Mota̱a̱

Mota̱a̱

Mota̱a̱

Ucuɗuwu wa aatagada a nda

Aala Mota̱a̱ urevu wa̱ yi u ɗa <<uka̱ru>>, waru u ta yuwusan adanshi e ili i na i la'ai a̱tsuma̱ a alabari a wuma wa aza a Isra'ila a na a yuwain a̱tsuma̱ a aatagada, ulyawu u na aza a Isra'ila a lyawai Masar iɗa i na a̱ da̱na̱i agbashi.

A̱tsuma̱ a aza a Isra'ila Musa ɗa da̱na̱i zagbain. Dada va̱ yi na̱ mma va̱ yi agbashi a ɗa a̱ da̱na̱i a̱tsuma̱ e iɗa ya Masar. A mantsa ma na a matsain Musa, za tsugono tsa Masar shi ta̱ ciga o una muwun mo olobo ma aza a Isra'ila, agba reve A̱sula̱ a wawa Musa diga o ukwa̱. Reve u foɓo cine Musa kungwai a̱tsuma̱ o u'wa u mogono. Ɗe elime reve Musa tara ama a Isra'ila o uta̱ a̱tsuma̱ e iɗa ya Masar na̱ linga gbagbain na rocoi ucira wa̱ A̱sula̱.

A̱vu Musa fara a tarasa ama a Isra'ila a̱ tyo e iɗa i na A̱sula̱ a yuwain nzuwulai n na waa ca le. A̱tsuma̱ a mmalu, reve u kumba masasan tsa̱ra̱ u ushi Wila̱ Kupa diga e ekere a̱ A̱sula̱. Ana u kumbai ɗe, reve ama a wasan A̱sula̱ a amayun, a̱vu a yuwaan a̱ma̱li a̱ga̱nda̱. Adama o unusu u nda u ɗa A̱sula̱ a zuwai aza a Isra'ila a yuwain mmalu a̱tsuma̱ o ogozo a'wan amunga.

E ne'eshen ta̱ aatagada a nda ba̱ta̱ na̱shi: 1. Mmaci ma Ibrahim mo o'wo ta̱ fa̱a̱n a tsugbashi, 2. Mmalu n le a̱ tyo a Masasan ma Sinai, 3. Akucunu a̱ A̱sula̱ na ama a̱ yi a Sinai, ili i na i ca nle wila̱ a wuma na̱ wa ama na̱ za va̱ a̱dini. 4 Usaa nu ulapulu wu uba̱ta̱ wa̱ a̱ga̱nda̱ adama a aza a Isra'ila na̱ wila̱ adama a nan ganu na̱ a̱ga̱nda̱ a̱ A̱sula̱. Ili i na i la'ai suru suru a̱yi ɗa aatagada a nda u roco ta̱ cine A̱sula̱ a lyawai ama a̱ yi a na a̱ ri a tsugbashi fa̱a̱n, reve u ka̱mba̱to le iɗa nu uzuwu wo okolo adama e elime. Vuma na ri e memere a̱tsuma̱ a aatagada a nda a̱yi ɗa Musa.