2 Alabari 26

Uziya Mogono ma Yahuda

(2 Ngo 14:21-22; 15:1-7)

1A̱vu ama a Yahuda suru a tara Uziya, za na da̱na̱i na a'wan kupa na̱ a̱za̱ a̱ ta̱li, a̱vu o o'woto yi mogono o una̱ wa dada va̱ yi Amaziya. 2A̱yi ɗa u suwai lyuci va Ela a̱vu u ka̱mbuwa̱i iɗa ya Yahuda cina Amaziya kuwa̱.

3Uziya da̱na̱ ta̱ na a'wan kupa na̱ a̱za̱ a̱ ta̱li a mantsa ma na wo o'woi mogono, a̱vu u yuwan tsugono tsa̱ Urishelima a'wan kupoton ne ejere. Aala a mma va̱ a̱yi ɗa Yekoliya za va Urishelima. 4U yuwan ta̱ ili i na i ri mejege e ekere A̱sulazuva, cine dada va̱ yi Amaziya yuwain. 5A̱vu u ca aciya̱yi uba̱ta̱ wa̱ A̱sula̱ a rana va Zakariya, za na roco niyi ure u na wa uwwa wovon wa̱ A̱sula̱. Ana gba u zamiyi A̱sulazuva, A̱sula̱ a ca yi ta̱ ulyuwu we elime.

6A̱vu u yuwan uvon na aza a Filistiya a̱vu u kototo kari vi ilyuci va Gat na̱ Yabine na aza a Ashido. A̱vu u suwisa ilyuci zuzu na̱ lyuci va Ashido na akapi a̱ ba̱ta̱ ro a̱tsuma̱ aza a Filistiya. 7A̱sula̱ a kamba yi ta̱ u lyuwa a aci e ekere aza a Filistiya na̱ Araba na aza a na a̱ ri na̱ nden a̱tsuma̱ e ilyuci ya Gur Ba'al na̱ Mewune. 8Aza a Amon a̱ ta̱wusa̱ ta̱ nu utafa u le uba̱ta̱ wa Uziya, waru u yuwan ta̱ aala hali a rawa upasu wi iɗa ya Masar, adama a na u yuwan ta̱ ucira lon.

9Suru na̱ ne, Uziya suwa ta̱ atsura na̱ a̱bunda̱ a̱tsuma̱ a̱ Urishelima o Uwata wu Mɓa̱nga̱ nu Uwata vu Uka̱ri nu uga'asatan wu uɓaɓu, a̱vu waru u da̱shi le ucira. 10Waru u suwa ta̱ atsura a̱tsumona waru u ka̱pa̱ ta̱ oko'o na̱ a̱bunda̱, adama a na u ri na̱ iliyamunga lon e iɗa i mugaɗi na a agalaci. U da̱na̱ ta̱ na acimbi na aza a na e idanasa yi uɗuma̱ wa ataci a̱ inabi na ri agalaci nu uɗuma̱ wu umili u na u tsu casu yi itana yu uɗuma̱ na̱ a̱bunda̱ lon, adama a na a̱yi za na cigai cimba lon ɗa.

11Uziya da̱na̱ na̱ a̱soja na a gurai uvon lon, a̱da̱na̱ ta̱ lo ufoɓu u na o uta̱ oɓolo oɓolo o una̱ wa̱ a̱bunda̱ le cine Jeyiye za vi iɗana na̱ Ma'aseya zagbain va a̱soja e kece nle, cine Hananiya za ta̱ a̱tsuma̱ azagbain o mogono damma nle. 12A̱bunda̱ azagbain a 'wa va ali o uvo'on ele ɗa ama ukpakukupa ure na̱ ukpakuta̱li (2,600). 13Za̱la̱ tsugbain tsa̱ le a̱da̱na̱ ta̱ na̱ a̱soja ukpakukupa uta'atsu na̱ a̱za̱ a̱ cindere na̱ ukpakuton (307,500) aza a na a̱ ri ufoɓu adama o uvon, o oɓolo o ucira waru na ri ufoɓu adama a na a kamba mogono e ekere a n'yuwatan ma̱ a̱yi. 14Uziya gba foɓoo ta̱ a̱soja a̱yi a̱ra̱ga̱ ni ibata na̱ melezu ma̱ rumu na̱ a̱tugu a̱ rumu nu utan ni iliya na̱ atali a̱bitsutsu. 15A̱tsuma̱ a̱ Urishelima a yuwan ta̱ ili makumba aza a na ama o urevu o foɓoi, a zuwa le ta̱ zuva va atsura na̱ mɓa̱nga̱, adama a na a̱ ni'wa̱n utan na atali a gbagbain. Aala a̱yi e isawan zuzu shi, adama a na u tsura̱ ta̱ ikambishi lon hali she na u yuwain ucira lon.

16Amma a mantsa ma na Uziya yuwain u ucira lon, a̱vu uvaɗu wa̱ yi u ta̱wa̱a̱ yi na̱ a̱risa̱. Waru u da̱na̱ na̱ a̱ɓula̱ uba̱ta̱ wa̱ A̱sulazuva A̱sula̱ a̱yi shi, hali u uwa a̱tsuma̱ A̱a̱'isamapaɗa a̱ A̱sulazuva na wa̱ kuloto ili i ma̱guru a masa'a ma na a̱ tsu kuloto ili i ma̱guru. 17A̱vu Azariya ganu na̱ nan ganu kupa kunla̱ a̱za̱ a̱ A̱sulazuva a̱za̱ o ugbamu wo okolo o toni yi. 18A̱vu a cina yi a damma yi, <<U ri mejege shi, mogono Uziya, na va̱ kuloto ili i ma̱guru uba̱ta̱ wa̱ A̱sulazuva shi. A̱yi nda ulinga u nan ganu ɗa ugundo wa Haruna, aza a na a tawai na a yuwan ukula̱tosu wi ili i ma̱guru. Vu lyawa a̱a̱'isa̱ a nda, adama a na vu yuwan ta̱ ulambu wa̱ a̱ɓula̱, waru A̱sulazuva A̱sula̱ a buwa da̱shi ca wu tsugbain shi.>>

19Amma Uziya za na da̱na̱i lo mishin na̱ mataɗa ufoɓu na wa ca ukula̱tosu wi ili i ma̱guru yuwan upan. A mantsa ma na u da̱na̱i o upan na̱ nan ganu elime a masa'a mo ukula̱tosu wi ili i ma̱guru a̱vu mɓa̱la̱ mu ukutu mu uta̱i a̱ cin elime a nan ganu a̱tsuma̱ A̱a̱'isamapaɗa A̱sulazuva. 20Ana Azariya ganu gbain na̱ nan ganu suru a̱ ka̱lyuwa̱ niyi, a̱vu e ene u ta̱ na̱ mɓa̱la̱ mu ukutu a̱ cin va̱ yi! Reve a̱ jika̱ o uta̱ yi. Na amayun a̱yi fo u da̱na̱ ta̱ e izami i na wa lyawa uba̱ta̱'a̱ fo, adama a na A̱sulazuva a lapai ta̱ na̱ mɓa̱la̱.

21Mogono Uziya da̱na̱ ta̱ na̱ mɓa̱la̱ mu ukutu hali ukwisa̱ wa̱ yi. U da̱nu ta̱ utakatsuwu nu u'wa wa̱ a̱yi, adama a na o uta̱ yi ta̱ diga a̱ A̱a̱'isamapaɗa A̱sulazuva. A̱vu Yotam ulobo wa̱ yi wo o'wo zagbain vu ukobu a yuwusan tsugono tsa ama e iɗa'a.

22Akapi o ulinga u tsugono tsa̱ Uziya, diga o ufaru acina ukosu, Ishaya ulobo wa Amoz Vumava̱sula̱ ɗa ɗana nle. 23Uziya kuwa̱ ta̱ ucina nkaya ma̱ yi, a̱vu a̱ ciɗo yi zuzu ne le uba̱ta̱ u na a̱ ciɗosu ngono, adama a na ama a damma ta̱, <<A̱yi ma̱kutu ma ɗa>> A̱vu Yotam ulobo wa̱ yi wo o'wo mogono o una̱ wa̱ yi.