Zebur 71

71-küy •••• Qérighanda éytqan dua

1Sendin, Perwerdigardin panah tapimen;

Méni hergiz yerge qaratmighaysen. 1

2Öz heqqaniyliqingda méni qutuldurghaysen;

Manga qulaq salghaysen,

Méni qutquzghaysen!

3Manga özüm daim panahlinidighan turalghu qoram tash bolghaysen;

Sen méni qutquzushqa buyruq chüshürgeysen;

Chünki Sen égiz téshim, qorghinimdursen.

4Xudayim, méni rezillerning qolidin,

Heqqaniyetsiz, rehimsiz ademdin azad qilghaysen;

5Chünki Sen méning ümidimdursen, i Reb Perwerdigar,

Yashliqimdin tartipla méning tayanchimdursen;

6Baliyatqudiki waqittin bashlap men Sanga tayinip keldim,

Özüng méni anamning qarnidin chiqarghuchisen;

Medhiyemning témisi bolsa herdaim Sen toghruluqtur. 2

7Men nurghunlargha gheyriy yaki karamet sanaldim;

Chünki Sen méning mustehkem panahgahimdursen. 3

8Aghzim kün boyi medhiyiliring hem shan-sheripingge tolidu;

9Emdi qérighinimda méni tashlimighaysen;

Maghdurum ketkinide, mendin waz kechmigeysen.

10Chünki düshmenlirim manga qarshi sözlishidu;

Jénimni élishqa közlewatqanlar qestliship: —

11«Xuda uningdin waz kechti;

Uni qoghlap tutuwélinglar,

Chünki qutuldurudighanlar yoqtur» — déyishidu.

12I Xuda, mendin yiraqlashmighaysen;

I Xudayim, manga yardemge téz kelgeysen!

13Jénimgha küshende bolghanlar shermende bolup yoqitilisun;

Ziyinimgha intilgenler reswaliq hem shermendichilik bilen qaplansun; 4

14Biraq men bolsam, izchil ümidte bolimen,

Séni téximu medhiyileymen.

15Heqqaniyliqing, nijatliqing aghzimda kün boyi bayan qilinidu;

Bular san-sanaqsizdur, bilginimdin köp artuqtur.

16Men Reb Perwerdigarning büyük ishlirini jakarlighan halda kélimen;

Séning heqqaniyliqingni yad étip jakarlaymen —

Peqet Séningkinila! 5

17I Xuda, Sen yashliqimdin tartip manga ögitip kelgensen;

Bügün’ge qeder Séning qilghan karamet ishliringni jakarlap kéliwatimen.

18Emdi hazir men qérip, aq chachliq bolghinimda, i Xuda,

Men bu dewrge küchlük bilikingni jakarlighuche,

Kéler ewladning hemmisige qudritingni ayan qilghuche,

Méni tashliwetmigeysen!

19I ulugh karamet ishlarni qilghan Xuda,

Heqqaniyliqing pelekke taqashti;

Sanga kimmu oxshash bolalisun!

20Sen manga köp hem éghir külpetlerni körsetkenikensen,

Méni qaytidin yéngilaysen, yer tegliridin qayturup élip chiqisen;

21Sen méning izzet-hörmitimni téximu yuqiri qilip,

Her tereptin manga teselli bérisen.

22Men Séni rawab chélip medhiyileymen,

Séning heqiqitingni medhiyileymen, i Xudayim;

Chiltar chélip Séni küyleymen, i Sen, Israilning Muqeddisi! 6

23Sanga küyler éytqinimda, lewlirim tentene qilidu,

Özüng hörlükke chiqarghan jénimmu shundaq rohlinip éytidu;

24Tilim kün boyi heqqaniyliqing toghrisida sözleydu;

Chünki manga yamanliq qilmaqchi bolghanlar yerge qaritilip reswa qilinidu.