Ufaru

Ufaru

Ufaru

Ucuɗuwu wa aatagada a nda

Ana A̱sula̱ o kotoi mayan mo uvaɗi na̱ vuma vu ufaru na̱ ka vu ufaru, reve wo o'wo ili i na A̱sula̱ a yuwain biti a̱ da̱na̱ ta̱ ulobonu lon. Ele ama e re'e, Ada̱mu na̱ Hawa, a 'yuwan ta̱ a yuwan tsutoni na̱ A̱sula̱ ɗaɗa a̱ ta̱wa̱yi uvaɗi ni iwuya. Ama o o'wo ta̱ a̱za̱ o unusu hali A̱sula̱ a yuwan ifoɓi i na u lyunguyi na̱ a̱ba̱jini e iro'i tsa̱ra̱ wu una vuma suru a̱tsuma̱ o uvaɗi she Nuhu na̱ ka va̱ yi na̱ muwun ma̱ yi. Ele ɗa ama a na a yuwayin A̱sula̱ tsutoni o ure u sa'ani, adama o ndolo a ɗa A̱sula̱ a damma nle a yuwaan aciyele a̱ba̱jini a wantsun, reve a zami inama yu una icu'un icu'un aza a gbagbain na aza a wawa'a adama a zuwa le pe. Ana o kotoi a̱ba̱jini e iro'i o ndolo ama a baza ta̱ a̱tsuma̱ o uvaɗi, reve ama na̱ a̱bunda̱ a 'yuwan a yuwusaan A̱sula̱ a wuma a̱ga̱nda̱.

A̱vu A̱sula̱ a ɗangwa Aburam na̱ ka va̱ yi oɓolo na̱ muwun ma̱ yi tsa̱ra̱ o o'wo ama a̱ yi. Reve u ca le ala a sa'avu, reve o o'wo Ibrahim na̱ Saratu. A̱sula̱ a yuwaan ta̱ ka'a nzuwulai n na waa ca yi mawun, waru she na u kutsai lon ɗaɗa adanshi o ndolo a shiwain. Adanshi na̱ a̱bunda̱ o ta̱ lo adama o ugundo wa Ibrahim, na̱ cine ili i farai hali she mantsa ma na mawun ma̱ ta̱ a̱tsuma̱ o ugundo wa̱ yi wo o'woi vuma gbain a̱tsuma̱ e iɗa ya Masar. Vuma ndolo a̱yi ɗa a̱ tsu ɗe Isuhu.

Aatagada o Ufaru o rito ta̱ a̱ba̱jini a̱ba̱jini e ili i ta'atsu aza a amayun. Ili yu ufaru, A̱sula̱ a ɗa a yuwain ili suru, a̱yi ɗa waru woo goloɓuso ili suru, a̱yi ɗa waru u cayi ili suru wuma. Ili i ire, A̱sula̱ a ciga ta̱ ama a yuwan wuma u sa'ani reve waru a yuwaan yi a̱ga̱nda̱ cine u dammai a yuwaan yi. Ili i ta'atsu, u rito ta̱ a na A̱sula̱ a tsu vadala nzuwulai ma̱ yi shi. Na̱ A̱sula̱ a̱ usu a na waa yuwan ili i ro, waa vadala shi ko ke'en amma u to shiton cine u dammai.

Ili i na i ri pe a̱tsuma̱ a aatagada a nda

Ununa a yuwain uvaɗi 1:1; 2:3

A̱a̱rumbu a Adini 2:7; 3:23

3. Ka̱yinu na̱ Habila 4:1; 5:31

Nuhu 6:9; 9:29

Diga ya̱ Nuhu a̱ tyo ya Aburam 11:1; 32

Aburam na̱ Lutu 12:1; 19:26

Aburam o'wo ta̱ Ibrahim 15:1-6; 16:1-16; 19:1-24

Ishiyaku 21:1; 25:20

Yakubu na̱ Isuwa 25:21; 27:36

Yakubu o'wo ta̱ Isra'ila 28:1; 35:12

A wina ta̱ Isuhu tsa aagbashi 35:22; 37:36

Isuhu wawa ta̱ ama a̱ yi 41:15; 45:11.