Ishaya

Ishaya

Ishaya

Ucuɗuwu wa aatagada a nda

Aatagada a Ishaya a̱ tsura̱ aala diga uba̱ta̱ u vumava̱sula̱ o ro a ɗa a na a yuwain wuma a mantsa ma a'wan ukpakukupa kunla̱ (800) kafu a matsan Yesu. A ta gura ne'eshe aatagada'a ba̱ta̱ ta'atsu tsunda.

1) A̱ɗiva̱ 1-39 u ta̱ a ɗa o tsugono tsa Yahuda vu upasu wa̱ na̱shi e iɗa ya Isra'ila. A mantsa'a, Yahuda ta̱ tsura̱sa̱ izami yi nla̱ngi diga e iɗa i ro i na i ri nu ucira za va aala Asuriya. Ishaya ene ta̱ udamu wa Yahuda nu ucira wa Asuriya goon ɗa shi, amma a̱ba̱jini o udamu a̱ yi ɗa unusu wi iɗa'a nu ulambu u tsutoni tsa̱ yi na̱ A̱sula̱, oɓolo nu ulambu u mazuwa mo okolo e le uba̱ta̱ wa̱ yi. A̱tsuma̱ adanshi a̱ yi vumava̱sula̱'a̱ u yuwan ta̱ ulinga ni idanshi yi iroci, adama u rono ugbozu wa ama e iɗa'a na azagbain e le a na a yuwan wa̱ a̱ɓula̱ oɓolo nu uge'etosu wa amayun. U rono le ta̱ atsuvu adansa, ulambu u tsutoni na adanshi a̱ A̱sula̱ u ta̱ ta̱wa̱ le nu ukototosu na atakaci. Ishaya yuwan ta̱ adanshi e ikaka adama a mantsa ma na za ro diga o ugundo wa̱ Da̱wuda a̱ ta̱wa̱ na o'wo mogono ma amayun.

2) A̱ɗiva̱ 40-55 a̱ ta̱ a ɗa a mantsa ma na ama na̱ a̱bunda̱ a̱ ri e iɗa i tsugbashi a Babila. Uba̱ta̱'a̱ o uta̱ ta̱ okolo nu ulambu u wuma. Vumava̱sula̱'a̱ u yuwan ta̱ adanshi e ikaka adansa, A̱sula̱ a ta wawa ama a̱ yi reve u ka̱mba̱to le o u'wa a̱tsuma̱ a̱ Urishelima adama a fara wuma usa'avu. A̱ba̱jini adanshi a̱tsuma̱ a̱ɗiva̱ a nda a̱ yi ɗa, A̱sula̱ A̱sulazuva alabari a ɗa, ucira wa̱ yi e ekere a ama a̱ yi u ta̱ uba̱ta̱ wu ulinga wa alajiya adanshi A̱sulazuva e ekere a nɗa suru, aza a na a̱ tsura̱ aba'un adama aza a Isra'ila. Pasu na yuwain adanshi adama <<Aagbashi A̱sulazuva>> a̱ ta̱ pe a̱tsuma̱ o uguzu wa akuci a nzuwulai a na a la'a revei.

3) A̱ɗiva̱ 56-66 a̱ ta̱ a ɗa alabari ama a na a̱ ka̱mba̱i Urishelima ɗa, waru a ta adanshi a na A̱sula̱ a̱ ta̱ shiton nzuwulai ma̱ yi e ekere a ama a̱ yi. A̱ ka̱mbuwa̱ ta̱ ugbozu a mayan mo ulinga wa̱ a̱ɓula̱, nu uge'etosu wa amayun, oɓolo na̱ tsutoni nu Urana u Wivuwun wa Ajuma, na̱ mayan ma̱ kucci oɓolo na̱ avasa. Upasu u ro a̱tsuma̱ a aatagada'a na ri ulobonu fo a̱ yi ɗa 61:1-2, e le idanshi i na Yesu yuwain adanshi na̱ le a mantsa ma na u revetyoi aciya̱yi alanga eteshe adama u roco a na e ɗe niyi adama a̱ga̱nda̱.

Ili i na i ri pe a̱tsuma̱ a aatagada a nda

Morono ma atsuvu na̱ nzuwulai 1:1-12:6

Oforo a nɗa 13:1-23:18

Uge'etosu wa̱ A̱sula̱ a aci a nɗa 24:1-27:13

Uda̱shiwu u mo rono ma atsuvu na̱ nzuwulai 28:1-35:10

Mogono Hezekiya va Yahuda na̱ Asuriya 36:1-39:8

Ikaka yi isa'ani na̱ mazuwa mo okolo 40:1-55:13

Morono ma atsuvu na̱ nzuwulai 56:1-66:24.