Муқеддес Калам (кирил йезиқ)

Чөл-баявандики сәпәр 34

Қанаан зимининиң чегараси

Пәрвәрдигар Мусаға сөз қилип мундақ деди: —

Сән Исраилларға сөз қилип мундақ буйруғин: «Силәр Қанаан зиминиға киргән чағда, силәргә мирас болушқа тәқсим қилинидиған зимин Қанаан зимини болиду; зиминниң бекитилгән җай-чегаралири мундақ болиду: —

Силәрниң җәнуп тәрипиңләр Зин чөлидин башлап Едом чегарисиға тақалсун; андин җәнуп тәрәптики чегараңлар «Шор Деңизи»ниң җәнуп тәрипиниң әң айиғиға йәтсун; 1 2 шу йәрдин чегараңлар «Сериқ Ешәк давини»ниң җәнуп тәрипидин бурулуп зинға өтсун; униң айиғи топтоғра Қадәш-Барнеаниң җәнубида болиду; андин у йәрдин йәнә Һазар-Аддарға берип, Азмонға тутишиду; 3 андин чегара Азмондин бурулуп меңип, Мисир еқиниға бариду вә деңизғичә тутишиду.

Күн петиш тәрәптә чегараңлар «Улуқ деңиз»ниң өзи болиду, йәни униң бойлири болиду; мана бу силәрниң күн петиш тәрәптики чегараңлар болиду. 4

Шимал тәрәптики чегараңлар мундақ болиду: — «Улуқ деңиз»дин башлап һор теғиғичә пасил сизилсун; пасил сизиғи Һор теғидин башлап Хамат еғизиға созулуп, андин чегара Зәдадқа туташсун; 5 чегара йәнә Зифронға өтүп Һазар-Енанда ахирлашсун; мана бу силәрниң шималий чегараңлар болиду.

Андин шәрқий чегарайиңларниң пасил сизиғи Һазар-Енандин Шефамғичә сизилсун. Бу чегара Шефамдин Айинниң күн чиқиш тәрипидики Риблаһқа чүшиду; андин чегара шу йәрдин чүшүп Киннәрәт деңизиниң давинидин өтүп күн чиқиш тәрәпкә тутишиду. 6 Андин чегара төвәнләп Иордан дәриясини бойлап чүшүп, Шор Деңизиғичә йәтсун. Мана бу чегаралар билән бекитилгән зиминиңлар болиду».

Муса Исраилларға сөз қилип мундақ дәп буйруди: — «Мана бу Пәрвәрдигар тоққуз қәбилә вә йерим қәбилигә тәқдим қилинсун дәп буйруған, чәк ташлиниш арқилиқ өзүңлар варислиқ қилидиған зиминиңлар болиду; чүнки Рубән қәбилисидикиләр ата җәмәти бойичә вә Гад қәбилисидикиләр ата җәмәти бойичә өз мирасиға аллиқачан варислиқ қилип уни егилигән, Манассәһниң йерим қәбилисиму өз мирасиға варислиқ қилип уни егилигән; Бу икки қәбилә вә йерим қәбилә Йерихониң удулида, Иордан дәриясиниң шәрқий қирғиқидики күн чиқиш тәрәптә өз мираслирини елип болған».

Зиминни тәқсим қилишқа назарәт қилғучи хадимлар

Пәрвәрдигар Мусаға сөз қилип мундақ деди: — Төвәндикиләр зиминни силәргә тәқсим қилип бәргүчиләрниң исимлиғи: — Каһин Әлиазар вә Нунниң оғли Йәшуа. 7 Силәрму йәнә зимин тәқсим қилишқа ярдәмлишиш үчүн һәр қәбилидин бирдин әмир таллап бериңлар.

Буларниң исми мундақ: — Йәһуда қәбилисидин Йәфуннәһниң оғли Каләб. 8 Шимеон қәбилисидикиләрдин Аммиһудниң оғли Шәмуәл. 9 Бинямин қәбилисидин Кислонниң оғли Әлидад. Дан қәбилисидикиләрдин Йоглиниң оғли, әмир Букки еди. Йүсүпниң әвлатлиридин: — Манассәһ қәбилисидикиләрдин Әфодниң оғли әмир Һаннийәл һәм Әфраим қәбилисидикиләрдин Шифтанниң оғли әмир Кәмуәл. Зәбулун қәбилисидикиләрдин Парнақниң оғли әмир Әлизафан; Иссакар қәбилисидикиләрдин Аззанниң оғли әмир Палтийәл; Ашир қәбилисидикиләрдин Шеломиниң оғли әмир Ахиһуд; Нафтали қәбилисидикиләрдин Аммиһудниң оғли әмир Пәдаһәл еди.

Мана булар Пәрвәрдигар әмир қилип Исраилларға Қанаан зиминидики мираслирини тәқсим қилишқа бекиткәнләр еди.

Source notes (9)

Footnote ◼ «Шор Деңизи» — йәнә «Өлүк Деңиз» дәпму атилиду.
Cross-reference ◘ Йә. 15:1
Footnote ◼ «Сериқ Ешәк давини» — ибраний тилида «Акраббим давини».
Footnote ◼ «Улуқ деңиз» — һазир «Оттура деңиз» дәп атилиду.
Footnote ◼ «Хамат еғизи» — яки «Либо-Хаматқа».
Footnote ◼ «Киннәрәт деңизи» — яки «Киннәрәт көли» кейин «Галилийә деңизи», «Тибериус деңизи» дәпму аталған. «Киннәрәт»ниң мәнаси «чилтар» — көлниң шәкли чилтарсимандур.
Cross-reference ◘ Йә. 14:1
Footnote ◼ «Йәһуда Йәһуда қәбилисидин» — яки «Йәһуда қәбилиси үчүн».
Footnote ◼ «Шәмуәл» — яки «Самуил».

Муқеддес Калам (кирил йезиқ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.