Muqeddes Kalam (latin yéziq)
Zebur 118
118-küy •••• «Perwerdigarning namida kelgüchige mubarek bolsun!»
Perwerdigargha teshekkür éytinglar, chünki U méhribandur;
Uning méhir-muhebbiti menggüdur!
Israil: «Uning méhir-muhebbiti menggüdur» — désun!
Harun jemeti: «Uning méhir-muhebbiti menggüdur» — désun!
Perwerdigardin qorqidighanlar: «Uning méhir-muhebbiti menggüdur» — désun!
Qistaqta qélip Yahgha nida qildim;
Yah jawab bérip, méni kengri-azadilikte turghuzdi.
Perwerdigar men tereptidur, men qorqmaymen;
Insan méni néme qilalisun? 1
Perwerdigar manga yardem qilghuchilar arisida bolup, méning teripimdidur;
Öchmenlirimning meghlubiyitini körimen.
Perwerdigarni bashpanahim qilish,
Insan’gha tayinishtin ewzeldur; 2
Perwerdigarni bashpanahim qilish,
Emirlerge tayinishtin ewzeldur.
Barliq eller méni qorshiwaldi;
Biraq Perwerdigarning nami bilen ularni halak qilimen; 3 4
Ular méni qorshiwaldi; berheq, qorshiwaldi;
Biraq Perwerdigarning nami bilen men ularni halak qilimen;
Ular herilerdek méni qorshiwaldi;
Ular yéqilghan yantaq otidek tézla öchürülidu;
Chünki Perwerdigarning nami bilen men ularni halak qilimen.
Sen düshmen méni zerb bilen itterding,
Yiqilghili tas qaldim;
Biraq Perwerdigar manga yardemde boldi.
Küchüm we naxsham bolsa Yahdur;
U méning nijatliqim boldi!
Heqqaniylarning chédirlirida shadliq we nijatliqning tenteniliri yangritilmaqta;
Perwerdigarning ong qoli zeper quchmaqta!
Perwerdigarning ong qoli égiz kötürülgen!
Perwerdigarning ong qoli zeper quchmaqta! 5
Men ölmeymen, belki yashaymen,
Yahning qilghanlirini jakarlaymen.
Perwerdigar manga qattiq terbiye bergen bolsimu,
Biraq U méni ölümge tapshurmidi.
Heqqaniyet derwazilirini manga échip béringlar;
Men kirimen, Yahni medhiyileymen. 6
Bu Perwerdigarning derwazisidur;
Heqqaniylar buningdin kiridu!
Men sanga teshekkür éytimen;
Chünki Sen manga jawab qayturdung,
Hem méning nijatliqim boldung.
Tamchilar tashliwetken tash bolsa,
Burjek téshi bolup tiklendi. 7 8
Bu ish Perwerdigardindur,
Bu közimiz aldida karamet boldi. 9
Bu Perwerdigar yaratqan kündur;
Biz uningda shadlinip xursen bolimiz.
Qutquzghaysen, i Perwerdigar, Sendin ötünimen;
Sendin ötünimen, bizni yashnatqaysen! 10 11
Perwerdigarning namida Kelgüchige mubarek bolsun!
Biz Perwerdigarning öyide turup sanga «Mubarek!» dep towliduq.
Perwerdigar Tengridur;
U üstimizge nur bergen;
Héytliq qurbanliqni tanilar bilen baghlanglar,
— Qurban’gahning münggüzlirige ilip baghlanglar. 12
Sen méning Ilahimdursen,
Men Sanga teshekkür éytimen;
Méning Xudayim, men Séni ulughlaymen.
Perwerdigargha teshekkür éytinglar;
Chünki U méhribandur;
Uning méhir-muhebbiti menggüdur!
Source notes (12)
- Cross-reference ◘ Rim. 8:31
- Cross-reference ◘ Zeb. 62:8, 9; 146:3; Yer. 17:5, 7
- Footnote ◼ «Barliq eller méni qorshiwaldi; biraq Perwerdigarning nami bilen ularni halak qilimen;...» — bu küydiki 10-29-ayetler kimni körsetkenlikini oqurmenler Injil, «Matta», «Markus» hem «Luqa» qismiliridiki axirqi nechche bablardin köreleydu.
- Cross-reference ◘ Zeb. 18:43، 47، 48; Yesh. 11:1-10; Rim. 15:12
- Cross-reference ◘ Luqa 1:51
- Cross-reference ◘ Yesh. 26:2
- Footnote ◼ «Tamchilar tashliwetken tash bolsa, burjek téshi bolup tiklendi» — «Mat.» 20:42ni körüng.
- Cross-reference ◘ Yesh. 8:14; 28:16; Mat. 21:42; Mar. 12:10; Luqa 20:17; Ros. 4:11; Rim. 9:33; Ef. 2:20; 1Pét. 2:4, 7
- Cross-reference ◘ Yesh. 29:14
- Footnote ◼ «Qutquzghaysen, i Perwerdigar!» — ibraniy tilida «Hoshanna!» dégen söz. «Mat.», 21:9ni körüng.
- Cross-reference ◘ Mat. 21:9, 15; Mar. 11:9, 10; Yuh. 12:13
- Footnote ◼ «Héytliq qurbanliqni tanilar bilen baghlanglar, — qurban’gahning münggüzlirige ilip baghlanglar» — muqeddes ibadetxanidiki qurban’gahning töt bürjikining herbirige bir «münggüz» (ilmek) békitilgen. «Muqeddes chédir»ni körsitidighan sxémilarni körüng.
Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.