প্রকাশ 1

1ই হিগাকো নুওয়াংহা ইশু খ্রীষ্টহা তিংপামগা। আপনিকো ডেইয়াবিহিং সেন্নেপা পুরা জিংদাংওয়া নুওয়াংবিকো তোইতা গেকো ছুকো তামসা সেংজাহা ইশুহিংয়া ই দর্শন পিচাওয়া নিমগা। ইশুহা ই নুওয়াং ল্যাকোহা ইচো লোডিংবাকো পোইংহিং আপনিকো ডেইয়া য়হুন্নাকোতা নিংপুয়ে। 2আপনিকো তিংওয়া তাংসা নুওয়াং য়হুন্নাহা ল্যামি নিও। আকো ল্যাওয়া সেংজাকো দেরেং আসা ইশু খ্রীষ্টকো তিংপাওয়া আজিপ্পা নুওয়াংহা ইরাংগা। 3ই হিগা পড়াইমবি আসা ইতা নিওয়া অগমবাণীকো য়্যইদিবি হিংওয়া আসা মানেওয়াবি তাংসারাং আশিষিত নিও। হাংপাতানাহা ই নুওয়াংহা সেন্নেপারাং পুরা জিংরোওয়া।

নীচো মন্ডলিবিহিং য়হুন্নাকো অভিবাদন

4এশিয়াতা নিওয়া নীচো মন্ডলিবি তাংসাহিং য়হুন্নাকোসো অভিবাদন:

সেংজা, হাংসু নিদিংমমে আসা ওয়াংপামমে আসা আকো গাদিংকো নাগাইতা য়ুংওয়া নীচো লাংবেসো নাবিহিংয়া অনুগ্রহ আসা তিমেওয়া পিচাকো। 5দেংকো ছুওয়া সাক্ছি আসা সিপুওয়াবিসো হাংসুরোমা নাগাই ঙারোওয়া বাসিমতিকো জাইপুবিকো জাইপু, আকু ইশু খ্রীষ্টকোসোরে নাবিহিংয়া অনুগ্রহ আসা তিমেওয়া নিকো।

আকুহা য়াংবিহিংয়া জেজেংপা জোমগা আসা আপনিকো বলিদানকো য়ুতিসো য়াংবিহিংয়া পাপসো ছুটকারা পিচামি নিও। 6আকুহা আপনিকো সেংজা আসা আপাকো সেওয়া জোওয়া পাউবিকো অধিকার য়াংবিহিং পিচামি নিও। ইশু খ্রীষ্টকো আদর আসা অধিকার হাত্রংদো নিকো। আমেন।

7কাং, আকুহা ডিংবাকো গুইংতুওয়াসো দেপাদাংয়ো। আকুহিংয়া তাংসারাং তিংরোওয়া, আবিরে তিংরোওয়া, হাংসু আকুহিং লেংজাসো বামমে, বাসিমতিকো তাংসা দিংঙাবিহা আকো সোতা শোক জোসুরোওয়া। ওই, এপারাং জিংকো। আমেন।

8“কাহা অল্ফা আসা অমেগা,1 নাগাইরে আসা নোইস্যারেগা” তামসা সে নিওয়া প্রভুসেংজাহা জাংমগা আকুহা নিদিংয়ো, নিদিংমগা, আসা নিরোওয়া।2

প্রভু ইশু খ্রীষ্টকো দর্শন

9কা নাবিকো ডুওয়া য়হুন্নাগা। আসা ইশুকো তোইতা দেংওয়াকো সোতা নাবিহিংপা কারে ধিরোজ জিংমসা দুঃখ সহায়মি নিও, হানি কোইচ্যাওয়া আকো রাজ্যতা নিমবিকো তোইতা ওয়াংমমে। সেংজাকো য়্যইদি আসা ইশু খ্রীষ্টকো তিংপাওয়া আজিপ্পাহিং হিংপাওয়াকো সোতা কা কৈইদি জিংমসা পত্মোস বোইদাতা নিমগা। 10প্রভুকো দিনতা কাহা লাংবেসো মেইপুয়ে আসা নুনুই কাটুতা ইচো আওয়াজ পেপনেকো ত্যাবাপা ঙাচ্রিংপা য়্যইওয়া কা হিংয়ে। 11ই আওয়াজহা এপা জাংয়ে, “হাই হাসে নাতি তিংদিং, ইচো হিগাতা লামসা আকু নীচো মন্ডলিহিং কাইপ্পি, অর্থাৎ এপিসিস, স্মুর্না, পর্গামম, থিয়াটিরা, সার্ডিস, ফিলাডেফ্লিয়া আসা লাউডিকিয়াতা।”

12কাহিংপা য়্যইওয়াহা হাংসুমে তামসা কাহা নোই ল্যামসা ন্যইয়ে। কাহা দিব্রি এওয়া নীচো সুনকো সামদান তিংয়ে। 13কাহা সামদানবিকো প্যাকোতা তাংবা চোইপা দেকাওয়া ডাল্লাইক্যইওয়া আংদুং লুওয়া আসা তুংসিংতা সুনকো কোংন্যা জিংওয়া ইচো দিংঙাকো চেংওয়া ত্যাবাপা তিংয়ে।3 14আকো পুরিংহা লুকাকো মুসা আসা কাওয়া ত্যাবাপা হাংপাপা নিমি। আসা আকো মিচোহা মেহকো মিজাই ত্যাবাপা নিমি। 15আকো কোকোইহা মেহকো ভট্টিতা খারেমসা লেংপাওয়া কাঁসা ত্যাবাপা নিমি আসা আকো আওয়াজহা গুদুংতা হুইওয়া তিকো আওয়াজ ত্যাবাপা নিমি। 16দাংক্রেং খুইতাহা আকুহা নীচো পুইমা চুংওয়া আসা আকো নামুসোহা দুক্যইওয়া নিহদ্যাতা বিং নিওয়া তালওয়ার নোওয়া নিমি। আকো য়ুওয়াইহা জেইসুংকো সানি ত্যাবাপা তাত্রাইদিংওয়া নিমি। 17হাত্রং কা আকুহিং তিং, আত্রংহা কাহা সিপুমবেপা জিংপুমসা আকো কোকোই কাটুতা ইপুয়ে। আত্রংহা আকুহা কুং পোরোতা আপনিকো খুই এমসা এপা জাংয়ে, “মাচ্ছুংগে কাহা নাগাইরেগা নোইস্যারেগা। 18হাত্রংরে মিসিওয়াহা কারাংগা। কাং, কাহা সিপুনতেমি নিমগা, আদো নেহা হাত্রংদো য়ুংকো সোতা বাচেমি নিও, কুং খুইতাহা সিদিংসো আসা সিংপাংকো গোইচোবি নিও। 19আকো সোতা নাতিহা হাং তিংমমে, আকুহা হিগাতা লা। নেকো তিংদিংওয়া নুওয়াংবি আসা নোইতা জিংদাংওয়া নিহসোসা নুওয়াংবি লা। 20নাকো তিংওয়া কুং খুইতা নিওয়া নুওয়াংবি নীচো পুইমাবি আসা সুনকো নীচো সামদানকো নাপোকো নুওয়াংবিহা ইরাংগা, সুনকো ই নীচো সামদানহা নীচো মন্ডলিগা আসা নীচো পুইমাহা ই নীচো মন্ডলিকো কাং-য়োংওয়া পোইংবিগা।”