মথি 26

ইশুহিং স্যাসুকো হুইসুওয়া

(মর্কুস ১৪:১-২; লুক ২২:১-২; য়হুন্না ১১:৪৫-৫৩)

1ইশুহা ই নুওয়াং জাংপুনতেনুকো নোইতাহা আপনিকো য়োংতোংবিহিং জাংয়ে, 2“নাবিহা গেমিরাং নিও, নেহা সানিহয়ুকো নোইতাহা নিস্তার মানক্যা ওয়াংরোওয়া, আসা দিংঙাকো চেংওয়াহিংয়া ক্রুসতা থ্যইমসা স্যাকো প্যইপুরোওয়া।”

3আত্রংহা কাইয়াফা মিং নিওয়া টেবো পাউকো লাঙাংতা মাটা পাউবি আসা দোসরা য়হুদি মাটা ওয়ারাংপাবি চাংসুমসা জোংসুয়ে। 4আসা আবিহা ইশুহিংয়া হেপা চেকেপা প্যইকোমে আসা স্যাকোমে তামসা হুইসুয়ে। 5আদো আবিহা জাংয়ে, “মানক্যাকো সময়তা মোকোমি, মেনাহা দিংঙাবিকো প্যাকোতাহা টেবো চেচোওয়াইপা জিংপুরোওয়া।”

ইশুকো পোরোতা পাংক্যইওয়া চুইতি নাইওয়া

(মর্কুস ১৪:৩-৯; য়হুন্না ১২:১-৮)

6ইশু বেথানিয়াতা য্যাসো হাইমসা সাংওয়া সিমোনকো সাতা নিনুওয়া, 7ইচো মেমেহা এনতাওয়া বোত্রাতা পাংকোইওয়া ওহও্যহপা মেনাংওয়া চুইতি পামসা ইশুকোতা লেয়ে, আসা আকু চাকো গানুওয়া আকু মেমেহা ইশুহিং আদর পিচাকো তামসা ইশুকো পোরোতা লুপুয়ে। 8হাত্রং য়োংতোংবি ই তিং, আত্রংহা আবিহা সেদ্রাংপামসা জাংয়ে, “হাংকো সোতা এসেকো পাংকোইওয়া চুইতিহা এপারাং লাডু বাদোইমগা? 9ইরোমাহা ইহিংয়া পিচামসা জোরোংবিহিং ন্যাস্যাহা চোপিনাহা তুকোগা।”

10আদো ইশুহা ই নুওয়াং সিদা চ্যইমসা আবিহিং জাংয়ে, “নাবিহা ই মেমেহিংয়া হাংপা দুঃখ পিচামগা? আকুহা কুং সোতাহা ইচো এনতাওয়া কাম জোমি নিও। 11হাংপাতানাহা জোরোংবিহা হাত্রংদো নাবিহিংপারাং নিরোওয়া, আদো কাহা নাবিহিংপাহা মাতারোওয়া। 12আকুহা ই ওহও্যহপা মেনাংওয়া চুইতিহা কুং জুপাতা লুমসা কাহিং লির্কো সোতা তৈয়ার জোমগা। 13আজিপ্পারাং কা নাবিহিং জাংরোওয়া, বাসিমতিকো তাংসা জায়গাতা হাংতা হাংতা এনতাওয়া দেরেং হিংপা, আউতা ইকো জোওয়া ই কামরে প্যারাপারোওয়া।”

য়হুদাহা ইশুহিং প্যইপাকো তৈয়ার জোওয়া

(মর্কুস ১৪:১০-১১; লুক ২২:৩-৬)

14আকো নোইতাহা বার্চো য়োংতোংবিকো প্যাকোতা ইচো য়হুদা ইস্করিয়োত তাওয়াহা মাটা পাউবিকোতা হোয়ে, 15আসা জাংয়ে, “কামি ইশুহিংয়া নাবিকো খুইতামি প্যইপানাহা, কাহিংয়া হাং পিচাকোগা?” আবিহা আকুহিং জাতাংকো ইকাইসো ত্যাচো টাংকা পিচায়ে। 16আত্রংসো য়ুতাহা য়হুদাহা ইশুহিং প্যইপাকো মৌকা মোইয়ে।

নোইস্যাকো চাওয়া

(মর্কুস ১৪:১২-২৬; লুক ২২:৭-২৩; য়হুন্না ১৩:২১-৩০)

17সোঁরা মালুওয়া কোব্রেং চাওয়া মানক্যাকো নাগাইকো দিন য়োংতোংবিহা ইশুকোতা ওয়াংমসা উইয়ে, “নাকো সোতা কাবিহা নিস্তার মানক্যা1 চাকোহা হাংতা তৈয়ার জোকোগা?”

18আকুহা জাংয়ে, “শহরতা ইচো দিংঙাকোতা হোতু, আসা আকুহিং জাং, ‘উটকেওয়া জাংদিংনা, কুং সময় আবেইতা ওয়াংপুনতেনা। কা কুং য়োংতোংবিহিংপা নাকো সাতা নিস্তার মানক্যা চারো’।” 19য়োংতোংবিহা ইশুকো জাংওয়া সেই নিস্তার মানক্যা চাকো আউতারাং তৈয়ার জোয়ে।

20হাত্রং জিরোং জিংপু, আত্রংহা আকুহা বার্চো য়োংতোংবিহিংপা চাকো গায়ে। 21আবি চাদিংনুওয়া ইশুহা জাংয়ে, “আজিপ্পারাং, কা নাবিহিং জাংরোওয়া, নাবিকো প্যাকোতাহা ইচোহা কাহিং প্যইপাপুরোওয়া।”

22আত্রংহা আবিহা সিওপারাং তুংসিং চিচাপুমসা তাংসা ইচো ইচো জোমসা আকুহিং উইয়ে, “প্রভু আকুহা কাগা?”

23আকুহা জাংয়ে, “হাংসু কাহিংপা চোপোইতা কোব্রেং বুমিনি, আকুরাং কাহিং প্যইপাপুরোওয়া। 24দিংঙাকো চেংওয়াহা আকো তোইতা তাংজিকো হিগাতা লাওয়া সেই সিকোহা সিনেরোওয়া। আদো টেবো দুঃখ ওয়াংরোওয়া দিংঙাকো চেংওয়াহিং প্যইপাওয়া দিংঙাকোতাহা! আকু দিংঙাহা আকো সোতাহা মেকেওয়ারাং এনতাকোগা।”

25আত্রংহা প্যইপাকো কেংওয়া য়হুদাহা আকুহিং উইয়ে, “উটকেওয়া, আকুহা কাগা?”

ইশুহা আকুহিংয়া জাংয়ে, “নাতি আপনিরাং জাংপুয়ে।”

26আবি চাসু-আংসুদিংনুওয়া ইশুহা কোব্রেং চুংয়ে আসা সেংজাহিং গারানি তামসা আকুহা আকু কোব্রেং মেয়ে আসা য়োংতোংবিহিং পিচামসা জাংয়ে, “এই চা, ইহা কুং জুপাগা।”

27আকো নোইতাহা আকুহা কচৌরা চুংয়ে আসা সেংজাহিং গারানি তামসা য়োংতোংবিহিং পিচামসা জাংয়ে, “নাবি তাংসা ই কচৌরা আং, 28হাংপাতানাহা ইহা সেংজাকো নাপোইতেওয়া চুবে করারহিং পক্কা জোওয়া কুং য়ুতিগা। ই য়ুতিহা তাংসা দিংঙাকো পাপ ছমাকো সোতা ক্যাপারোওয়া। 29আদো কা নাবিহিং জাংরোওয়া, কুং আপাকো রাজ্যতা নাবিহিংপা চুবে জোমসা মাআংনু চোইপা কা ই আংগুরকো সিংতেংকো ফলসো মাআংরোওয়া।” 30আসা ইচো লেহদি লেহপুনতেনুওয়া আবিহা জেইতুন য়্যাগোইতা হোপুইয়ে।

পত্রসকো মানাইমি তামসা জাংওয়া

(মর্কুস ১৪:২৭-৩১; লুক ২২:৩১-৩৪; য়হুন্না ১৩:৩৬-৩৮)

31আত্রংহা ইশুহা আবিহিং জাংয়ে, “হিনি লিসুংহা নাবিহা তাংসা কাহিং হুইতেমসা ক্যাপুরওয়া, হাংপাতানাহা তাংজিকো হিগাতাহা এপা লামি নিও,

‘কা গোইত্রহিং স্যারোওয়া, আসা লুকাবিহা হিংচাইবিরিপা জিংপুরোওয়া।’2

32আদো কা সিপুওয়াসো ঙারোনুওয়া নাবিরোমা নাগাই গালীলতা হোরোওয়া।”

33পত্রসহা আকুহিংয়া জাংয়ে, “তাংসা নাতিহিং হুইতেদো কাহা নাতিহিংয়া হাত্রংরে মাহুইতেরো।”

34ইশুহা আকুহিংয়া জাংয়ে, “আজিপ্পারাং, কা নাতিহিংয়া জাংরোওয়া, হিনি লিসুংরাং কেকা ওনুরোমা নাগাই নাতিহা কাহিং সুংকোই চোইপা মানাইমি তামসা জাংরোওয়া।”

35পত্রসহা আকুহিংয়া জাংয়ে, “নাতিহিংপা সিনেদো কা নাতিহিংয়া মানাইমি তামসা হাত্রংরে মাজাংরো। আসা তাংসা দোসরা য়োংতোংবিরে এপারাং জাংসুয়ে।”

গেতসমনি দুংরাইতা ইশুকো পাচাইয়াওয়া

(মর্কুস ১৪:৩২-৪২; লুক ২২:২৯-৪৬)

36আকো নোইতা ইশুহা গেতসামানি তাওয়া জায়গাতা আবিহিংপা হোয়ে, আসা য়োংতোংবিহিং জাংয়ে, “নাবিহা ইতারাং য়ুংতে, কাহা এংসি বারগাং হোমসা পাচাইয়ারোওয়া।” 37আসা আপনিহিংপাহা পত্রস আসা জোব্দিয়াকো নিহসো চেংওয়াহিং পুরামসা আকুহা সিওপারাং তুংসিং চিচাপুমসা লোচোপেংঙেংপা জিংপুয়ে। 38আত্রংহা আকুহা আবিহিংয়া জাংয়ে, “কুং তুংসিংহা চিচামসা আরাংপারাংপা জিংমসা তুংসিংরাং টুইপুকো বেপা জিংদিংয়ো। নাবিহা ইতারাং মাজিংপা য়ুংমসা কাহিং য়ুজ্রু।” 39আসা আকুহা এংসি তানাং হ্যামসা চুনুইমসা এপা জাংমসা পাচাইয়ে, “ও কুং আপা, জিংদানাহা ই কুংতা দেপাওয়া দুঃখকো কচৌরা কুংসো ওয়েংপাপি। আদো কুং ইচ্ছাসো মোকো, আদো নাকো ইচ্ছাসো তাংসা জিংকো।”

40আত্রংহা আকুহা য়োংতোংবিকোতা ওয়াংয়ে, আসা আবিহিংয়া জিংদিংওয়া দোসুয়ে। আকুহা পত্রসহিং জাংয়ে, নাবিহা কাহিংপা এক ঘন্টারে মাজিংপা য়ুংমক্যইংগা? 41মাজিংপা য়ুং, পরিকছাতা মোপোরেকো তামসা পাচাই। লাংবেহা তৈয়ার নিও, আদো জুপাহা মাচুপা নিও।

42আকুহা ন্যাসারাং হোমসা এপা জাংমসা পাচাইয়ে, “ও কুং আপা, ই দেপাওয়া দুঃখকো কচৌরা কুংসো ওয়েংপাকোরাং মাতুদানাহা, নাকো ইচ্ছারাং তাংসা জিংকো।” 43আকুহা ন্যাসারাং য়োংতোংবিকোতা ওয়াংনুওয়া আবিহিংয়া ন্যাসারাং জিংজুওয়া দোসুয়ে। আবিহা মিচো ওয়েকোরাং মাচুতো।

44আসা ইশুহা আবিহিংয়া এপারাং হুইতেমসা সুংকোই চোইপা ন্যাসারাং নাগাইকো ত্যাবাপা পাচাইয়াকো হোয়ে।

45আকো নোইতাহা আকুহা য়োংতোংবি নিওয়াতা ওয়াংমসা জাংয়ে, “নাবিহা নেচোইপা জিংমসা সাদিংগা? হিং, কা দিংঙাকো চেংওয়াহা পাপিবিকো খুইতা দেকাকো সময় জিংতেয়ো। 46নেহা লো, তে! কাং, ‘কাহিং প্যইপাওয়া দিংঙারে ওয়াংপুনতেয়ো’।”

ইশুহিং প্যইপুওয়া

(মর্কুস ১৪:৪৩-৫০; লুক ২২:৪৭-৫৩; য়হুন্না ১৮:৩-১২)

47ইশু য়্যইদিংওয়া কোকোইত্তা, বার্চো য়োংতোংবিতাহা ইচো য়হুদাহা আউতা দেরেয়ে। আকুহিংপাহা মাটা পাউবি আসা দোসরা য়হুদি মাটা ওয়ারাংপাবিকো নিংপুওয়া কাসুমা আসা দ্যইবি চুংওয়া উইসে দিংঙাবিরে নিমি। 48আকুহিং প্যইপাওয়া য়হুদাহা আবিহিংয়া এপা জিংওয়া চিহ্ন পিচাওয়া নিমি, “হানি দিংঙাহিং কা চুম্মা জো, আকুরাং ইশুগা, আকুহিং প্যই।” 49আত্রংতারাং ইশুকোতা হোমসা য়হুদাহা জাংয়ে, “ও উটকেওয়া, অভিবাদন!” আসা আকুহা ইশুহিংয়া চুম্মা জোয়ে।

50ইশুহা আকুহিংয়া জাংয়ে, “ও ব্যারো, নাতিহা হাং জোকো ওয়াংমে, আকুহা জোপুই।”

আত্রংহা আবিহা নাগাই ওয়াংমসা তাংসা ইশুহিং প্যইপুয়ে। 51ই তিংনুওয়া ইশুহিংপা চিত্তা নিওয়াবিতাহা ইচোহা আপনিকো তালওয়ার য়োয়ে, আসা টেবো পাউকো ডেইয়াকো নানুং থেহপুয়ে।

52আত্রংহা ইশুহা আকুহিংয়া জাংয়ে, “নাকো তালওয়ারহা সেপাতা ওয়্যা, হাংপাতানাহা তালওয়ারসো থেসুমবিহা তাংসা তালওয়ারসোরাং সিনেমগা। 53নাতিহা হাং নোমগা, কা কুং আপাহিং জাংচামক্যইকোগা, আসা আকুহা সেন্নেপা বার্চো পারা3 সিপাইবিরোমা সিওপা লোডিংবাকো পোইংবিহিং কুং সোতা মেনেংপিকোগা? 54আদো কামি য়াপুদানাহা তাংজিকো হিগাতা এপা জিংনেকোগা তামসা লাওয়া নুওয়াংহা হেপা পুরা জিংকোগা?”

55আত্রংরাং ইশুহা উইসে দিংঙাবিহিং জাংয়ে, “মেংদাংবিহিং প্যইকো ওয়াংমি ত্যাবাপা তালওয়ার আসা দ্যইবি পামসা নাবিহা হাংপা কাহিং প্যইকো ওয়াংমগা? কাহা সদাইবিরি দেমসাতা ঝিপামসা য়ুংচাংমগা, আত্রংহা নাবিহা কাহিংয়া মোপ্যইতো। 56আদো অগমবক্তাবিকো তাংজিকো হিগাকো নুওয়াংবি তাংসা জিংকো তামসা ই তাংসা জিংমগা।” আত্রংহা তাংসা য়োংতোংবিহা ইশুহিং হুইতেমসা ক্যাপুয়ে।

লাচি জাংওয়াকো আবেইতা ইশু

(মর্কুস ১৪:৫৩-৬৫; লুক ২২:৫৪-৭১; য়হুন্না ১৮:১৩-২৪)

57ইশুহিং প্যইমবিহা আকুহিংয়া টেবো পাউ কাইয়াফাকোতা পুরায়ে। আউতাহা তাংজিকো উটকেওয়াবি আসা দোসরা য়হুদি মাটা ওয়ারাংপাবি জমা জিংওয়া নিমি। 58আদো পত্রসহা তানাংসো ইশুহিংপা হুইপামসা টেবো পাউকো লাঙাং চোইপা দেরেয়ে, আসা নোইস্যা চোইপা হাং জিংকোমে, আকু কাংকো সোতা নাপোতা হোমসা আকুহা সা কুইমবিহিংপা গায়ে।

59মাটা পাউবি আসা আউতা জমা জিংওয়া মাটা লাচিজাংওয়াবিহা ইশুহিংয়া স্যাকো তামসা আকো তোইতা প্যায়োং দোষ লাগাইমবিহিং মোসোইয়ে। 60উইসে প্যায়োং দোষ লাগাইওয়াবিহা আউতা লেয়ে, আদো আবিহা হাইরে প্রমান মামুংতো। নোইস্যাতা নিহসো দিংঙা নাগাই লেয়ে, 61আসা জাংয়ে, “ই দিংঙাহা ‘কা সেংজাকো দেমসাহিংয়া য়্যামসা সাসুংয়ুতা ন্যাসারাং ইহিংয়া লোপাকো ছুরো’ তায়ো।”

62আত্রংহা টেবো পাউহা লোমসা ইশুহিংয়া জাংয়ে, “নাতিহা হাইরে মায়্যইকোগা? ই দিংঙাবিকো নাকো তোইতা বিরোধ জোওয়া গাওয়াইহা হাংগা?” 63আদো ইশুহা চেকেপা য়ুংয়ে। টেবো পাউহা আকুহিংয়া জাংয়ে, “ঙাজ্যইং সেংজাকো মিংতা কা নাতিহিংয়া আজ্ঞা পিচারোওয়া, কাবিহিং জাং, নাতিহা সেংজাকো চেংওয়া খ্রীষ্টগা?”

64ইশুহা আকুহিংয়া জাংয়ে, “নাতিরাং জাংপুয়ো। আদো কা নাতিহিংয়া জাংরোওয়া, নেহা ইসো য়ুতাহা নাবিহা দিংঙাকো চেংওয়াহিংয়া টেবো সে নিওয়া সেংজাকো দাংক্রেং কাটুতা গাওয়া, আসা লোডিংবাসো মুওয়াতা লেপাদাংওয়া তিরোওয়া।”

65আত্রংহা টেবো পাউহা আপনিকো আংদুং ছিমসা জাংয়ে, “ইহা সেংজাকো তোইতা বিরোধ য়্যইয়ো। য়াংবিহিংয়া নেহা দোসরা প্রমানহা হাং ঘ্যইকোগা? নাবিহা নেকো ইকো সেংজাকো তোইতা বিরোধ য়্যইওয়াহা হিংমি নিও। 66নেহা জাং, নাবিহা হাং নোংকা?”

আবিহা জাংসুয়ে, “ইহা দোষিগা ইহা সিনেকো বেপারাং নিও।”

67আত্রংহা আবিহা ইশুহিংয়া নামুতা তোতি তোতোমসা আকুহিংয়া গুসি টোয়ে, আসা লেরাহা এপা জাংমসা ত্যাচোংমসা জাংয়ে, 68“ও খ্রীষ্ট, নেহা কাবিহিং অগমবাণী জাং! নাতিহিং দুওয়াহা হাংসুগা?”

পত্রসহা ইশুহিং মানাইমি তাওয়া

(মর্কুস ১৪:৬৬-৭২; লুক ২২:৫৬-৬২; য়হুন্না ১৮:১৫-১৮,২৫-২৭)

69আত্রং চোইপা পত্রসহা বাইরে লাগাইতারাং গাদিংমি। ইচো ডেইয়ামুহা আকোতা লেমসা জাংয়ে, “নাতিরে গালীলতা য়ুংওয়া ইশুহিংপারাং নিমকোতা?”

70আদো আকুহা তাংসাকো নাগাইতা মোকোমি তামসা জাংয়ে, “নাতিহা হাং জাংদিংমে, কা মোকোইনা।”

71আকুহা বাইরে লাঙাংকো লাপুং কাটুতা হোনুওয়া ইচো দোসরা ডেইয়ামুহা আকুহিং তিংমসা আউতা নিওয়া দিংঙাবিহিং জাংয়ে, “ই দিংঙারে নাসরতকো ইশুহিংপারাং নিমগা।”

72পত্রসহা ন্যাসারাং নাপোইমসা জাংয়ে, “কা আকু দিংঙাহিংয়া মানাইমি।”

73আকো আম্যই নোইতাহা আউতা নিওয়াবিরে পত্রসকো আবেইতা ওয়াংমসা জাংয়ে, “আজিপ্পারাং, নাতিরে আকুহিংপারাং নিমগা, হাংপাতানাহা নাকো য়্যইওয়াসোরাং নাতিহিংয়া নাইদিংয়ো।”

74আসা ন্যাসারাং পত্রসহা আপনিহিং নাপোইমসা জাংয়ে, “কামি ল্যইপানাহা সেংজাকো সেংদ্রাংহা কুং তোইতা হুইকো, কাহা আকু দিংঙাহিংয়া মানাইমি।” এপা জাংওয়া কোকোইত্তা কেকা ওপুয়ে।

75আত্রংহা পত্রসহা “কেকা ওয়ারোমা নাগাই নাতিহা কাহিং সুংকোই চোইপা মানাইমি তামসা ইশুকো জাংওয়া নুওয়াং প্যারাতাংয়ে।” আত্রংহা আকুহা বাইরে হ্যামসা মিতি জাজাপা কাইয়ে।