Muqeddes Kalam (latin yéziq)

Wehiy 5

Qozining oram yazmini qoligha élishi

Andin textte olturghuchining ong qolida ich we tash teripige xet pütülgen we yette möhür bilen péchetlen’gen bir oram yazmini kördüm. 1 2 Yuqiri awaz bilen: «Oram yazmini échip, péchetlerni yéshishke kim layiqtur?» dep towlighan qawul bir perishtinimu kördüm. Lékin ne ershte ne yer yüzide ne yer astida oram yazmini achalaydighan yaki ichige qariyalaydighan héchkim chiqmidi. 3 Oram yazmini échishqa yaki ichige qarashqa layiq birersi tépilmighachqa, qattiq yighliwettim. Andin aqsaqallardin biri manga:

— Yighlima! Qara, Yehuda qebilisidin bolghan shir — Dawutning yiltizi Bolghuchi ghelibe qildi; shunga oram yazmini we uning yette péchitini échishqa U qadir, — dédi. 4 5

Andin qarisam, text bilen töt hayat mexluqning ariliqida, aqsaqallar otturisida bir Qoza öre turatti. U yéngila boghuzlan’ghandek qilatti; Uning yette münggüzi we yette közi bolup, bu közler Xudaning pütkül yer yüzige ewetken yette Rohi idi. 6 Qoza bérip, textte olturghuchining ong qolidin oram yazmini aldi. Yazmini alghanda, töt hayat mexluq we yigirme töt aqsaqal qozining ayighigha yiqildi; ularning herbirining chiltari we xushbuy bilen tolghan altun chiniliri bar idi (bu xushbuy muqeddes bendilerning dualiri idi). 7 Ular yéngi bir küy éytishti: —

«Oram yazmini élishqa,

We péchetlerni échishqa layiqsen;

Chünki boghuzlanding

We her qebilidin, her tildin,

Her millettin, her eldin bolghan insanlarni

Öz qéning bedili bilen sétiwélip, Xudagha mensup qilding. 8

Ularni Xudayimiz üchün bir padishahliqqa uyushturup,

Kahinlar qilding.

Ular yer yüzide höküm süridu». 9

Andin kördüm we mana, textning, hayat mexluqlarning we aqsaqallarning etrapida nurghunlighan perishtilerning awazini anglidim. Ularning sani tümen ming-tümen ming, milyon-milyon idi. 10 11 Ular yuqiri awaz bilen: —

«Boghuzlan’ghan qoza qudret, dölet, danaliq, küch-quwwet, hörmet, shan-sherep

We medhiyige layiqtur» déyishetti. 12

Andin men ersh, yer yüzi, yer asti we déngizdiki herbir mexluq we ularning ichide bar bolghanlarning hemmisining: —

«Textte Olturghuchigha we Qozigha

Medhiye, hörmet, shan-sherep we hoquq-qudret

Ebedil’ebedgiche mensup bolghay!» déginini anglidim.

Töt hayat mexluq «Amin!» dep jawab qayturatti, aqsaqallar yerge yiqilip sejde qilatti. 13

Source notes (13)

Footnote ◼ «munasiwetlik ayetler» — «Zek.» 5:1-4.
Cross-reference ◘ Zek. 5:1-4; Ez. 2:10.
Cross-reference ◘ Fil. 2:10; Weh. 5:13.
Footnote ◼ «Dawutning yiltizi bolghuchi» — yaki «Dawutning yiltizining notisi» («Yesh.» 11:1ni körüng). Lékin bizningche bu söz Dawutning Mesihtin kélip chiqqanliqini hem Mesihning Dawutning Rebbi ikenlikini körsitidu (22:16 we «Mat.» 22:42-45).
Cross-reference ◘ Yar. 49:9,10; Yesh. 11:10; Rim. 15:12; Weh. 22:16.
Cross-reference ◘ Zek. 3:9; 4:10; Weh. 4:5.
Cross-reference ◘ Zeb. 141:2; Weh. 14:2.
Cross-reference ◘ Ros. 20:28; Ef. 1:7; Kol. 1:14; Ibr. 9:12; 10:10; 1Pét. 1:19; 1Yuh. 1:7; Weh. 4:11.
Cross-reference ◘ Mis. 19:6; 1Pét. 2:5, 9; Weh. 1:6.
Footnote ◼ «Ularning sani tümen ming-tümen ming, milyon-milyon idi» — eslide «ularning sani yüz milyonlighan, «milyonlighan idi».
Cross-reference ◘ Dan. 7:10; Ibr. 12:22.
Cross-reference ◘ Weh. 4:11.
Footnote ◼ «...Töt hayat mexluq «amin!» dep jawab qayturatti, aqsaqallar yerge yiqilip sejde qilatti» — bu muhim babning témisi toghruluq «qoshumche söz»imizde azraq toxtilimiz.

Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.