzǝki jawabi
«Kelinglar, Pǝrwǝrdigarning yeniƣa ⱪaytayli;
Qünki U titma-titma ⱪiliwǝtti, biraⱪ saⱪaytidu;
Uruwǝtti, biraⱪ bizni tengip ⱪoyidu.
U ikki kündin keyin bizni janlanduridu;
Üqinqi küni U bizni tirildüridu,
Biz Uning yüzi aldida ⱨayat yaxaymiz!
Wǝ biz Uni bilidiƣan bolimiz!
Biz Pǝrwǝrdigarni tonux ⱨǝm bilix üqün intilip ⱪoƣlaymiz!
Uning bizni ⱪutⱪuzuxⱪa qiⱪixi tang sǝⱨǝrning boluxidǝk muⱪǝrrǝr;
U yenimizƣa yamƣurdǝk, yǝr-zeminni suƣiridiƣan «keyinki yamƣur»dǝk qüxüp kelidu!». 1
Hudaning dad-pǝryadi
I Əfraim, seni ⱪandaⱪ ⱪilsam bolar?
I Yǝⱨuda, seni ⱪandaⱪ ⱪilsam bolar?
Qünki yahxiliⱪinglar sǝⱨǝrdiki bir parqǝ buluttǝk,
Tezdin yoⱪap ketidiƣan xǝbnǝmdǝktur.
Xunga Mǝn pǝyƣǝmbǝrlǝr arⱪiliⱪ ularni qepiwǝtkǝn;
Aƣzimdiki sɵzlǝr bilǝn ularni ɵltürüwǝtkǝnmǝn;
Mening ⱨɵkümüm tang nuridǝk qiⱪidu. 2
Qünki Mǝn ⱪurbanliⱪlardin ǝmǝs, bǝlki meⱨir-muⱨǝbbǝttin,
Kɵydürmǝ ⱪurbanliⱪlardin kɵrǝ, Hudani tonux ⱨǝm bilixtin hursǝnlik tapimǝn. 3 4
Biraⱪ ular Adǝm’atidǝk ǝⱨdigǝ itaǝtsizlik ⱪilƣan;
Ular mana xu yol bilǝn Manga asiyliⱪ ⱪilƣan. 5
Gilead bolsa ⱪǝbiⱨlik ⱪilƣuqilarning xǝⱨiri;
U ⱪan bilǝn boyalƣan.
Ⱪaraⱪqilar adǝmni payliƣandǝk,
Kaⱨinlar topi Xǝkǝmgǝ baridiƣan yolda ⱪatilliⱪ ⱪilmaⱪta;
Bǝrⱨǝⱪ, ular iplasliⱪ ⱪilmaⱪta.
Israil jǝmǝtidǝ yirginqlik bir ixni kɵrdüm;
Əfraimning paⱨixiliki xu yǝrdǝ tepilidu,
Israil bulƣandi.
Yǝnǝ sangimu, i Yǝⱨuda, teriƣan gunaⱨliringning ⱨosuli bekitilgǝndur!
Source notes (5)
- Footnote ◼ «U yenimizƣa yamƣurdǝk, yǝr-zeminni suƣiridiƣan «keyinki yamƣur»dǝk qüxüp kelidu!» — «keyinki yamƣur» bolsa Ⱪanaanda (Pǝlǝstindǝ) 3- yaki 4-ayda yaƣidu, u ǝtiyazliⱪ ziraǝtlǝrning pixixida ⱨalⱪiliⱪ rolini oynaydu. Bu yamƣurlar bolmisa ⱨosul bolmaydu. «Biz Uni bilidiƣan bolimiz!... U ... «keyinki yamƣur»dǝk qüxüp kelidu!» — alimlarning bu üq ayǝt (1-3) üstidǝ üq hil pikri bar: — (1) bu Israilning ahirⱪi zamanda towa ⱪilidiƣan duasi (qünki Israillar Ⱨoxiyaning dǝwridǝ towa ⱪilƣan ǝmǝs); (2) bu Ⱨoxiya pǝyƣǝmbǝrning: «Pǝrwǝrdigarning yeniƣa ⱪaytayli» degǝn dǝwiti; (3) bu Israilning xu qaƣdiki yüzǝki bir inkasi, halas. Sɵzlǝr qirayliⱪ bolsimu Huda uni yüzǝki dǝp ⱪaraydu (4-ayǝtni kɵrüng). Xunga biz üqinqi imkaniyǝtkǝ ⱪayilmiz. Qünki bu sɵzlǝrdǝ ɵz gunaⱨini etirap ⱪilidiƣan konkret gǝp kǝmqil. Əgǝr duada towa ⱪilidiƣan sɵzlǝr bar bolƣan bolsa intayin yahxi bir dua bolatti; 14-babta ⱨǝⱪiⱪiy towa ⱪilidiƣan dua tepilidu.
- Footnote ◼ «Mǝn pǝyƣǝmbǝrlǝr arⱪiliⱪ ularni qepiwǝtkǝn...» — Huda pǝyƣǝmbǝrliri arⱪiliⱪ nurƣun ⱪetim Israilƣa jazasini elip baridiƣan ⱨɵkümlirini uⱪturƣanidi; demǝk, u dǝrⱨal jazalirini ǝwǝtmǝydu, bǝlki awwal pǝyƣǝmbǝrliri arⱪiliⱪ agaⱨlandurup, towa ⱪilix pursitini beridu; pǝⱪǝt towa ⱪilmisa jazasini qüxüridu. Jazalar qüxkǝndǝ Israillar «qepiwetilgǝn, ...ɵltürüwetilgǝn» idi. Yuⱪirida (3-ayǝttǝ) Israil sahtipǝzlik bilǝn «Hudaning bizni ⱪutⱪuzuxⱪa qiⱪixi ... tang sǝⱨǝrning boluxidǝk muⱪǝrrǝr» degǝnidi, biraⱪ ⱨazir Huda: «Mening ⱨɵkümlirim tang nuridǝk qiⱪidu» dǝydu.
- Footnote ◼ «Mǝn ⱪurbanliⱪlardin ǝmǝs, bǝlki meⱨir-muⱨǝbbǝttin, kɵydürmǝ ⱪurbanliⱪlardin kɵrǝ, Hudani tonux ⱨǝm bilixtin hursǝnlik tapimǝn» — Huda Musa pǝyƣǝmbǝr arⱪiliⱪ ⱪurbanliⱪlarni tǝlǝp ⱪilƣan. Biraⱪ keyinki kɵp pǝyƣǝmbǝrlǝr arⱪiliⱪ, bular Mening ahirⱪi mǝⱪsitim ǝmǝs, bǝlki: (1) Ɵz hǝlⱪimning manga ⱪaratⱪan qing kɵnglidiki ibadǝt wǝ muⱨǝbbitini izdǝymǝn (xundaⱪ ixlar pǝⱪǝt Mǝsiⱨning nijati wǝ Muⱪǝddǝs Roⱨ arⱪiliⱪ ǝmǝlgǝ axurulidu, ǝlwǝttǝ); (2) ⱪurbanliⱪlar sunulƣanda, ǝgǝr ihlasmǝnlik wǝ muⱨǝbbǝt bolmisa, undaⱪta ularni ⱪilmiƣininglar tüzük, dǝp uⱪturƣan.
- Cross-reference ◘ Mat. 9:13; 12:7
- Cross-reference ◘ Ⱨox. 8:1
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.