প্রকাশ 9

সে নিওয়া দিংজ্রাবি

1আসা পাঁচ নম্বর লোডিংবাকো পোইংহা আপনিকো পেপনে মুইয়ে, আসা কাহা ইচো পুইমা তিংয়ে, হানি লোডিংবাসোহা বাসিমতিতা হুইমমে। আকু পুইমাহিংয়া নাঘীক্যইওয়া লিমুকো গোইচো পিচায়ে। 2আকুহা নাঘীওয়া লিমুহিং ওয়েয়ে, আসা আউসোহা মেহকো টেবো ভট্টিসো নোওয়া মুধুই ত্যাবাপা নোয়ে, আসা নাঘীওয়া লিমুকো মুধুইসোহা সানি আসা বিংঙাহিংয়া নাটুংপা জোপুয়ে।1 3আকু মুদুইসোহা বাসিমতিতাহা দিংজ্রাবি নোয়ে, আসা বাসিমতিকো বিচ্ছিবিকো ত্যাবাপা সে আবিহিংয়া পিচায়ে। 4আবিহিংয়া আজ্ঞা পিচায়ে, বাসিমতিকো স্যাম্যা আসা হাইক্রি সিংতেং-দাংটেংবিহিংয়া খতি মোজোঘ্যই, আদো হাংসু দিংঙাকো তিঙাংতা সেংজাকো শিল মোতো আবিহিং মেংচে খতি জো, 5আবিহিংয়া স্যাকোহা মাস্যাঘ্যই, আদো তারিঙারি চোইপা কোইচ্যাপা তামসা আবিহিংয়া অধিকার পিচায়ে, আসা দিংঙাহিং বিচ্ছি চিপুনু হেপা তুচামমে, আবিকো চিওয়ারে এসেপাকোরাং তুচারোওয়া। 6আকু দিনতাহা দিংঙাবিহা সিদিংহিং মোরোওয়া, আদো মোদোরোওয়া। আবিহা সিকো কেংরোওয়া, আদো সিদিংহা আবিকোসো ক্যাপুরোওয়া।2

7আকু দিংজ্রাবিকো য়ুওয়াইহা লুইসুকো সোতা তৈয়ার জোওয়া ওইংঙাবিকো ত্যাবাপা নিমি। আবিকো পোরোতাহা সুনকো মুকুট ত্যাবাপা হাইক্রি নিমি, আসা আবিকো য়ুওয়াইহা দিংঙাবিকো য়ুওয়াই ত্যাবাপা নিমি। 8আবিকো পুরিংহা মেমেকো পুরিং ত্যাবাপা নিমি, আসা আবিকো সেতাংহা সিংহকো সেতাং ত্যাবাপা নিমি। 9আসা আবিকো তুংসিংহা চাকো কবচ ত্যাবাপা নিমি, আসা আবিকো বেগ্রেংকো আওয়াজহা লুইসুওয়াতা হ্যাদাংওয়া উইসে রথ আসা ওইংঙাবিকো আওয়াজ ত্যাবাপা নিমি। 10আবিকো মেরোং আসা খিলহা বিচ্ছিকো ত্যাবাপা নিমি। আবিকো মেরোংতাহা তারি ঙারি চোইপা দিংঙাহিং দুঃখ পিচাওয়া সে নিমি। 11টেবো নাঘীওয়া লিমুকো পোইংহা আবিকো জাইপু নিমি। হিব্রু ক্যাতাহা আকো মিংহা এবাড্ডোন আসা গ্রিক ক্যাতাহা আকো মিংহা অপোল্লিয়োন নিমি। ই জাংওয়াকো অর্থহা, নাশ জোওয়া।

12নাগাইকো দুঃখহা পেংপুয়ে। আকো নোইতাহা ন্যাসারাং নিহসো কোইচ্যাওয়া ওয়াংকো বাকি নিও।

13আসা আকু ছয় নম্বরকো লোডিংবাকো পোইংহা পেপনে মুইয়ে, আসা কাহা সেংজাকো নাগাইতা য়ুংওয়া সুনকো বেদিকো ডিদ্যাকো ডাংসো নোওয়া ইচো আওয়াজ হিংয়ে। 14পেপনে মুইদাংওয়া ছয় নম্বরকো লোডিংবাকো পোইংহিংয়া এপা জাংওয়া কা হিংয়ে, “টেবো জোরা য়ুফ্রেটিসতা তাইমসা এওয়া আকু ডিচো পোইংহিংয়া ল্যাপি।” 15আসা আকু ডিচো পোইংহিংয়া ল্যাপিয়ে, হাংসু দিংঙা জ্যাকো এক ভাগহিং স্যাকো আত্রংকো সাল, আত্রংকো দিন, আত্রংকো তারি আসা আত্রংকো লোহকো সোতা তৈয়ার জোমি নিমমে। 16আউতা নিওয়া ওইংঙাতা বাইওয়া সিপাইবিকো সংখ্যা বিশ করোর নিও তাওয়া কাহা হিংয়ে।

17কুং দর্শনতা তিংওয়া ওইংঙা আসা ওইংঙাতা বাইওয়াবিহা এপারাং নিমি আবিকো তুংসিংতা লুওয়াবিহা মেহ ত্যাবাপা অ্যালুইপা, নিল মনি ত্যাবাপা য়োউনিংপা আসা গন্দককো রং ত্যাবাপা য়োয়োউপা নিমি। আকু ওইংঙাবিকো পোরোহা সিংহবিকো পোরো ত্যাবাপা নিমি। আবিকো নামুসোহা মেহ, মুদুই আসা গন্দক নোমি। 18আবিকো নামুসো নোওয়া মেহ, মোদুই আসা গন্দক, ই সুংচোকো বিপদসোহা দিংঙা জ্যাকো সুংদ্যা ভাগতাহা এক ভাগহিংয়া স্যাপুয়ে। 19হাংপাতানাহা আকু ওইংঙাবিকো সেহা আবিকো নামু আসা মেরোংতা নিমি, আবিকো মেরোংহা লিং নিওয়া পুইয়াকো পোরো ত্যাবাপা নিমি, আকু পোরোসোরাং আবিহা দিংঙাবিহিংয়া ঘাইতে জোচাংমি।

20ই বিপদসো মিসিওয়া লেরা দিংঙাবিহা আপনিকো খুইকো কামসো ন্যাসারাং পশ্চতাপ মোজোতো। আবিহা জেসাংবিহিং আসা তিংকো মাছুওয়া, হিংকো মাছুওয়া আসা তেইকো মাছুওয়া সুন, জাতাং, কাঁসা, লুংটুই আসা কেংপ্রাকো মুর্তিবিহিং হুইকো মাল্যাতো।3 21আবিহা দিংঙা স্যাওয়া, জাদুগর, নুংনাংসুওয়া আসা কুইওয়াকো সোতাহা পশ্চতাপ মোজোতো।