Toto
মথি 1
ইশুকো চিমাকো দিংঙাবি
(লুক ৩:২৩-৩৮)
ইশু খ্রীষ্টহা অব্রাহাম আসা দাউদকো চেংওয়া নিমগা। ইহা আকো চিমাকো দিংঙাবিকো মিংগা।
অব্রাহামকো চেংওয়া ইসহাক নিমি, ইসহাককো চেংওয়া য়াকুব, য়াকুবকো চেংওয়াবিহা য়হুদা আসা আকো ডুওয়া এবি নিমি।
য়হুদাকো তামার কাটুকো চেংওয়া ফারেস আসা জাহের, ফারেসকো চেংওয়া হেসরোন, হেসরোনকো চেংওয়া আরাম,
আরামকো চেংওয়া অম্মিনাদাব, অম্মিনাদাবকো চেংওয়া নহসোন, নহসোনকো চেংওয়া সোলোমন,
সোলোমনকো রাহাব কাটুকো চেংওয়া বোওজ, বোওজকো রুথ কাটুকো চেংওয়া অবেত, অবেতকো চেংওয়া য়িশাই।
য়িশাইকো চেংওয়াহা জাইপু দাউদ। দাউদকো চেংওয়া সোলোমন নিমি। আকো আয়ুহা উরিয়াকো মে বেথসেদা নিমি।
সোলোমনকো চেংওয়া রাহবাম, রাহবামকো চেংওয়া অবিয়া, অবিয়াকো চেংওয়া আশা,
আশাকো চেংওয়া য়াহোসাপাত, য়াহোসাপাতকো চেংওয়া য়হোরাম, য়হোরামকো চেংওয়া উজ্জিয়া,
উজ্জিয়াকো চেংওয়া য়োতাম, য়োতামকো চেংওয়া আহাজ, আহাজকো চেংওয়া হিজকিয়া,
হিজকিয়াকো চেংওয়া মানসে, মানসেকো চেংওয়া আমোন, আসা আমোনকো চেংওয়া য়োসিয়া নিমি।
আবিহিংয়া বেবিলোনতা প্যইমসা পুরানুকো সময়তা য়োসিয়াকো চেংওয়া য়োকোনিয়াস আসা আকো এবি কেহে।
বেবিলোনতা পুরানতেনুওয়া য়োকোনিয়াসকো চেংওয়া সালতিয়েল, সালতিয়েলকো চেংওয়া য়েরুবাবেল,
য়েরুবাবেলকো চেংওয়া অবিউদ, অবিউদকো চেংওয়া এলয়াকিম, এলয়াকিমকো চেংওয়া আজোর,
আজোরকো চেংওয়া সাদোক, সাদোককো চেংওয়া আখিম, আখিমকো চেংওয়া এলিউদ,
এলিউদকো চেংওয়া এলাজার, এলাজারকো চেংওয়া মত্তান, মত্তানকো চেংওয়া য়াকুব,
আসা য়াকুবকো চেংওয়া য়োসেফ জিংয়ে। য়োসেফহা মরিয়োমকো ওয়া নিমি। ই মরিয়োমরাং খ্রীষ্ট তাওয়া ইশুহিং চেংপাহে।
এপারাং অব্রাহামসো দাউদ চোইপা চৌদ্দ পুস্তা জিংপুমি নিমি, আসা দাউদসোহা ইস্রাইলিবিহিং বেবিলোনতা প্যইমসা পুরানু চোইপা চৌদ্দ পুস্তা জিংপুয়ে। আসা আত্রংসোহা খ্রীষ্ট কেনুকো সময় চোইপা ন্যাসারাং চৌদ্দ পুস্তারাং জিংপুয়ে।
ইশু খ্রীষ্টকো কেওয়া
(লুক ২:১-৭)
নেহা ইশু খ্রীষ্টকো কেওয়াহা এপা জিংপুয়ে: আকো আয়ু মরিয়োমকোহা য়োসেফহিংপা বিয়ৌ জিংরো তাওয়া নুওয়াং জিংতেমি, আদো আবিকো বিয়ৌ জিংওয়ারোমা নাগাইসোরাং মরিয়োমহা পবিত্র লাংবেকো সেসো চেং বুংমি নিমি, আদো আকুহিং বিয়ৌ জোরো তাওয়া য়োসেফহা ইচো তাংজি নিওয়া দিংঙা নিমি। আকো সোতা আকুহা দিংঙাকো নাগাইতা মরিয়োমহিং মেংতাপা মাজিংকো তামসা চেকেপা পেইপুরো তাওয়া নোয়ে।
এপা নোদিংনুওয়া মাংবুইওয়াতা আকুহিংয়া সেংজাকো পোইং তিংরেমসা জাংয়ে, “ও দাউদ জাইপুকো চিমাতা কেওয়া য়োসেফ, নাতিহা মরিয়োমহিং বিয়ৌ জোকোহা মাচ্ছুংগে। আকো ফেমাতা নিওয়া চেংহা পবিত্র লাংবেকো সেসো জিংওয়াগা। আকুহা চেংওয়া কেরোওয়া। আকু চেংওয়াকো মিংহা নাতিহা ইশু একো জো, হাংপাতানাহা আকুহা আপনিকো দিংঙাবিহিং পাপসো ওয়েংপারোওয়া।” সেংজাহা অগমবক্তাকোসো য়্যইওয়া ই নুওয়াংহা তাংসা জিংকো তামসা ই জিংমগা: “কাং, নামেরি মেমেহা চেং বুংরোওয়া, আসা আকুহা ইচো চেংওয়া কেরোওয়া, আসা আকো মিংহা ইম্মানুয়েল এরোওয়া। ‘ইম্মানুয়েল’ তামসা জাংওয়াহা সেংজা য়াংবিহিংপা নিও।”
য়োসেফ জিংজুওয়াসো হেরোংয়ে আসা মাংবুইওয়াতা সেংজাকো লোডিংবাকো পোইংকো জাংওয়া নুওয়াং হিংমসা মরিয়োমহিং বিয়ৌ জোমসা আপনিকোতা পারায়ে। আদো মরিয়োম চেং মাকেনু চোইপা য়োসেফহা আকুহিংপা মাজিংতো। মরিয়োমহা চেং কেনতেনুওয়া য়োসেফহা আকু চেংওয়াকো মিংহা ইশু এহে।
Toto. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.