Muqeddes Kalam (latin yéziq)
Zebur 110
110-küy •••• Kelgüsidiki alemning Padishahi — Dawutning ewladi Mesih
Dawut yazghan küy: —
Perwerdigar méning Rebbimge: —
«Men séning düshmenliringni textipering qilghuche,
Ong yénimda olturghin» — dédi. 1
Perwerdigar qudritingni körsitidighan shahane hasangni Ziondin uzitidu;
Düshmenliring arisida höküm sürgin! 2
Küchüngni körsitidighan künde,
Öz xelqing xalis qurbanliq kebi pida bolidu;
Muqeddes heywitingde,
Shu yashliq dewringdikidek,
Sanga hazirmu shebnemler seherning baliyatqusidin yéngi chiqqandek chüshidu; 3
Perwerdigar shundaq qesem ichti,
Hem buningdin yanmaydu: —
«Sen ebedil’ebedgiche Melkizedekning tipidiki bir kahindursen». 4 5
Ong teripingde bolghan Reb ghezipini körsetken künde padishahlarni urup pare-pare qiliwétidu;
U eller arisida sotlaydu;
Jay-jaylarni jesetler bilen tolduridu;
Keng zéminning béshini yaridu; 6
U yolda ériqtin su ichidu;
U shunga kishining béshini yöligüchi bolidu. 7
Source notes (7)
- Footnote ◼ «Men séning düshmenliringni textipering qilghuche» — «textiper» padishah textke olturghanda puti turidighan jay.
- Footnote ◼ «Perwerdigar qudritingni körsitidighan shahane hasangni Ziondin uzitidu» — bu sözning menisi belkim: Xuda yer yüzide öz seltenitini qurghanda, tikligen padishah Mesihning küch-qudriti hem hoquqi Yérusalémdin chiqip her yerge yétip baridu.
- Footnote ◼ «Öz xelqing xalis qurbanliq kebi pida bolidu» — «xalis qurbanliq», 54-küy, 6-ayettiki izahatni körüng. «Muqeddes heywitingde, shu yashliq dewringdikidek, sanga hazirmu shebnemler seherning baliyatqusidin yéngi chiqqandek chüshidu» — déhqanlargha melum bolghinidek, shebnem adette peqet yapyéshil otyashlar we derexlerning üstige chüshidu. Quruq-qaqshal bolup qalghan derexlerge chüshmeydu. Köchme menisi, Mesih menggüge yapyéshil derextek yash turuwéridu. Bashqa birxil terjimisi: «Alemning sehiri bolmighuche, Séni tughuldurdum». Bu terjime qedimki grék til terjimisi LXXge oxshash.
- Footnote ◼ «Sen ebedil’ebedgiche Melkizedekning tipidiki bir kahindursen» — Melkizedek dégen adem hezriti Ibrahimgha kahin (Xudagha wekil bolup qurbanliqni qobul qilghuchi) bolghan hem Ibrahim alghan oljidin ondin birini alghan («Yar.» 14-bab). Démek, u Ibrahimdin ulugh idi, shunglashqa Ibrahimning ewladliridin bolghan kahinlardinmu ulugh idi. «Yar.» 14-babta déyilginiche, bu sirliq ademning ata-anisi yoq idi. Injil «Ibraniylargha», 8- hem 10-babni körüng. «Melkizedek»ning menisi: «Heqqaniyliqning padishahi» «Amanliq padishahi». Undaqta bu yerde «Sen ebedil’ebedgiche Melkizedekning tipidiki bir kahindursen» dep békitilishi alemde uning eng aliy kahin dep békitilgenlikini körsitidu.
- Cross-reference ◘ Ibr. 5:6; 6:20; 7:17
- Cross-reference ◘ Weh. 14:14-20; 16:14-16; 20:8-10
- Footnote ◼ «U yolda ériqtin su ichidu; u shunga kishining béshini yöligüchi bolidu» — bu sirliq gep belkim Mesihning kichik péil ikenlikini, hemde öziningmu kichik péil möminlerge teselli béridighanliqini körsitidu. «U shunga kishining béshini yöligüchi bolidu» — bashqa birxil terjimisi: «Shunga u (öz) béshini kötüridu».
Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.