Muqeddes Kalam (latin yéziq)
Zebur 47
47-küy •••• Xuda menggü ghelibe qilghuchidur
Neghmichilerning béshigha tapshurulup oqulsun dep, Korahning oghulliri üchün yézilghan küy: —
Barliq qowmlar, Xudani alqishlanglar!
Uninggha yuqiri awazinglar bilen xushalliq tentenisini yangritinglar!
Chünki Hemmidin Aliy Bolghuchi, Perwerdigar, dehshetlik we heywetliktur,
Pütkül jahanni sorighuchi büyük Padishahtur. 1
U bizge xelqlerni boysundurup,
Bizni el-milletler üstige hakim qilidu. 2
U biz üchün mirasimizni tallap,
Yeni Özi söygen Yaqupning pexri bolghan zéminni békitip berdi.
Sélah!
Xuda tentene sadasi ichide,
Perwerdigar sunay sadasi ichide yuqirigha kötürüldi;
Xudagha naxsha-küy éytinglar, naxsha-küy éytinglar!
Padishahimizgha naxsha-küy éytinglar, naxsha-küy éytinglar!
Xuda pütkül jahanning padishahidur;
Zéhninglar bilen uninggha naxsha-küy éytinglar!
Xuda eller üstige höküm süridu;
U Özining pak-muqeddeslikining textide olturidu.
El-yurtlarning kattiliri jem bolup,
Ibrahimning Xudasining xelqige qoshuldi;
Chünki jahandiki barliq qalqanlar Xudagha tewedur;
U neqeder aliydur! 3
Source notes (3)
- Footnote ◼ «...Perwerdigar, dehshetlik we heywetliktur» — ibraniy tilida «dehshetlik» hem «heywetlik» bir söz bilenla ipadilinidu.
- Footnote ◼ «... Bizni el-milletler üstige hakim qilidu» — ibraniy tilida: — «...El-milletlerni putimiz astida qilidu».
- Footnote ◼ «...jahandiki barliq qalqanlar Xudagha tewedur» — «qalqanlar» belkim dunyadiki barliq qoral-yaraqlarni körsitidu. Bashqa birxil terjimisi: — «padishahlar».
Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.