Muqeddes Kalam (latin yéziq)
Zebur 80
80-küy •••• Xuda yolida yurtning güllinishi üchün dua •••• 1-ayettiki izahatni körüng
«Niluperler» dégen ahangda; bir guwahliq; Asaf yazghan küy: —
Qulaq salghaysen, i Israilning padichisi,
Yüsüpni qoy padisidek béqip yétekligüchi;
I kérublar otturisida Olturghuchi,
Nurlan’ghaysen! 1
Efraim, Binyamin, Manassehlerning aldida qudritingni qozghighaysen,
Bizlerni qutquzghili kelgeysen!
I Xuda, bizni Öz yéninggha qayturghaysen!
Jamalingning nurini chachqaysen, shunda biz qutquzulimiz! 2
I Perwerdigar, samawiy qoshunlarning Serdari bolghan Xuda,
Xelqingning dualirigha bolghan gheziping qachan’ghiche yalqunlap turidu?
Sen köz yashlirini ulargha nan ornida qilding,
Köz yashlirini qacha-qachilap ulargha ichküzdung.
Bizni qoshnilirimizgha talashqa qoydung;
Bizni mesxiride düshmenlerning aghzida. 3 4
I samawiy qoshunlarning Serdari bolghan Xuda,
Bizni Öz yéninggha qayturghaysen!
Jamalingning nurini chachqaysen, shunda biz qutquzulimiz!
Sen Misirdin bir tüp üzüm köchitini élip kelding;
Yat ellerni heydiwétip, ornigha uni tikting. 5
Yer teyyarliding u köchetke,
Chongⱪur yiltiz tartip keng yéyildi u zémingha.
Saye tashlidi deshti-taghlargha;
Gholliri küchlük kédir derexliridek; 6
U shaxlirini déngizghiche,
Pilekliridin Efrat deryasimu qurup qalmidi.
Néchün buzisen ⱪashalirini,
Hediye qilisen yoluchilargha méwisini?
Ormandiki yawa tongguzlar uni harap qilmaqta, daladiki haywanatlar ozuq qilmaqta.
I samawiy qoshunlarning Serdari bolghan Xuda, ötünimiz Sendin,
Yénimizgha qaytqaysen!
Ershtin halimizgha nezer salghaysen,
Kélip bu üzüm télidin xewer alghaysen! 7
Yeni ong qolung tikken bu yiltizdin,
Özüng üchün mezmut yétishtürgen bu oghlungdin xewer alghaysen!
Mana u otta köydürüldi,
Késiwétildi;
Yüzüngdiki tenbihiy qarishingni körüp ular halak bolmaqta;
Qolungni ong qolungdiki ademge,
Yeni Özüng üchün mezmut yétishtürgen Insan Oghligha qondurghaysen; 8 9
Shundaq qilghanda biz Sendin hergiz chékinmeymiz;
Bizni yéngilighaysen, shunda biz namingni chaqirip Sanga iltija qilimiz.
I Perwerdigar, samawiy qoshunlarning Serdari bolghan Xuda,
Bizni Öz yéninggha qayturghaysen!
Jamalingning nurini chachqaysen, shunda biz qutquzulimiz!
Source notes (9)
- Footnote ◼ «Qulaq salghaysen, i Israilning padichisi, Yüsüpni qoy padisidek béqip yétekligüchi; i kérublar otturisida Olturghuchi, nurlan’ghaysen!» — bu küy belkim Israilning jenubiy teripide (jenubiy padishahliqida, yeni «Yehuda»da) miladiyedin ilgiriki 734-722 yillarda yézilghan; shu waqitlarda Asuriye impériyesi Israil shimaliy padishahliqigha bösüp kirip, bulangchiliq qilip, ularning köp ademlirini esirge aldi. Jenubiy padishahliqtiki bir qisim kishiler epsuslinip, shimalidiki qérindishliri üchün dua qilidu. «kérublar otturisida Olturghuchi» — Xudaning muqeddes ibadetxanisidiki «eng muqeddes jay»da ehde sanduqining ikki yénida altundin yasalghan birdin «kérub», yeni küchlük perishtining séymasi turidu. Xuda eslide Öz huzurining bu ikki kérub otturisida bolushigha wede qilghan.
- Cross-reference ◘ Zeb. 4:6; 31:16; 67:1-2; Dan. 9:17
- Footnote ◼ «Bizni qoshnilirimizgha talashqa qoydung» — bezi kona köchürmilerde: — «Sen bizni qoshnimizgha mazaq obyékti qilding» dégen sözler tépilidu.
- Cross-reference ◘ Zeb. 44:13-14; 79:4
- Cross-reference ◘ Yesh. 5; Yer. 2:21; Ez. 15; 17:3-10; Yuh. 15:1
- Footnote ◼ «küchlük kédir derexliridek..» — yaki «Tengrining kédir derexliridek...».
- Footnote ◼ «... Kélip bu üzüm télidin xewer alghaysen» — ibraniy tilida: — «...bu üzüm télini yoqlighaysen» dégen bilen ipadilinidu.
- Footnote ◼ «ong qolungdiki adem... yeni Özüng üchün mezmut yétishtürgen Insan oghli..» — «ong qolungdiki adem», «Özüng üchün mezmut yétishtürgen Insan Oghli» shübhisizki Mesih toghruluq aldin’ala éytilghan bésharetlik söz.
- Cross-reference ◘ Zeb. 110:1; Dan. 7:13, 14; Mat. 16:27; Ibr. 1:3; 8:1; 10:12; 12:1; 1Pét. 3:22
Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.