Muⱪeddes Kalam (yǝngi yeziⱪ)
Ⱨekmǝt topliƣuqi 6
Ⱨǝmmǝ adǝm ⱨayatning lǝzzitini tetiyalmaydu
Ⱪuyax astida bir yaman ixni kɵrdum; u ix adǝmlǝr arisida kɵp kɵrülidu —
Huda birsigǝ bayliⱪlar, mal-dunya wǝ izzǝt-ⱨɵrmǝt tǝⱪsim ⱪildi, xuning bilǝn uning ɵz kɵngli haliƣinidin ⱨeqnǝrsisi kǝm bolmidi; biraⱪ Huda uningƣa bulardin ⱨuzur elixⱪa muyǝssǝr ⱪilmidi, bǝlki yat bir adǝm ulardin ⱨuzur alidu; mana bu bimǝnilik wǝ eƣir azabtur.
Birsi yüz bala kɵrüp kɵp yil yaxixi mumkin; biraⱪ uning yil-künliri xunqilik kɵp bolsimu, uning jeni bǝhtni kɵrmisǝ, ⱨǝtta gɵrni kɵrmigǝn bolsimu, tuƣulup qaqrap kǝtkǝn bowaⱪ uningdin ǝwzǝldur dǝymǝn. 1 Qünki qaqriƣan bala bimǝnilik bilǝn kelidu, ⱪarangƣuluⱪta ketidu, ⱪarangƣuluⱪ uning ismini ⱪaplaydu; U künnimu kɵrmigǝn, bilmigǝn; biraⱪ ⱨeq bolmiƣanda u birinqisigǝ nisbǝtǝn aram tapⱪandur. 2
Bǝrⱨǝⱪ, ⱨeliⱪi kixi ⱨǝtta ikki ⱨǝssǝ ming yil yaxiƣan bolsimu, biraⱪ bǝhtni kɵrmisǝ, ǝⱨwali ohxaxtur — ⱨǝrbir kixi ohxax bir jayƣa baridu ǝmǝsmu?
Jawabsiz soallar
Adǝmning tartⱪan barliⱪ japasi ɵz aƣzi üqündur; biraⱪ uning ixtiⱨasi ⱨǝrgiz ⱪanmaydu. Xundaⱪta dana kixining ǝhmǝⱪtin nemǝ artuⱪqiliⱪi bolsun? Namrat kixi baxⱪilar aldida ⱪandaⱪ mengixni bilgǝn bolsimu, uning nemǝ paydisi bolsun? Kɵzning kɵrüxi arzu-ⱨǝwǝsning uyan-buyan yürüxidin ǝwzǝldur. Bundaⱪ ⱪilixmu bimǝnilik wǝ xamalni ⱪoƣliƣandǝk ixtur. Ɵtüp kǝtkǝn ixlarning bolsa alliⱪaqan nami bekitilip atalƣan; insanning nemǝ ikǝnlikimu ayan bolƣan; xunga insanning ɵzidin ⱪudrǝtlik bolƣuqi bilǝn ⱪarxilixixiƣa bolmaydu. 3
Qünki gǝp ⱪanqǝ kɵp bolsa, bimǝnilik xunqǝ kɵp bolidu; buning insanƣa nemǝ paydisi? 4 Qünki insanning ɵmridǝ, yǝni uning sayidǝk tezla ɵtidiƣan mǝnisiz ɵmridiki barliⱪ künliridǝ uningƣa nemining paydiliⱪ ikǝnlikini kim bilsun? Qünki insanƣa u kǝtkǝndin keyin ⱪuyax astida nemǝ ixning bolidiƣanliⱪini kim dǝp berǝlisun? 5
Source notes (5)
- Footnote ◼ «ⱨǝtta gɵrni kɵrmigǝn bolsimu,...» — demǝk, u ɵlmǝydu. Baxⱪa birhil tǝrjimisi: «wǝ yaki dǝpnǝ ⱪilinmiƣan bolsa,...».
- Cross-reference ◘ Ayup 3:16; Zǝb. 58:7-8
- Footnote ◼ «Ɵtüp kǝtkǝn ixlarning ... alliⱪaqan nami bekitilip atalƣan» — mǝnisi ⱨǝrbir ix aldin’ala Huda tǝripidin bekitilgǝn bolsa kerǝk. «Insanning nemǝ ikǝnlikimu ayan bolƣan» — baxⱪa birhil tǝrjimisi: «Insanning nemǝ ikǝnlikimu bilingǝn (demǝk, Huda tǝripidin)» (xunga uning bilǝn ⱪarxilixix biⱨudiliktur). Biraⱪ ayǝtni insanning ajiz bǝndǝ ikǝnlikini tǝkitlǝydu, dǝp ⱪaraymiz.
- Footnote ◼ «Qünki gǝp ⱪanqǝ kɵp bolsa,..» — muxu yǝrdǝ «gǝp» insanning Huda bilǝn ⱪarxilixidiƣan gǝplirini kɵrsǝtsǝ kerǝk. Baxⱪa birhil tǝrjimisi: «qünki biⱨudilikni kɵpǝytidiƣan ixlar kɵptur...»
- Cross-reference ◘ Top. 8:7; Zǝb. 144:4; Yaⱪ. 4:13, 14
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.