Muqeddes Kalam (latin yéziq)

Ayup 20

Zofarmu yamanlarning aqiwiti üstide söz qilidu

Andin Naamatliq Zofar jawaben mundaq dédi: —

«Méni biaram qilghan xiyallar jawab bérishke ündewatidu,

Chünki qelbim biaramliqta örtenmekte. 1

Men manga haqaret keltürüp, méni eyibleydighan sözlerni anglidim,

Shunga méning roh-zéhnim méni jawab bérishke qistidi.

Sen shuni bilmemsenki,

Yer yüzide Adem’atimiz apiride bolghandin béri,

Rezillerning ghalibe tentenisi qisqidur,

Iplaslarning xushalliqi birdemliktur. 2

Undaq kishining shan-sheripi asman’gha yetken bolsimu,

Béshi bulutlargha taqashsimu,

Yenila özining poqidek yoqap kétidu;

Uni körgenler: «U nedidur?» deydu.

U chüshtek uchup kétidu,

Qayta tapqili bolmaydu;

Kéchidiki ghayibane alamettek u heydiwétilidu.

Uni körgen köz ikkinchi uni körmeydu,

Uning turghan jayi uni qayta uchratmaydu.

Uning oghulliri miskinlerge shepqet qilishqa mejburlinidu;

Shuningdek u hetta öz qoli bilen bayliqlirini qayturup béridu.

Uning ustixanliri yashliq maghdurigha tolghan bolsimu,

Biraq uning maghduri uning bilen bille topa-changda yétip qalidu.

Gerche rezillik uning aghzida tatliq tétighan bolsimu,

U uni til astigha yoshurghan bolsimu,

U uni yutqusi kelmey méhrini üzelmisimu,

U uni aghzida qaldursimu, 3

Biraq uning qarnidiki tamiqi özgirip,

Kobra yilanning zehirige aylinidu.

U bayliqlarni yutuwétidu, biraq ularni yanduridu;

Xuda ularni ashqazinidin chiqiriwétidu.

U kobra yilanning zehirini shoraydu,

Char yilanning neshtiri uni öltüridu.

U qaytidin ériq-östenglerge hewes bilen qariyalmaydu,

Bal we sériq may bilen aqidighan deryalardin huzurlinalmaydu.

U érishkenni yutalmay qayturidu,

Tijaret qilghan paydisidin u héch huzurlinalmaydu.

Chünki u miskinlerni ézip, ularni tashliwetken;

U özi salmighan öyni igiliwalghan.

U achközlüktin esla zérikmeydu,

U arzulighan nersiliridin héchqaysisini saqlap qalalmaydu. 4

Uninggha yutuwalghudek héchnerse qalmaydu,

Shunga uning bayashatliqi menggülük bolmaydu.

Uning toqquzi tel bolghanda, tuyuqsiz qisilchiliqqa uchraydu;

Herbir ézilgüchining qoli uninggha qarshi chiqidu.

U qorsiqini toyghuzuwatqinida,

Xuda dehshetlik ghezipini uninggha chüshüridu;

U ghizaliniwatqanda ghezipini uning üstige yaghduridu.

U tömür qoraldin qéchip qutulsimu,

Biraq mis oqya uni sanjiydu.

Tegken oq keynidin tartip chiqiriwalghinida,

Yaltiraq oq uchi öttin chiqiriwalghinida,

Wehimiler uni basidu. 5

Zulmet qarangghuluq uning bayliqlirini yutuwétishke teyyar turidu,

Insan püwlimigen ot uni yutuwalidu,

Uning chédirida qélip qalghanlirinimu yutuwétidu. 6

Asmanlar uning qebihlikini ashkarilaydu;

Yer-zéminmu uninggha qarshi qozghilidu.

Uning mal-dunyasi élip kétilidu,

Xudaning ghezeplik künide kelkün ulghiyip öy-bisatini ghulitidu. 7

Xudaning rezil ademge belgiligen nésiwisi mana shundaqtur,

Bu Xuda uninggha békitken mirastur». 8

Source notes (8)

Footnote ◼ «Méni biaram qilghan xiyallar jawab bérishke ündewatidu, chünki qelbim biaramliqta örtenmekte» — Zofarning bir ishlargha bekmu jiddiyliship kétidighan xaraktéri bu sözliridin chiqip turidu.
Cross-reference ◘ Zeb. 37:35,36
Footnote ◼ «U uni yutqusi kelmey méhrini üzelmisimu,...» — ibraniy tilida «uni ayap méhrini üzelmisimu». Démek, aghzida qalduruwermekchi bolidu. «U uni , yeni rezillikni aghzida qaldursimu...» — Zofarning bu bayani intayin zeherxendilikke tolghan bolup, bu sözler shübhisizki, Ayupni biwasite eyiblesh üchün qaritilidu; u: «rezillik aghzida tatliq tétighan» we «uni til astigha yoshurghan», hem 20-ayettiki «Miskinlerni ézip, ularni tashliwetken», «özi salmighan bir öyni özi igiliwalghan» dep teswirligen kishi del Ayuptin bashqa kishi emes idi.
Footnote ◼ «U achközlüktin esla zérikmeydu» — ibraniy tilida: «Uning ashqazini héch xatirjemlikni bilmeydu». Oqurmenler 22-24-ayetlerning bashqa xil terjimilirini uchritishi mumkin.
Footnote ◼ «Yaltiraq oq uchi öttin chiqiriwalghinida, wehimiler uni basidu» — Zofar yaman ademlerning kelgüsidiki azabliridin bek huzurlinidighandek qilatti.
Footnote ◼ «Insan püwlimigen ot» — Xudaning Özining otini körsetse kérek.
Footnote ◼ «Uning mal-dunyasi élip kétilidu» — yaki «Kelkün öyini éqitip kétidu».
Footnote ◼ «Xudaning rezil ademge belgiligen nésiwisi mana shundaqtur, bu Xuda uninggha békitken mirastur» — Zofarning bayanliri jemleshtürülginide, u dégen «rezil adem» emeliyette töt-besh pütünley bashqa-bashqa yol bilen ölgen!

Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.