Muⱪeddes Kalam (yǝngi yeziⱪ)
Ⱨekmǝt topliƣuqi 10
Əⱪil beridiƣan bǝzi ⱨekmǝtlǝr
Huddi ɵlük qiwinlǝr ǝttarning ǝtirini sesitiwetidiƣandǝk, azraⱪⱪinǝ ǝhmǝⱪliⱪ tarazida danaliⱪ wǝ izzǝt-ⱨɵrmǝttinmu eƣir tohtaydu.
Danaliⱪning kɵngli ongƣa mayil, ǝhmǝⱪningki solƣa. 1
Əhmǝⱪ kixi ⱨǝtta yolda mengiwatⱪandimu, uning ǝⱪli kǝm bolƣaqⱪa, u ǝhmǝⱪ ikǝnlikini ⱨǝmmigǝ ayan ⱪilidu.
Ⱨɵkümdarning sanga aqqiⱪi kǝlsǝ, ornungdin istepa bǝrmǝ; qünki tinq-sǝwriqanliⱪ hata-sǝwǝnliktin bolƣan zor hapiliⱪni tinqitidu.
Ⱪuyax astida yaman bir ixni kɵrdumki, u ⱨɵkümdardin qiⱪⱪan bir hata ixtur — ǝhmǝⱪlǝr yuⱪiri mǝnsǝptǝ, xuning bilǝn tǝng baylar pǝs orunda olturidu; 2 mǝn ⱪullarning atⱪa mingǝnlikini, ǝmirlǝrning ⱪullardǝk piyadǝ mangƣanliⱪini kɵrdum. 3
Turmuxta uqraydiƣan hǝtǝrlǝrgǝ danaliⱪ kerǝk
Orini koliƣan kixi uningƣa yiⱪilixi mumkin; tamni buzƣan kixini yilan qeⱪixi mumkin; 4 5 taxlarni yɵtkigǝn kixi tax tǝripidin yarilinixi mumkin; otun yaridiƣan kixi hǝwpkǝ uqraydu.
Palta gal bolsa, birsi tiƣini bilimisǝ, paltini küqǝp qepixⱪa toƣra kelidu; biraⱪ danaliⱪ adǝmni utuⱪ-muwǝppǝⱪiyǝtkǝ erixtüridu.
Yilan oynitilmay turup, yilanqini qaⱪsa, yilanqiƣa nemǝ payda? 6
Danixmǝnlǝr wǝ ǝhmǝⱪlǝrning ix-sɵzliri
Dana kixining sɵzliri xǝpⱪǝtliktur; biraⱪ ǝhmǝⱪning lǝwliri ɵzini yutidu. Sɵzlirining bexi ǝhmǝⱪliⱪ, ayiƣi rǝzil tǝlwiliktur; ǝmma ǝhmǝⱪ yǝnila gǝpni kɵpǝytidu. Biraⱪ ⱨeqkim kǝlgüsini bilmǝydu; uningdin keyinki ixlarni kim uningƣa eytalisun?
Əhmǝⱪlǝr japasi bilǝn ɵzlirini upritidu; qünki ular ⱨǝtta xǝⱨǝrgǝ baridiƣan yolnimu bilmǝydu.
Əhmǝⱪ ⱨɵkümdarlarning qataⱪliri
I zemin, padixaⱨing bala bolsa, ǝmirliring sǝⱨǝrdǝ ziyapǝt ɵtküzsǝ, ⱨalingƣa way! 7
I zemin, padixaⱨing mɵtiwǝrning oƣli bolsa wǝ ǝmirliring kǝyp üqün ǝmǝs, bǝlki ɵzini ⱪuwwǝtlǝx üqün muwapiⱪ waⱪtida ziyapǝt ɵtküzsǝ, bu sening bǝhting! 8
Yǝnǝ ⱨekmǝtlǝr
Ⱨurunluⱪtin ɵyning torusi ƣulay dǝp ⱪalidu; ⱪollarning boxluⱪidin ɵydin yamƣur ɵtidu.
Ziyapǝt külkǝ üqün tǝyyarlinar, xarab ⱨayatni hux ⱪilar; lekin pul ⱨǝmmǝ ixni ⱨǝl ⱪilar!
Padixaⱨⱪa lǝnǝt ⱪilma, ⱨǝtta oyungdimu tillima; ⱨujrangdimu baylarni tillima; qünki asmandiki bir ⱪux awazingni taritidu, bir ⱪanat igisi bu ixni ayan ⱪilidu. 9
Source notes (9)
- Footnote ◼ «Danaliⱪning kɵngli ongƣa mayil» — ⱪoralni tutup, ɵzini ⱪoƣdax tǝripidur.
- Footnote ◼ «ǝhmǝⱪlǝr» — ibraniy tilida «ǝhmǝⱪliⱪ» dǝp elinƣan.
- Footnote ◼ «mǝn ⱪullarning atⱪa mingǝnlikini... kɵrdum» —Pǝlǝstindǝ kona zamanlarda atⱪa minix pǝⱪǝt abroyluⱪ kixilǝrgila mǝnsup idi.
- Footnote ◼ «tamni buzƣan kixi...» — yaki «qitni buzƣan kixi...».
- Cross-reference ◘ Pǝnd. 26:27
- Footnote ◼ «yilanqi» — nǝy qelip yilanni oynatⱪuqi adǝm. «yilanqini qaⱪsa,..» — yaki «hǝⱪni qaⱪsa...».
- Cross-reference ◘ Yǝx. 3:3, 4; Ⱨox. 13:11; Am. 6:4
- Footnote ◼ «...ɵzini ⱪuwǝtlǝx üqün muwapiⱪ waⱪtida ziyapǝt ɵtküzsǝ,...» — yaki, «...ɵzini tutup muwapiⱪ waⱪtida ziyapǝt ɵtküzsǝ,...». «...wǝ ǝmirliring kǝyp üqün ǝmǝs... ziyapǝt ɵtküzsǝ, bu sening bǝhting!» — baxⱪa birhil tǝrjimisi: «...wǝ ǝmirliring mǝst bolux üqün ǝmǝs, bǝlki salmaⱪliⱪ bilǝn ɵz waⱪtida ziyapǝt ɵtküzsǝ, bu sening bǝhting!».
- Cross-reference ◘ Mis. 22:28
Muⱪeddes Kalam (yǝngi yeziⱪ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.