Muqeddes Kalam (latin yéziq)

Batur Hakimlar 5

Nusret nezmisi

Shu küni Deborah we Abinoamning oghli Baraq mundaq nezme oqudi: —

Israilda yétekchiler yol bashlighini üchün,

Xelq ixtiyaren özlirini pida qilghini üchün,

Perwerdigargha teshekkür-medhiye oqunglar!

Ey padishahlar, anglanglar,

Ey emirler, qulaq sélinglar!

Men, men Perwerdigargha atap nezme oquymen,

Men Israilning Xudasi Perwerdigargha küy éytimen.

I Perwerdigar, sen Séirdin chiqqiningda,

Édomning yayliqidin chiqip yürüsh qilghiningda,

Yer titrep, asmanlardin sular tamchidi,

Shundaq, bulutlar yamghurlirini yaghdurdi; 1

Taghlar Perwerdigarning aldida tewrendi,

Ene Sinay téghimu tewrinip ketti,

Israilning Xudasi Perwerdigarning aldida. 2 3

Anatning oghli Shamgarning künliride,

Hem Yaelning künliride,

Chong yollar tashlinip qélip,

Yoluchilar egri-toqay chighir yollar bilen mangatti;

Israilda ezimetler yoqap ketti,

Taki menki Deborah qozghilip,

Israilda bir ana süpitide peyda bolghinimghiche. 4

Israillar yéngi ilahlarni tallidi;

Urush derwazilirigha yétip keldi.

Qiriq mingche Israilliqning arisida,

Ya bir qalqan ya bir neyze tépilisichu?! 5

Qelbim Israilning emirlirige qayildur,

Ular xelq arisida özlirini ixtiyaren pida qildi;

Perwerdigargha teshekkür-medhiye oqunglar!

I aq ésheklerge min’genler,

I nepis zilchilerning üstide olturghanlar,

I yolda yürgenler, köngül bölünglar! 6

Su ekilidighan jaylarda olja bölüshüwatqanlarning jushqun awazilirini anglanglar!

Ular shu yerlerde Perwerdigarning heqqaniy emellirini medhiyilep,

Uning Israildiki ezimetlirining heqqaniy emellirini teriplishidu.

Shu waqitta Perwerdigarning xelqi chüshüp derwazilargha yétip kélip: — 7

«I Deborah, oyghan, oyghan!

Oyghan, oyghan, ghezel éytqin!

Ornungdin tur, i Baraq,

Esirliringni yalap mang, i Abinoamning oghli!» — déyishidu. 8

Mana xelqning az bir qaldisi aliyjanablargha egishish üchün chüshti,

Perwerdigarning xelqi yénimgha palwan kebi chüshüp keldi. 9

Mana, Efraimlardin Amalekte yiltiz tartip qalghanlar keldi;

Mana, Binyaminlarmu qowmliringgha qoshulup egiship keldi;

Makirdin emirler chüshüp keldi,

Zebulundin serdarliq hasisini tutqanlar yétip keldi. 10

Issakarning emirliri Deborahqa qoshuldi;

Baraq néme qilghan bolsa Issakarmu shundaq qilip,

Uning keynidin jilghigha tap basturup étilip chüshti!

Rubenning aile-jemetliridikilerning arisida shunche ulugh niyetler qelblirige pükülgenidi! 11

Sen némishqa qotanlarning ichide turup,

Qoylargha chélin’ghan neyning awazini anglashni xalap qalding?

Rubenning aile-jemetliridikilerning arisida shunche ulugh niyetler qelblirige pükülgenidi!

Giléadlar bolsa Iordan deryasining u teripide turup qaldi;

Danlarmu némishqa kémilerning yénida toxtap qaldi?

Ashirlar bolsa déngiz boyida jim olturuwaldi,

Déngiz qoltuqlirida turup qaldi.

Zebulunlar janlirini ölümge tewekkül qildi;

Naftalilarmu jeng meydanidiki yuqiri jaylarda hem shundaq qildi!

Padishahlar hemmisi kélip, soqushti,

Qanaaniylarning padishahlirimu urushqa chiqti;

Taanaqta, Mégiddoning su boylirida urushti.

Lékin bir’azmu kümüsh olja alalmidi!

Asmanlarda yultuzlarmu jeng qildi,

Orbitiliridin Siséragha qarshi jengge atlandi.

Kishon deryasining éqini düshmenni éqitip ketti;

Shu qedimiy derya, u Kishon deryasidur!

Ey méning jénim, pütün küchüng bilen algha basqin! 12

Ularning atlirining tuyaqliri takirang-takirang qilmaqta,

Tulparliri chapmaqta, chapmaqta.

Merozgha lenet oqunglar, deydu Perwerdigarning Perishtisi,

U yerde olturghuchilargha lenet oqunglar,

Qattiq lenet oqunglar;

Chunki ular Perwerdigargha yardemge kelmidi,

Zalimlargha qarshi Perwerdigargha yardemge kelmidi. 13

Ayallar ichide keniylik Heberning ayali Yael bext-beriketlensun,

Chédirda turghan ayallar ichide u bext-beriket tapsun!

Siséra su soriwidi, u uninggha süt berdi,

Ésilzadilerge layiq bir qachida qaymaq tutti;

U sol qolini chédir qozuqigha,

Ong qolini tömürchining bolqisigha uzatti;

Sisérani urup,

Bash söngükini chéqip,

Chékisidin yanjip ötküzüwetti. 14

Siséra uning ikki putining ariliqigha qiysaydi,

U yiqildi, u ölüktek yatti,

U uning ikki putining ariliqigha qiysaydi, u yiqildi,

Qiysayghan yerde u yiqilip, jan berdi.

Siséraning anisi penjiridin sirtqa sep saldi,

U penjirining rojikidin towlap: —

«Uning jeng harwisi némishqa shunche uzaqqiche kelmeydu?

Jeng harwilirining atlirining tuyaq sadasi némishqa shunche hayal bolidu? — dédi.

Uning dédekliri arisida danalar jawab béridu,

Shundaqla, u derweqe öz-özige jawab béridu: —

«Ular oljilirini yighip bölüshüwatqan bolmisun yene?!

Herbir erkekke ayagh asti qilishqa bir-ikkidin qiz tegkendu,

Siséragha rengdar kiyimler,

Gül keshtilen’gen rengdar kiyimlerdin olja tegkendu,

Bulangchining boynigha aldi-keyni keshtilen’gen rengdar kiyimler tegken bolsa kérek! 15

I Perwerdigar, Séning barliq düshmenliring ene shundaq yoqitilghay!

Lékin Séni söygenler quyashning örlewatqandiki qudritidek küchlük bolghay!».

Shuning bilen zémin qiriq yilghiche tinch-amanliq tapti.

Source notes (15)

Cross-reference ◘ Zeb. 68:7, 8, 9
Footnote ◼ «... Ene Sinay téghimu tewrinip ketti, Israilning Xudasi Perwerdigarning aldida» — yaki «yeni Sinay téghida ayan bolghan Xudaning aldida, — Israilning Xudasi Perwerdigarning aldida».
Cross-reference ◘ Mis. 19:18; Zeb. 68:15, 16, 17; 97:5
Footnote ◼ «Israilda ezimetler yoqap ketti» — yaki «Israilda kent-qishlaqlar yoqap ketti».
Footnote ◼ «Urush derwazilirigha yétip keldi» — démek, Israil tirik Xudani tashlap butlarni talliwalghini üchün Xudaning shu jazasi ularning béshigha chüshti.
Footnote ◼ «nepis zilchilerning üstide olturghanlar» — yaki «toqumlarning üstide olturghanlar». «I aq ésheklerge min’genler, i nepis zilchilerning üstide olturghanlar, i yolda yürgenler...» — bu ayette puritilghan mene belkim «I, Israilda hazir rahet künlerni körgüchiler, siler üchün öz hayatini tewekkül qilghanlarni eslenglar!» dégendek bolushi mumkin.
Footnote ◼ «Su ekilidighan jaylarda olja bölüshüwatqanlar...» — démek, nusret qazan’ghanliqtin hetta su ekelgili chiqqanlarmu oljidin özara bölüshidu. Bashqa birxil terjimisi: — «Oqyachilarning ghowghasidin qutulghanlar su alidighan jaylarda turup, Perwerdigarning heqqaniy emellirini medhiyilep, uning Israildiki ezimetlirining heqqaniy emellirini teriplishidu. Shu waqitta...».
Footnote ◼ «I Deborah, oyghan, oyghan! ... ornungdin tur, i Baraq!...» — 12-ayettiki nezme xelq qéchip chiqiwalghan taghliqtin aman-ésen chüshüp, öz shehirining derwazilirigha kelgende xushalliqidin Deborah we Baraqqa éytqan söyünüsh sözliri bolsa kérek.
Footnote ◼ «Mana xelqning az bir qaldisi aliyjanablargha egishish üchün chüshti» — démek, Xudagha sadiq bolghan «xelq qaldisi» az bolsimu, Baraq we bashqa jasaretlik ezimetlerge egeshken. Bashqa birxil terjimisi: «Xelqning az bir qaldisi küchlüklerning üstidin ghalib keldi». «Perwerdigarning xelqi yénimgha palwan kebi chüshüp keldi» — bashqa birxil terjimisi: «Perwerdigarning xelqi zalimlargha qarshi chiqishqa méning yénimgha chüshti». Bu ayetning yene birnechche xil terjimiliri uchrishi mumkin.
Footnote ◼ «Mana, Efraimlardin Amalekte yiltiz tartip qalghanlar keldi» — Efraim qebilisi eslide Amaleklerning zéminini igiligen we ularni heydiwetkenidi. «Makirdin...» — «Makir» mushu yerde Manasseh qebilisige wekillik qilidu.
Footnote ◼ «Rubenning aile-jemetliridikilerning arisida» — yaki «Rubenning éqinlirining boyida». «Rubenning aile-jemetliridikilerning arisida shunche ulugh niyetler qelblirige pükülgenidi!» — bu nahayiti hejwiy, kinayilik gep. Rubenlerde shunche yüksek niyet bolghini bilen héchnéme qilmidi (16-ayetni körüng).
Footnote ◼ «Kishon deryasining éqini ularni éqitip ketti» — mushu sözler yuqiriqi «asmanlardiki yultuzlar jeng qildi» dégen sözlerni yorutidu. Yazda Kishon deryasi éqinida su yoq déyerlik bolidu; qishta küchlük aqidu. Shunga, shu xulasige kélimizki, hawa rayi özgirip, köp yamghur yaghqachqa, Kishon deryasi téship, Siséraning jeng harwilirini éqitip ketti yaki ularni patqaqqa paturup qoydi (4-ayette shu qattiq yamghur tilgha élinidu).
Footnote ◼ «Zalimlargha qarshi Perwerdigargha yardemge kelmidi» — yaki «Baturlirini élip, Perwerdigargha yardemge kelmidi».
Footnote ◼ «Yael sol qolini chédir qozuqigha, ... chékisidin yanjip ötküzüwetti» — bu ayetlerge qarighanda Yael Siséraning béshigha qaqqan qozuqni bolqa bilen üch qétim urghan.
Footnote ◼ «Bulangchining boynigha aldi-keyni keshtilen’gen rengdar kiyimler tegken bolsa kérek!» — yaki «Méning boynumgha ikki aldi-keyni keshtilen’gen kiyimler olja qilip tegken bolsa kérek!».

Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.