Муқеддес Калам (кирил йезиқ)

Һекмәт топлиғучи 1

«Һәммә иш бемәналиқтур!»

Йерусалимда падиша болған, Давутниң оғли «Һекмәт топлиғучи»ниң сөзлири: — 1

«Бемәналиқ үстигә бемәналиқ!» — дәйду «Һекмәт топлиғучи» — «Бемәналиқ үстигә бемәналиқ! Һәммә иш бемәналиқтур!» 2 3

Қуяш астида тартқан җапалиридин инсан немә пайдиға еришәр? 4 5

Бир дәвир өтиду, йәнә бир дәвир келиду;

Бирақ йәр-зимин мәңгүгә давам қилиду; 6

Күн чиқиду, күн патиду;

Вә чиқидиған җайға қарап йәнә алдирап маңиду.

Шамал җәнупқа қарап соқиду;

Андин бурулуп шималға қарап соқиду;

У айлинип-айлинип,

Һәрдайим өз айланма йолиға қайтиду.

Барлиқ дәриялар деңизға қарап ақиду, бирақ деңиз толмайду;

Дәриялар қайси җайға аққан болса,

Улар йәнә шу йәргә қайтиду. 7

Барлиқ ишлар җапаға толғандур;

Уни ейтип түгәткүчи адәм йоқтур;

Көз көрүштин,

Қулақ аңлаштин һәргиз тоймайду.

Болған ишлар йәнә болидиған ишлардур;

Қилған ишлар йәнә қилиниду;

Қуяш астида һеч қандақ йеңилиқ йоқтур. 8

«Мана, бу йеңи иш» дегили болидиған иш барму?

У бәрибир биздин бурунқи дәвирләрдә аллиқачан болуп өткән ишлардур.

Бурунқи ишлар һазир һеч әсләнмәйду;

Вә кәлгүсидә болидиған ишларму улардин кейин яшайдиғанларниң есигә һеч кәлмәйду. 9

Сулайманниң тәҗрибиси

Мәнки һекмәт топлиғучи Йерусалимда Исраилға падиша болғанмән; Мән даналиқ билән асманлар астида барлиқ қилинған ишларни қетирқинип издәшкә көңүл қойдум —

Хуласәм шуки, Худа инсан балилириниң өз-өзини бәнд қилип упритиш үчүн, уларға бу еғир җапани тәқдим қилған! Мән қуяш астидики барлиқ қилинған ишларни көрүп чиқтим, —

Мана, һәммиси бемәналиқ вә шамални қоғлиғандәк иштин ибарәттур.

Әгирни түз қилғили болмас;

Кәмни толуқ дәп саниғили болмас. 10

Мән өз көңлүмдә ойлинип: «Мана, мән улуқлинип, мәндин илгири Йерусалим үстигә барлиқ һөкүм сүргәнләрдин көп даналиққа ериштим; мениң көңлүм нурғун даналиқ вә билимгә еришти» — дедим.

Шуниң билән даналиқни билишкә, шуниңдәк тәлвилик вә әхмиқаниликни билип йетишкә көңүл қойдум; мошу ишниму шамал қоғлиғандәк иш дәп билип йәттим. Чүнки даналиқниң көп болуши билән азап-оқубәтму көп болиду; билимини көпәйткүчиниң дәрд-әлимиму көпийду.

Source notes (10)

Footnote ◼ «Һекмәт топлиғучи» — язғучи өзиниң Сулайман екәнлигини көрситиду. Бу нуқта 16-айәт, 2:7-айәт қатарлиқларда испатлиниду. Китапниң нами әслий ибраний тилида «Қоһәләт» дейилиду, униң мәнаси: «топлиғучи» «рәтлигүчи» дегән мәнада болуп, биз уни «һекмәт топлиғучи» (демәк, «ой-пикирләрни рәтлигүчи») дәп тәрҗимә қилдуқ. Бәзиләр уни йәнә «Тәлим бәргүчи», «Вәз ейтқучи» дәпму тәрҗимә қилиду.
Footnote ◼ «Бемәналиқ үстигә бемәналиқ!» — ибраний тилида «бемәналиқларниң бемәналиғи!». Бу худди «Күйләрниң күй» «әң гөзәл күй» дейилгәнгә охшаштур, «бемәналиқларниң бемәналиғи» бәлким «һаятлиқ аләмдә «әң бемәналиқ иштур!»» дегәнни билдүрүши мүмкин.
Cross-reference ◘ Зәб. 61:10; 143:4
Footnote ◼ «Қуяш астида» — бу «Һекмәт топлиғучи»дики ачқучлуқ сөздур. Язғучиниң баянлириниң көпинчиси «асмандин (Худадин) кәлгән вәһий» билән әмәс, бәлки «қуяш астида» яки «аптап асти»дики көзқараш билән ейтилған. У қәстән шундақ көз-қарашни сөзләйду. «Кириш сөз» вә «қошумчә сөз»имизниму көрүң.
Cross-reference ◘ Топ. 2:22; 3:9
Cross-reference ◘ Зәб. 103:5
Cross-reference ◘ Аюп 38:8, 9, 10; Зәб. 103:8-10
Cross-reference ◘ Топ. 3:15
Footnote ◼ «... кәлгүсидә болидиған ишларму улардин кейин яшайдиғанларниң есигә һеч кәлмәйду» — демәк, йеңи дәвирдә «йеңи» дейилгән бир иш чиққан болса, шу иш әмәлийәттә бурунқи дәвирдләрдә мәвҗут болған иштур. Һазирқи дәвирдикиләр бурунқи дәвирләрни билмәйду яки унтуған, бу ишни «йеңи!» дәйду.
Footnote ◼ «... толуқ дәп саниғили болмас» — демәк, тәминлигили болмас.

Муқеддес Калам (кирил йезиқ). Copyright © 2010 Mukeddes Kalam - Uyghur Bible Translation Committee. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-10-25.