Муқеддес Калам (кирил йезиқ)
Вәһий 15
«Йәттә чинә» — ахирқи йәттә балаю-апәт
Асманда зор һәм карамәтлик йәнә бир аламәтни, йәни ахирқи йәттә балаю-апәтни тутуп турған йәттә пәриштини көрдүм (ахирқи балаю-апәт дейилиштики сәвәп, Худаниң ғәзиви булар билән ахирлишиду). 1
Мән йәнә от арилаш әйнәк деңизидәк бир көрүнүшни һәм әйнәк деңизниң үстидә турған, дивә вә униң бут-һәйкили вә наминиң рәқими үстидин ғалип кәлгәнләрни көрдүм. Уларниң қоллирида Худа бәргән чилтарлар болуп, 2 улар Худаниң қул-хизмәткари болған Мусаниң күйини һәм Қозиниң күйини ейтишатти: —
«Улуқ вә карамәт Сениң қилғанлириң,
И Һәммигә Қадир Пәрвәрдигар Худа,
Йоллириң адил вә һәқтур,
И пүткүл әлләрниң Падишаси! 3
И Пәрвәрдигар, ким Сәндин қорқмайдиған,
Намиңни улуқлимайдиған болалисун?
Чүнки бирдин-бир муқәддәс Өзүңдурсән;
Барлиқ әлләр алдиңға келиду,
Саңа сәҗдә қилиду;
Чүнки һәққаний қилғанлириң ашкарә болди». 4 5
Бу ишлардин кейин, мән көрдүмки, мана әрштики ибадәтхана, йәни һөкүм-гувалиқ чедири ечилди! 6 7 Йәттә балаю-апәтни өз илкидә тутқан йәттә пәриштә пакиз, пақирап туридиған либас кийгән, көксигә алтун кәмәр бағлиған һалда ибадәтханидин чиқти. 8 Төрт һаят мәхлуқниң бири йәттә пәриштигә әбәдил-әбәт яшайдиған Худаниң қәһри билән толған йәттә алтун чинини бәрди. Ибадәтхана Худаниң шан-шәриви вә қудритидин түтүн билән лиқ толди. Йәттә пәриштиниң йәттә балаю-апити аяқлашмиғичә, һеч ким ибадәтханиға кирәлмиди. 9 10
Source notes (10)
- Cross-reference ◘ Вәһ. 11:14.
- Cross-reference ◘ Вәһ. 4:6; Мик. 7:18.
- Cross-reference ◘ Зәб. 110:2; 138:14; 144:17.
- Footnote ◼ «Чүнки һәққаний қилғанлириң ашкарә болди» — «һәққаний қилғанлириң» яки «чүнки һәққаний һөкүмлириң ашкарә болди». «мунасивәтлик айәтләр» — «Йәр.» 7:10, «Зәб.» 85:9-10.
- Cross-reference ◘ Зәб. 86:9-10; Йәр. 10:7.
- Footnote ◼ «һөкүм-гувалиқ чедири» — Тәврат дәвридә ибадәт чедири «әһдә сандуғи» һәм униң ичидики «он пәрман»ниң макани болған еди. Бу «он пәрман» Худаниң характери вә пәзиләтлирини көрситидиған болғач, чедир бәзидә «һөкүм-гувалиқ чедири» яки «әһдә-гувалиқ чедири» дәп аталған еди. Әрштики «муқәддәс чедир» униңға охшашла Худаниң тәбиити тоғрилиқ алаһидә гувалиқ бәрсә керәк.
- Cross-reference ◘ Вәһ. 11:19.
- Cross-reference ◘ Вәһ. 1:13.
- Footnote ◼ «мунасивәтлик айәтләр» — «Мис.» 40:34-36, «1Пад.» 8:11-12.
- Cross-reference ◘ Мис. 40:34-36; 1Пад. 8:10-12; Йәш. 6:4.
Муқеддес Калам (кирил йезиқ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.