Uge'etosu

Uge'etosu

A̱za̱ o Uge'etosu

Ucuɗuwu wa Aatagada a nda

Aatagada a nda alabari a ɗa wa azagbain, a wawi a̱za̱ o uge'etosu wu gundo va aza a Isra'ila, waru u to rocosu a na A̱sula̱ a̱yi a̱ nde'en a̱yi ɗa Zagbain Wawi va amayun. A Tsunasara na̱ Tsugana awawi'i e ɗe le ta̱ <<a̱za̱ o uge'etosu,>> amma ele azagbain a ɗa a̱ shi la̱nga̱ a nna A̱sulazuva a ɗangulai adama a kamba a wawa gundo va aza a Isra'ila. Ulinga wa azagbai'in a̱yi ɗa o rono ama aɗanga a mantsa mo uvon, a mantsa mo ro waru gba a̱ tsu ge'eto ta̱ mawasan ma na ma̱ ri a̱tsuma̱ a ama. Mantsa na̱ a̱bunda̱ aza a Isra'ila a̱ kuru wila̱ wa̱ A̱sula̱ shi, reve gba A̱sulazuva a̱ lyunguwa̱ le na̱ n'yuwatan a ca le a̱tsuma̱lima̱. Reve na aza a Isra'ila e ɗe A̱sulazuva u kamba le. A̱sula̱ a̱ tsu lyungu ta̱ za vi iwawi na aa kamba le a lyuwa aci a n'yuwatan n le. Agba na̱ wawi'i u kuwa̱, reve ama'a a vadalisa a lyawa A̱sulazuva. A̱tsuma̱ a Aatagada a nda alabari a nda a ka̱mbusa̱ ta̱ kuci. Aatagada a nda a fara ta̱ a mantsa ma na Isra'ila usai iɗa ya ka'ana amma na̱ a̱ca̱pa̱ cina Josuwa kuwa̱. Aatagada a nda a ca ta̱ alabari vu unusu mantsa kafu mogono mo ufaru ma aza a Isra'ila. Ili i gbain i na u lobonoi e reve a̱yi ɗa a wawi'i a a yuwan tsugbain tsimiɗa'a suru tso mogono shi. Amma o rono ta̱ ama aɗanga a̱ mgbain n ro la̱nga̱. Waru a mantsa mo ro wawi ko zagbain ko za vu uge'etosu'u u rono ta̱ ama a̱ yi aɗanga a mantsa ma̱ ta̱ ma na wawi ro ronoi ama aɗanga a̱ mɓa̱nga̱ n ro ko'o. Mantsa ma Japuta na̱ Samuso a̱yi ɗa iroci yi ili i na aa dansa. Adanshi a gbain a aatagada'a a̱yi nden n tsipere ni iwuya a̱tsuma̱ a ama a̱ A̱sula̱ no oforo adama o unusu u le u tsu zuwa le le ta̱ a zami tsugbain tsa na A̱sulazuva goon zuwai. Idanshi i gbain ele ɗa, <<A mantsa mo ndolo, aza a Isra'ila a̱ shi na̱ mogono ne'e shi, adama o ndolo vuma suru yuwusan ta̱ ili i na we enei mejege ma ɗa a majiyan ma̱ yi.>>

Ili i na i ri pe a̱tsuma̱ a aatagada a nda

A̱ kuɗa̱i a lyuwa iɗa ya Ka'ana nu uvon na awawi a na A̱sula̱ a ɗangulai 1:1-3:6

Alabari a̱ a̱za̱ o uge'etosu na azagbain ko awawi a Isra'ila 3:7-16:32

Otiniye 3:7-11

Ehud 3:12-30

Shamga 3:31

Debora na̱ Barak 4:1-5:31

Gidiyon nu ulobo wa̱ yi Abimele 6:1-9:57

Tola na̱ Jayi 10:1-5

Jeputa 10:6-12:7

Ibuzan na̱ Elon na̱ Abadon 12:8-15

Samuso 13:1 16:31

Alabari adama a tsushakala tsu ugundo wa Dan 17:1-18:31

Alabari adama o unusu wu ugundo wa Banyami 19:1-21:25