Zebur 65

65-küy •••• Medhiye we teshekkür

1Neghmichilerning béshigha tapshurulup oqulsun dep, Dawut yazghan küy-naxsha: —

Zionda, medhiye süküt ichide Séni kütidu, i Xuda;

Sanga qilghan wede emelge ashurulidu. 1

2I, dua Anglighuchi, Séning aldinggha barliq et igiliri kélidu.

3Gunahliq ishlar, asiyliqlirimiz,

Kelkün basqandek mendin ghalip kélidu;

Lékin Sen ularni yépip kechürüm qilisen; 2

4Sen tallap Özüngge yéqinlashturghan kishi némidégen bextlik!

U hoyliliringda makanlishidu;

Bizler Séning makaningning, yeni muqeddes ibadetxanangning berikitidin qanaet tapimiz;

5Sen heqqaniyliqni namayan qilidighan karamet we dehshet ishlar bilen bizge jawab,

I nijatliqimiz bolghan Xuda,

Pütkül yer-déngizlarning chet-chetliridikilergiche tayanchi Bolghuchi!

6Béling qudret bilen baghlan’ghan bolup,

Küchüng bilen taghlarni berpa qilghansen;

7Déngizlarning örkeshligen shawqunlirini,

Dolqunlarning shawqunlirini,

Hemde ellerning chuqanlirini tinjitquchisen!

8Jahanning chet-chetliride turuwatqanlar karametliringdin qorqidu;

Sen künchiqishtikilerni, künpétishtikilerni shadlandurisen;

9Yer yüzining ghémini yep yoqlap kélip, uni sughirisen,

Uni tolimu munbetleshtürisen.

Xudaning derya-ériqliri sugha tolghandur;

Shundaq qilip sularni teyyarlap,

Kishilerni ashliq bilen teminleysen.

10Térilghu étizlarning chöneklirini sugha qandurisen,

Qirlirini tarashlaysen,

Tupraqni mol yéghinlar bilen yumshitisen;

Uningda ün’genlerni beriketleysen.

11Sen németliringni yilning hosuligha taj qilip qoshup bérisen;

Qedemliringdin bayashatliq heryan’gha tamidu;

12Daladiki yaylaqlarghimu tamidu;

Tagh-dawanlar shat-xoramliqni özlirige belwagh qilidu;

13Köklemler qoy padiliri bilen kiyin’gen,

Jilghilar maysilargha qaplinidu;

Ular xushalliq bilen tentene qilidu,

Berheq, ular naxshilarni yangritishidu!