Nehemiya 3

A suwisa ta̱ Ukari wa̱ Urishelima

1Apa cine a suwisai ukari'i u lyuci wa̱ Urishelima. Eliyashi ganu gbain oɓolo na̱ a̱za̱ a̱ yi nan ganu a̱ 'yon ta̱ a suwa Una̱ntsu wi Ikyon. A̱vu a̱ shuwa̱a̱ yi na̱ntsu, reve a tawai. Reve waru a suwisa ukari'i a̱vu a tawai diga o usaa wu Uga'an u na u rawai Ukpaku a̱ tyo o usaa wu Uga'an wa Hanane. 2Reve ama a̱ Jeriko e teme usaa wu ukari'i diga uba̱ta̱ u na Eliyashi isawain. A̱vu Zaku ulobo wa Imri u lyuwa elime nu usaa wu ukari'i diga uba̱ta̱ u na ama a̱ Jeriko e isawain.

3Olobo a Hasena ele ɗa a suwai Una̱ntsu u Magula. Reve a̱ shuwa̱ akpata a̱ nge'en a̱ yi na̱ na̱ntsu va̱ yi, na̱ katsuwata va̱ yi na̱ rumu va̱ yi. 4Reve Meremo ulobo wa Uriya mawun ma tsukaya ma Hako, teme ulapulu diga uba̱ta̱ u na olobo a Hasena e isawain nu usaa u le. Reve Meshulam ulobo wa Berekiya mawun ma tsukaya ma Meshezabe teme ulapulu wu ukari'i diga uba̱ta̱ u na Meshulam isawain. Reve Zadok ulobo wa Bana teme ulapulu wu ukari'i diga uba̱ta̱ u na Meshulam isawain. 5Reve ama a Tekowa e teme ulapulu wu ukari'i diga uba̱ta̱ u na Zadok isawain. Amma azagbain e le a 'yuwan ta̱ a zuwa e ekere e le o ulinga u na azagbain e le a zuwai.

6Joyada ulobo wa Paseya na̱ Meshulam ulobo wa Besodeya ele ɗa a lapulai Una̱ntsu wa Joyada1. A̱ shuwa̱ ta̱ akpata a̱ nge'en a̱ yi reve a shuwa̱ na̱ntsu va̱ yi na̱ katsuwata ni irumu ya̱ yi. 7Melatiya vuma va Gibiyon na̱ Yadon vuma va Merono oɓolo na̱ vuma va Gibiyon na̱ za va Mizfa, aza a na a̱ ri za̱la̱ tsugbain tsa gwamna vu upasu wu Uɗolu wa̱ Yufiriti, reve e teme ulapulu wu ukari'i diga uba̱ta̱ u na Joyada na̱ Meshulam e isawain. 8Reve Uziye ulobo wa Hahaya za na ri maruma ma zinariya, me teme ulapulu wu ukari'i diga uba̱ta̱ wa ama a na a̱ ri za̱la̱ tsugbain tsa gwamna tsa̱ e isawain. Hananiya za na aa yuwusan aturare u teme ta̱ ulapulu wu ukari'i diga uba̱tu u na Uziye isawain. Reve ama'a a suwisa ukari wa̱ Urishelima hali a cina ukari u Washin. 9Refaya ulobo wa Hur za tsugbain vu uɓatsulai wu upasu wi iɗa wa̱ Urishelima u teme ta̱ ulapulu wu ukari'i diga uba̱ta̱ u na Hananiya isawain. 10Yedaya ulobo Haruma, u teme ta̱ ulapulu wu ukari'i za na ri elime o u'wa wa̱ yi, diga uba̱ta̱ u na Refaya isawain. Hatush ulobo wa Hashaneya teme ta̱ ulapulu wu ukari'i diga uba̱ta̱ u na Yedaya isawain. 11Reve Malkiya ulobo wa Harim na̱ Hashu ulobo wa Paha Mowa a lapula upasu u ro wu ukari'i oɓolo nu Usaa wu Uga'an wu uzuwusun wo Opopofu. 12Shalum ulobo wa Haloheshi, zagbain vu uɓatsulai wu upasu u ro wa̱ Urishelima, u teme ta̱ ulapulu wu ukari'i diga uba̱ta̱ u na Malkiya na̱ Hashu e isawain. Waru muwun ma̱ esheli a̱yi a kamba a̱ yi ta̱ ulinga'a.

13Reve Hanun oɓolo na aza a na a̱ ri nden Zanowa a lapula Una̱ntsu wu Uka̱ri. A suwisa yi ta̱ reve a̱ shuwa̱ na̱ntsu va̱ yi, na̱ katsuwata ni irumu ya̱ yi. Reve fo a lapula ukari wu uga'an za na rawai udasuwu ukpakukupa na̱ ukpaku uton (1,500) diga uba̱ta̱ o Una̱ntsu wa̱ A̱ka̱ri hali acina Una̱ntsu we Edemu.

14Malkiya ulobo wa Rekab, zagbain vu upasu wa Bet Hakerem, u lapula ta̱ Una̱ntsu we Edemu. Reve u suwisa yi, a̱vu u shuwa̱ na̱ntsu va̱ yi, na̱ katsuwata ni irumu ya̱ yi.

15Reve Shalum ulobo wa Kohoze, zagbain vu upasu wa Mizfa u lapula Una̱ntsu u Lyusu Mini. Reve u suwisa yi a̱vu u ku'wa̱ yi. Reve u shuwa̱ na̱ntsu va̱ yi na̱ katsuwata va̱ yi ni irumu ya̱ yi. Waru u lapula ta̱ ukari wa Aabata a Shela, za na a̱ yi ɗa Siluwan za va̱ a̱a̱rumbu o mogono, hali a rawa o udasata a̱ cipa̱ diga a̱ Lyuci va Da̱wuda. 16Nehemiya ulobo wa Azabu, zagbain wu upasu wu uɓatsulai wa Bet Zur, u teme ta̱ ulapulu wu ukari'i diga uba̱ta̱ u na Shalum isawain. U yuwan ta̱ ulapulu hali acina aason a̱ Da̱wuda, uba̱ta̱ u na a̱ ka̱pa̱i aabata, waru nu uba̱ta̱ wu 'wa u nan yali ya̱ a̱soja.

Nan Levi a na a yuwain ulapulu wu ukari

17Ele nda ele ɗa nan Levi a na e temei ulapulu wu ukari'i diga uba̱ta̱ u na Nehemiya isawain. Rehum ulobo wa Bani ɗa farai ulapulu wu ukari'i. Reve Hashabiya zagbain vu upasu wu uɓatsulai wa Kayila u teme ulapulu wu ukari'i diga uba̱ta̱ u na Rehum isawain. 18Apa ala a̱za̱ le aza a na a kamba n le ulapulu wu ukari'i. Binuyi ulobo wa Henada, zagbain vu upasu uta̱ wu uɓatsulai wa Kayila, u teme ta̱ ulapulu wu ukari'i diga uba̱ta̱ u na Hashabiya isawain. 19Eze ulobo wa Jesuwa, zagbain vu upasu wa Mizfa, u teme ta̱ ulapulu wu upasu u ro wu ukari'i diga uba̱ta̱ u na Binuyi isawain. A̱yi nda upasu u ro u ɗa a na u ka̱ra̱i a̱ tyo uba̱ta̱ wa asula e izuwa yi itana yu uvon uba̱ta̱ u na ukari'i u konzo yi. 20Za na toni niyi a̱yi ɗa Baruk ulobo wa Zakai, u teme ta̱ ulapulu wu ukari'i upasu u na u konzoi, diga uba̱ta̱ u na Eze isawain. Waru u lapula ta̱ hali acina una̱ntsu wu u'wa wa Eliyashi ganu gbain. 21Meremo ulobo wa Uriya, mawun ma tsukaya ma Hako, u teme ta̱ ulapulu wu upasu u ro wu ukari'i diga uba̱ta̱ u na Baruk isawain, hali acina upasu wu u'wa wa Eliyashi.

22Nan ganu a na o uta̱i diga uba̱ta̱ u na u ri uka̱nda̱ruwu na̱ Urishelima e temei ulapulu wu ukari'i diga uba̱ta̱ u na Meremo isawain. 23Banyami na̱ Hashu e teme ta̱ ulapulu wu ukari'i za na ri elime o u'wa u le, diga uba̱ta̱ u na nan ganu'u e isawain. Azariya ulobo wa Maseya mawun ma tsukaya ma Ananiya, ma̱ teme ta̱ ulapulu wu ukari'i zana ri zuzu nu u'wa wa̱ yi diga uba̱ta̱ u na Banyami na̱ Hashu e isawain. 24Binuyi ulobo wa Henada teme ta̱ ulapulu wu ukari'i diga uba̱ta̱ u na Azariya isawain zuzu nu u'wa wa̱ yi acina uba̱ta̱ u na ukari'i u konzoi. 25Reve Fala ulobo wa Uzai teme ulapulu wu ukari'i elime uba̱ta̱ u na ukari'i u konzoi a̱ tyo uba̱ta̱ wu usaa wu uga'an wu u'wa u mogono a agalaci wu upasu wa̱ a̱za̱ e ipiri. Fedaya ulobo wa Parosh u teme ta̱ ulapulu wu ukari'i diga uba̱ta̱ u na Fala isawain. 26Fedaya yuwan ta̱ ulinga oɓolo na̱ ozo o ulinga wu A̱a̱'isa̱mapaɗa aza a na a̱ da̱na̱i na̱ nden aagaɗi a Ofe. Reve a yuwan ulapulu wu ukari'i hali a rawa elime o Una̱ntsu u Mini za na ri asana, oɓolo nu usaa wu uga'an za na ri mishin zuzu nu ukari'i.

27Ama a Tekowa e teme ta̱ ulapulu wu upasu u ro wu ukari'i diga uba̱ta̱ u na Fedaya isawain uba̱ta̱ o usaa u gbain wu uga'an hali a rawa o ukari wa aagaɗi a Ofe.

28Diga o Una̱ntsu wi Ido, nan ganu a ɗa a lapulai ukari'i koyan ɗa a̱ ma̱ka̱ka̱n mo u'wa wa̱ yi. 29Zadok ulobo wa Ima u teme ta̱ ulapulu wu ukari'i diga uba̱ta̱ u na nan ganu e isawain. U lapula ta̱ upasu wu ukari'i u na u ri elime o u'wa wa̱ yi. Reve Shemaya ulobo wa Shekaniya za vi ipiri vu Una̱ntsu wa Asana u lapula ukari'i diga uba̱ta̱ u na Zadok isawain. 30Reve Hananiya ulobo wa Shelemiya na̱ Hanun ulobo wa̱ ta̱li wa Zala e teme ulapulu wu ukari'i diga uba̱ta̱ u na Shemaya isawain. Meshulam ulobo wa Berekiya u teme ta̱ ulapulu wu ukari'i diga uba̱ta̱ u na Hananiya na̱ Hanun e isawain. U lapula ta̱ upasu wu ukari u na u ri elime o u'wa wa̱ yi. 31Malkiya za ta̱ diga a̱tsuma̱ a nruma n zinariya, me teme ta̱ ulapulu wu ukari'i diga uba̱ta̱ u na Meshulam isawain. U lapula ta̱ ukari'i hali acina uba̱ta̱ wa̱ ozo o ulinga wa̱ A̱a̱'isa̱mapaɗa oɓolo na aza atsulu na a wini, za na da̱na̱i elime o Una̱ntsu wi iɓolo, zuzu na asula a na a̱ ri zuva vu ukari'i uba̱ta̱ u na ukari'i u konzoi. 32Reve aruma a zinariya na aza a atsulu na awini e teme ulapulu wu ukari'i diga uba̱ta̱ u na Malkiya isawain. A̱vu a lapula upasu wu ukosu wu ukari'i hali a cina Una̱ntsu wi Ikyon.