Muqeddes Kalam (latin yéziq)
Hoshiya 8
«Ular shamal tériydu, qara quyunni oridu!»
Kanayni aghzinggha salghin!
Perwerdigarning öyi üstide bir qorultaz aylinip yüridu!
Chünki ular Méning ehdemni buzghan,
Tewrat-qanunumgha itaetsizlik qilghan. 1 2
Ular Manga: «I Xudayim, biz Israil xelqi Séni tonuymiz!» dep warqiraydu.
Israil yaxshiliq-méhribanliqni tashliwetken;
Shunga düshmen uni qoghlaydu. 3
Ular özliri padishahlarni tikligen, biraq Men arqiliq emes;
Ular bezilerni emir qilghan, biraq uningdin xewirim yoq;
Ular öz jénigha zamin bolush üchün,
Özlirige butlarni kümüsh-altunliridin yasighan. 4
I Samariye, séning moziying séni tashliwetti!
Méning ghezipim ulargha qozghaldi;
Ular qachan’ghiche pakliqtin yiraq turidu? 5
Shu nerse Israildin chiqqan’ghu —
Uni bir hünerwen yasighan, xalas; u Xuda emes;
Samariyening moziyi derweqe pare-pare chéqiwétilidu!
Chünki ular shamal téridi, shunga qara quyunni oridu!
Ularning shadisida héch bashaqlar yoq, u héch ash bermeydu;
Hetta ash bergen bolsimu, yat ademler uni yutuwalghan bolatti. 6
Israil yutuwélindi;
Ular yat eller arisida yarimas bir qacha bolup qaldi;
Chünki ular yalghuz yürgen yawayi éshektek Asuriyeni izdep chiqti;
Efraim «ashna»larni yalliwaldi.
Gerche ular eller arisidin «yalliwalghan» bolsimu,
Emdi Men ularni yighip bir terep qilimen;
Ular tézla «Emirlerning shahi»ning bésimi astida tolghinip kétidu. 7 8
Efraim «gunah qurbanliq»liri üchün qurban’gahlarni köpeytkini bilen,
Bular gunah qozghaydighan qurban’gahlar bolup qaldi. 9
Men uning üchün Tewrat-qanunumda köp tereplime nersilerni yazghan bolsammu,
Ular yat bir nerse dep hésablanmaqta.
Ular qurbanliqlargha amraq! Ular Manga qurbanliqlarni qilip, göshidin yeydu,
Biraq Perwerdigar bulardin héch xursenlik almaydu;
U ularning qebihlikini hazir ésige keltürüp,
Gunahlirini öz béshigha chüshüridu;
Ular Misirgha qaytidu! 10
Chünki Israil öz Yasighuchisini untup, «ibadetxana»larni quridu;
Yehuda bolsa istihkamlashturulghan sheherlerni köpeytken;
Biraq Men ularning sheherliri üstige ot ewetimen,
Ot bularning qel’e-ordilirini yep kétidu. 11
Source notes (11)
- Footnote ◼ «Perwerdigarning öyi üstide bir qorultaz aylinip yüridu!» — qorultaz peqet ölüklerge yaki «öley dep qalghan» janiwarlargha qiziqidu, elwette (bashqa xil terjimiliride «bürküt» déyilidu).
- Cross-reference ◘ Qan. 28:49; Hosh. 6:7
- Footnote ◼ «Israil yaxshiliq-méhribanliqni tashliwetken» — bu ikki bisliq söz; ular özliri yaxshiliq qilishtin qol üzgen we shuning bilen teng, Xudaning yaxshiliqidin mehrum bolghan.
- Footnote ◼ «Ular özliri padishahlarni tikligen, biraq men arqiliq emes» — «uningdin xewirim yoq» — démek, bu ish Manga yat boldi, Men uni étirap qilmidim.
- Footnote ◼ «I Samariye, séning moziying séni tashliwetti!» — bu kinayilik gep. Israildiki mozay sheklidiki but ularni qutquzmighan. «Baal» we ularning eng chong tawapgahi «Beyt-El»diki butmu «mozay shekli»de idi (bashqa xil terjilirimu bar).
- Footnote ◼ «Ular shamal téridi, shunga qara quyunni oridu! Ularning shadisida héch bashaqlar yoq, u héch ash bermeydu; hetta ash bergen bolsimu, yat ademler uni yutuwalghan bolatti» — Israillar herdaim «Baal»din yaxshi hosul tiletti. Ularning oylishiche «Baal»ning «alahidiliki» «mol hosul bérish»mish.
- Footnote ◼ «Ular tézla «emirlerning shahi»ning bésimi astida tolghinip kétidu» — «emirlerning shahi» Asuriye padishahining mexsus bir unwani.
- Cross-reference ◘ Yesh. 10:8
- Footnote ◼ «Efraim «gunah qurbanliq»liri üchün qurban’gahlarni köpeytkini bilen, bular gunah qozghaydighan qurban’gahlar bolup qaldi» — «gunah qurbanliqi»lar toghruluq «Law.» 4-5-bablarni körüng. Mezkur qurban’gahlarni «Perwerdigargha atap» yasalghanidi. Eslide Xudaning körsetmiliri boyiche Yérusalémdindiki ibadetxanining qurban’gahidin bashqa, Israillarning héchqandaq qurban’gahni yasimasliqi kérek. Derweqe, ular yasalghandin kéyin, tézla butperes tawapgahlargha aylinip qalghanidi.
- Footnote ◼ «Ular qurbanliqlargha amraq! Ular Manga qurbanliqlarni qilip, göshidin yeydu,...» — bu ayetning herxil terjimiliri bolghini bilen, omumiy menisi terjimimizningkidek. «Gunahlirini öz béshigha chüshüridu; ular Misirgha qaytidu!» — Misir Israillar tunji qétimliq esirlikke yaki qulluqqa chüshken jay.
- Cross-reference ◘ 2Tar. 26:10, 27:4, Yesh. 22:9-11, 2Pad. 18:12
Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.