Muⱪeddes Kalam (yǝngi yeziⱪ)
Ⱨoxiya 14
Israilning kǝlgüsidǝ towa ⱪilixi, ⱪutⱪuzulup ǝsligǝ kǝltürülüxi
I Israil, Pǝrwǝrdigar Hudayingning yeniƣa ikkilǝnmǝy ⱪaytip kǝl!
Qünki ɵz ⱪǝbiⱨliking bilǝn putlixip yiⱪilƣansǝn. 1
Ɵzünglar bilǝn billǝ sɵzlǝrni epkelinglar,
Pǝrwǝrdigarning yeniƣa ⱪaytinglar;
Uningƣa: — «Barliⱪ ⱪǝbiⱨlikni kǝqürgǝysǝn,
Xapaǝt bilǝn bizni ⱪobul ⱪilƣaysǝn,
Xuning bilǝn biz Sanga lǝwlirimizdiki «buⱪa ⱪurbanliⱪlar»ni tutimiz — dǝnglar. 2
— «Asuriyǝ bizni ⱪutⱪuzmaydu,
Atlarƣa minmǝymiz;
Biz ⱨǝrgiz ɵz ⱪolimiz yasiƣiniƣa: — «Hudayimiz!» demǝymiz;
Qünki Sǝndinla yetim-yesirlar rǝⱨim-xǝpⱪǝt tapidu». 3
— Mǝn ularni «arⱪiƣa qekinixliri»din saⱪaytimǝn,
Mǝn ularni qin kɵnglümdin halap sɵyimǝn;
Qünki Mening ƣǝzipim uningdin yandi.
Mǝn Israilƣa xǝbnǝmdǝk bolimǝn;
U nilupǝrdǝk bǝrⱪ uridu,
Yiltizliri Liwan kedir dǝrihidǝk yiltiz tartidu;
Uning bihliri xahlap yeyilidu,
Uning güzǝlliki zǝytun dǝrihidǝk,
Puriⱪi Liwan kediriningkidǝk bolidu.
Hǝlⱪ ⱪaytip kelip, uning sayisi astida olturidu;
Ular ziraǝtlǝrdǝk yaxnaydu,
Üzüm telidǝk qeqǝklǝydu;
Liwanning xarabliri aƣzida ⱪalƣandǝk, esidǝ xerin ⱪalidu. 4
Əfraim: «Mening butlar bilǝn yǝnǝ nemǝ karim!» — dǝydiƣan bolidu.
«Mǝn uningƣa jawab berimǝn, uningdin hǝwǝr alimǝn!
«Mǝn yapyexil bir ⱪariƣaydurmǝn».
«Sening mewǝng Mǝndindur!» 5
Kim dana bolup, bu ixlarni qüxinǝr? Qeqǝn bolup, bularni bilǝr?
Qünki Pǝrwǝrdigarning yolliri durustur,
Ⱨǝⱪⱪaniylar ularda mangidu;
Biraⱪ itaǝtsizlǝr ularda putlixip yiⱪilidu. 6
Source notes (6)
- Cross-reference ◘ Ⱨox. 12:7
- Footnote ◼ «...«buⱪa ⱪurbanliⱪlar»ni tutimiz — «buⱪa ⱪurbanliⱪlar» Hudaƣa atap beƣixlinidiƣan «kɵydürmǝ ⱪurbanliⱪ»lar iqidǝ ǝng ⱪimmǝtlik ⱪurbanliⱪ idi. Muxu yǝrdǝ kɵqmǝ mǝnidǝ ixlǝtkǝn, ǝlwǝttǝ. U «lǝwlirimizdiki mol ibadǝt-mǝdⱨiyǝ»ni kɵrsitidu. Baxⱪa birhil tǝrjimisi: «lǝwlirimizdiki mewini tutimiz».
- Footnote ◼ «Qünki Sǝndinla yetim-yesirlar rǝⱨim-xǝpⱪǝt tapidu»» — bu sɵz Ⱨoxiyaning balilirining ɵz dadisi bilǝn bolƣan kǝqürmixini ǝks ǝttürgǝn bolidu.
- Footnote ◼ «Liwanning xarabliri aƣzida ⱪalƣandǝk, esidǝ xerin ⱪalidu» — ibraniy tilida: «Uning ǝslǝtmisi Liwandiki xarabningkidǝk bolidu».
- Footnote ◼ «Əfraim: «Mening butlar bilǝn yǝnǝ nemǝ karim!» — dǝydiƣan bolidu» — baxⱪa birhil tǝrjimisi: «U (Huda Əfraimƣa) «I Əfraim, Mening butlar bilǝn nemǝ alaⱪǝm bolsun!» — dǝydu».
- Cross-reference ◘ Pǝnd. 10:29
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.