Zebur 5

5-küy •••• Seherdiki ümid

1Neghmichilerning béshigha tapshurulup, neyler bilen oqulsun dep, Dawut yazghan küy: —

Méning sözlirimge qulaq salghaysen, i Perwerdigar,

Méning ahlirimgha köngül bölgeysen.

2Kötürgen peryadlirimni angla, Padishahim, méning Xudayim,

Chünki men Sangila dua qilimen.

3I Perwerdigar, seherde Sen awazimni anglaysen;

Men seherde özümni Sanga qaritimen,

Yuqirigha köz tikimen. 1

4Chünki Sen rezilliktin huzur alghuchi ilah emesdursen;

Yamanliq hergiz Sen bilen bille turmaydu.

5Pochi-tekebburlar közüng aldida turalmaydu;

Qebihlik qilghuchilarning hemmisi Sanga yirginchliktur.

6Yalghan sözligüchilerning hemmisini halak qilisen;

Perwerdigar qanxor, aldamchi kishilerge nepret qilur.

7Biraq men bolsam, méhir-shepqitingning kengrichilikidin öyüngge kirimen;

Sanga bolghan eyminishtin muqeddes ibadetxananggha qarap sejde qilimen;

8Méni öch körgenler tüpeylidin Öz heqqaniyliqing bilen méni yétekligeysen, i Perwerdigar;

Yolungni aldimda tüz qilghin.

9Chünki ularning aghzida héchqandaq semimiylik yoqtur;

Ularning ichki dunyasi bolsa pasiqliqtur,

Ularning galliri échilghan qebridek sésiqtur,

Ular tili bilen xushamet qiliwatidu. 2

10Ularning gunahini békitkeysen, i Xuda;

Ular öz pilanliri bilen özliri mollaq atsun;

Ularni özlirining nurghunlighan itaetsizlikliri bilen heydep chiqarghaysen;

Chünki ular Sanga asiyliq qildi. 3

11Shundaq qilghanda Sanga tayan’ghanlarning hemmisi shadlinidu;

Ular menggü shadliq bilen tentene qilidu;

Sen ularni qoghdaysen;

Séning namingni söygenler séningdin yayraydu.

12Chünki Sen, i Perwerdigar, heqqaniy ademge bext ata qilisen;

Uni shapaiting bilen qalqan kebi oraysen.