Muqeddes Kalam (latin yéziq)
Hékmet toplighuchi 10
Eqil béridighan bezi hékmetler
Xuddi ölük chiwinler ettarning etirini sésitiwétidighandek, azraqqine exmeqliq tarazida danaliq we izzet-hörmettinmu éghir toxtaydu.
Danaliqning köngli onggha mayil, exmeqningki solgha. 1
Exmeq kishi hetta yolda méngiwatqandimu, uning eqli kem bolghachqa, u exmeq ikenlikini hemmige ayan qilidu.
Hökümdarning sanga achchiqi kelse, ornungdin istépa berme; chünki tinch-sewrichanliq xata-sewenliktin bolghan zor xapiliqni tinchitidu.
Quyash astida yaman bir ishni kördumki, u hökümdardin chiqqan bir xata ishtur — exmeqler yuqiri mensepte, shuning bilen teng baylar pes orunda olturidu; 2 men qullarning atqa min’genlikini, emirlerning qullardek piyade mangghanliqini kördum. 3
Turmushta uchraydighan xeterlerge danaliq kérek
Orini kolighan kishi uninggha yiqilishi mumkin; tamni buzghan kishini yilan chéqishi mumkin; 4 5 tashlarni yötkigen kishi tash teripidin yarilinishi mumkin; otun yaridighan kishi xewpke uchraydu.
Palta gal bolsa, birsi tighini bilimise, paltini küchep chépishqa toghra kélidu; biraq danaliq ademni utuq-muweppeqiyetke érishtüridu.
Yilan oynitilmay turup, yilanchini chaqsa, yilanchigha néme payda? 6
Danishmenler we exmeqlerning ish-sözliri
Dana kishining sözliri shepqetliktur; biraq exmeqning lewliri özini yutidu. Sözlirining béshi exmeqliq, ayighi rezil telwiliktur; emma exmeq yenila gepni köpeytidu. Biraq héchkim kelgüsini bilmeydu; uningdin kéyinki ishlarni kim uninggha éytalisun?
Exmeqler japasi bilen özlirini upritidu; chünki ular hetta sheherge baridighan yolnimu bilmeydu.
Exmeq hökümdarlarning chataqliri
I zémin, padishahing bala bolsa, emirliring seherde ziyapet ötküzse, halinggha way! 7
I zémin, padishahing mötiwerning oghli bolsa we emirliring keyp üchün emes, belki özini quwwetlesh üchün muwapiq waqtida ziyapet ötküzse, bu séning bexting! 8
Yene hékmetler
Hurunluqtin öyning torusi ghulay dep qalidu; qollarning boshluqidin öydin yamghur ötidu.
Ziyapet külke üchün teyyarlinar, sharab hayatni xush qilar; lékin pul hemme ishni hel qilar!
Padishahqa lenet qilma, hetta oyungdimu tillima; hujrangdimu baylarni tillima; chünki asmandiki bir qush awazingni taritidu, bir qanat igisi bu ishni ayan qilidu. 9
Source notes (9)
- Footnote ◼ «Danaliqning köngli onggha mayil» — qoralni tutup, özini qoghdash teripidur.
- Footnote ◼ «exmeqler» — ibraniy tilida «exmeqliq» dep élin’ghan.
- Footnote ◼ «men qullarning atqa min’genlikini... kördum» —Pelestinde kona zamanlarda atqa minish peqet abroyluq kishilergila mensup idi.
- Footnote ◼ «tamni buzghan kishi...» — yaki «chitni buzghan kishi...».
- Cross-reference ◘ Pend. 26:27
- Footnote ◼ «yilanchi» — ney chélip yilanni oynatquchi adem. «yilanchini chaqsa,..» — yaki «xeqni chaqsa...».
- Cross-reference ◘ Yesh. 3:3, 4; Hosh. 13:11; Am. 6:4
- Footnote ◼ «...özini quwetlesh üchün muwapiq waqtida ziyapet ötküzse,...» — yaki, «...özini tutup muwapiq waqtida ziyapet ötküzse,...». «...we emirliring keyp üchün emes... ziyapet ötküzse, bu séning bexting!» — bashqa birxil terjimisi: «...we emirliring mest bolush üchün emes, belki salmaqliq bilen öz waqtida ziyapet ötküzse, bu séning bexting!».
- Cross-reference ◘ Mis. 22:28
Muqeddes Kalam (latin yéziq). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.