Muqeddes Kalam (latin yéziq)
Hoshiya 14
Israilning kelgüside towa qilishi, qutquzulup eslige keltürülüshi
I Israil, Perwerdigar Xudayingning yénigha ikkilenmey qaytip kel!
Chünki öz qebihliking bilen putliship yiqilghansen. 1
Özünglar bilen bille sözlerni épkélinglar,
Perwerdigarning yénigha qaytinglar;
Uninggha: — «Barliq qebihlikni kechürgeysen,
Shapaet bilen bizni qobul qilghaysen,
Shuning bilen biz Sanga lewlirimizdiki «buqa qurbanliqlar»ni tutimiz — denglar. 2
— «Asuriye bizni qutquzmaydu,
Atlargha minmeymiz;
Biz hergiz öz qolimiz yasighinigha: — «Xudayimiz!» démeymiz;
Chünki Sendinla yétim-yésirlar rehim-shepqet tapidu». 3
— Men ularni «arqigha chékinishliri»din saqaytimen,
Men ularni chin könglümdin xalap söyimen;
Chünki Méning ghezipim uningdin yandi.
Men Israilgha shebnemdek bolimen;
U niluperdek berq uridu,
Yiltizliri Liwan kédir derixidek yiltiz tartidu;
Uning bixliri shaxlap yéyilidu,
Uning güzelliki zeytun derixidek,
Puriqi Liwan kédiriningkidek bolidu.
Xelq qaytip kélip, uning sayisi astida olturidu;
Ular ziraetlerdek yashnaydu,
Üzüm télidek chéchekleydu;
Liwanning sharabliri aghzida qalghandek, éside shérin qalidu. 4
Efraim: «Méning butlar bilen yene néme karim!» — deydighan bolidu.
«Men uninggha jawab bérimen, uningdin xewer alimen!
«Men yapyéshil bir qarighaydurmen».
«Séning méweng Mendindur!» 5
Kim dana bolup, bu ishlarni chüshiner? Chéchen bolup, bularni biler?
Chünki Perwerdigarning yolliri durustur,
Heqqaniylar ularda mangidu;
Biraq itaetsizler ularda putliship yiqilidu. 6
Source notes (6)
- Cross-reference ◘ Hosh. 12:7
- Footnote ◼ «...«buqa qurbanliqlar»ni tutimiz — «buqa qurbanliqlar» Xudagha atap béghishlinidighan «köydürme qurbanliq»lar ichide eng qimmetlik qurbanliq idi. Mushu yerde köchme menide ishletken, elwette. U «lewlirimizdiki mol ibadet-medhiye»ni körsitidu. Bashqa birxil terjimisi: «lewlirimizdiki méwini tutimiz».
- Footnote ◼ «Chünki Sendinla yétim-yésirlar rehim-shepqet tapidu»» — bu söz Hoshiyaning balilirining öz dadisi bilen bolghan kechürmishini eks ettürgen bolidu.
- Footnote ◼ «Liwanning sharabliri aghzida qalghandek, éside shérin qalidu» — ibraniy tilida: «Uning esletmisi Liwandiki sharabningkidek bolidu».
- Footnote ◼ «Efraim: «Méning butlar bilen yene néme karim!» — deydighan bolidu» — bashqa birxil terjimisi: «U (Xuda Efraimgha) «I Efraim, Méning butlar bilen néme alaqem bolsun!» — deydu».
- Cross-reference ◘ Pend. 10:29
Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.