Toto
মর্কুস 1
বাপ্তিস্মা পিচাওয়া য়হুন্নাকো এনতাওয়া দেরেং
(মথি ৩:১-১২; লুক ৩:১-১৮; য়হুন্না ১:১৯-২৮)
ই হিগাতাহা ইশুকো নুওয়াংবি জাংদাংওয়া নিও। আকুহা সেংজাকো চেংওয়াগা। ইহা এনতাওয়া দেরেংগা। উইসে লো নাগাইতা অগমবক্তা এশাইয়াকো হিগাতা সেংজাহা আকো চেংওয়াহিং জাংমি ত্যাবাপা, নাকো ন্যাতা চোপাকো সোতা:
“কাং, কা কুং পোইংহিং নাকো নাগাই নাগাই নিংপুরোওয়া।1
হিং, চিচ্চোওয়া জায়গাসো ঙাওয়া ইচো আওয়াজ হিং, আকুহা জাংয়ে, ‘সেংজাকো লেওয়া ন্যাতাবি চোপা, আসা আকো তেইওয়া ন্যাতাবি এনতাপা জো’।”
এশাইয়াকো জাংমি ত্যাবাপারাং আকু পোইংহা য়হুন্নাগা। চিচ্চোওয়া জায়গাতা য়ুংওয়াহা আকুরাংগা আসা আকুরাং দিংঙাবিহিং তিতা বাপ্তিস্মা পিচাচাংমগা, আকুহা দিংঙাবিহিং জাংয়ে, নাবিহা পাপ মোজো, সেংজাতা লাপামসা লেই, আসা তিতা বাপ্তিস্মা লাং। নাবিকো পাপ জোওয়া ছমা মুংচারোওয়া তামসা তাংসাহিং হিংপায়ে। য়হুদিয়াকো লোইবিসো আসা য়রুশালেম শহরসো দিংঙাবিহা য়হুন্নাকোতা লেদিংমি। আবিহা হাংসু হাংসু পাপ জোনা তামসা জাংরে, আবিহিং য়হুন্নাহা য়র্দন জোরাতা বাপ্তিস্মা পিচাচাংমি। আকুহা ত্যাইরম্যাকো মুসাসো ফীওয়া আংদুং লুমি, আসা আকো কেইনুংতাহা বেকোংকো কোংন্যা জিংচাংমি। আকুহা চুংচাতা নিওয়া শুইমাকো পুতিবি আংচাংমি, আসা দিংজ্রাবি প্যইমসা চাচাংমি। য়হুন্নাহা দিংঙাবিহিং জাংয়ে, “কুং নোইতা ইচো দিংঙা লেরোওয়া, আকুহা কারোমা ডিয়োওয়াগা কাহা লিতা নুউমসা আকো কোরোংকো সিংদি সিকো বেপারে মোতো। কা নাবিহিংয়া তিসো বাপ্তিস্মা পিচাদিংয়ো। আদো আকুহা নাবিহিংয়া পবিত্র লাংবেসো বাপ্তিস্মা পিচারোওয়া।” আকো নোইতা য়হুন্না নিওয়াতা ইশুহা গালীলকো নাসরত তাওয়া লোইসো লেহে। য়র্দন জোরাতা য়হুন্নাহা ইশুহিং তিতা বাপ্তিস্মা পিচায়ে। হাত্রং ইশু তিতা নুউমসা নো, আত্রংহা আকুহা লোডিংবা ওয়েওয়া তিংয়ে, আসা পবিত্র লাংবেহা কুইজা বেপা জিংমসা আকোতা উইয়ে। লোডিংবাসো ইচো আওয়াজ লেহে, আসা জাংয়ে, “নাতিহা কুং চেংওয়াগা আসা কা নাতিহিং জেজেংমি। কা নাতিহিংপা গাগ্রুপা নিও।”
আকো নোইতাহা সেংজাকো লাংবেহা ইশুহিং চিচ্চোওয়া জায়গাতা পুরায়ে। ইশুহা নিহকাইইয়ু চোইপা চিচ্চোওয়া জায়গাতা নিমি। শয়তানহা ইশুহিং মেংতাওয়া কাম জোপাকো কেংয়ে। ইশু আউতা সেংচেংবিহিংপা নিমি। আত্রংহা লোডিংবাকো পোইংবি লেমসা ইশুহিং য়ুজুরুয়ে।
য়োংতোংবিহিং ইশুকো মোউওয়া
(মথি ৪:১২-২২; লুক ৪:১৪-১৫, ৫:১-১১)
য়হুন্নাহিং প্যইচপুনুকো নোইতা ইশুহা লেমসা গালীল তাওয়া লোইতা সেংজাকো এনতাওয়া দেরেং হিংপারেহে। ইশুহা জাংয়ে, “সময় জিংতেও, সেংজাকো জাংওয়া নুওয়াংবি জিংকো তোংতেও। সেংজাকো রাজ্যহা আবেইতা দেয়োংতেয়ো। আকো সোতা পাপহিং ল্যাতেমসা সেংজাকোতা লেই, আসা সেংজাকো এনতাওয়া দেরেংতা দেংকো জো।”
গালীল দাব্রিকো আরিসো হোদিংনুওয়া ইশুহা সিমোন আসা আকো এ আন্দ্রিয়াসহিং জোরাতা জেরে তিইদিংওয়া তিংয়ে, হাংপাতানাহা আবিহা নায়া প্যইমবি নিমি। ইশুহা আবিহিং জাংয়ে, “কুং নুনুই লেই, কা নাবিহিংয়া নায়া প্যইমবিবেপা দিংঙাবিহিং সেংজাকোতা পারাওয়া বানাইরোওয়া।” ই নুওয়াং হিংতানি আবিহা জেরে হুইতেমসা ইশুকো নুনুই হোপুয়ে। আউসো আস্যই নাগাই হোনুওয়া ইশুহা জোব্দিয়াকো নিহসো চেংওয়া য়াকুবসো য়হুন্নাহিং দোসুয়ে। আবিহা নোওয়াইতা গামসা জেরে ফিদিংমি। আত্রংহা ইশুহা আবিহিং মোউয়ে, আসা আবিহা আকো আপা জোব্দিহিং কাম জোমবিহিংপা নোওয়াইতা হুইতেমসা আবিহা ইশুকো নুনুই হুইপুয়ে।
জেসাং দ্যইংচপুওয়া দিংঙা
(লুক ৪:৩১-৩৭)
ইশু আকু য়োংতোংবিহিংপা কোর্ফরনহুম তাওয়া লোইতা হোয়ে। আসা সানুকো দিনতা য়হুদিবিকো জোংসুওয়া সাতা হোমসা ইশুহা সেংজাকো য়্যইদি ঝিপাদাংয়ে। আকো নুওয়াং হিংমসা দিংঙাবিহা আআংপেপেচপুয়ে, হাংপাতানাহা ইশুহা তাংজিকো উটকেওয়া বেপা মোকোপা, ইচো অধিকার নিওয়া দিংঙা জিংমসা ঝিপায়ে। আত্রংরাং জেসাং দ্যইংচপুওয়া দিংঙাহা জোংসুওয়া সাতা চিলিংমসা জাংয়ে, “ও নাসরতকো ইশু, কাহিংপা নাকো হাং কাম নিংগা? নাতিহা কাবিহিং দাংপাকো লেমগা? কা নাতিহিং নাইমি নাতিহা হাংসুমে? নাতিহা ইচো সেংজাকো নিংপুওয়া পবিত্র দিংঙাগা।” ইশুহা আকুহিংয়া চিংচাইমসা জাংয়ে, “চেকেপা য়ুং! আসা আকোসো নোপুমসা হ্যাতু!” আসা আকু জেসাংহা আকু দিংঙাকো সাদি হ্যাপদাংকোইপা আকোসো নোপুমসা হ্যাপুয়ে। ই তিংমসা দিংঙাবিহা তাইবিলারাই জাংসুয়ে, ইহা হাংসুমেতা? ইহা চুবে ঝিপাওয়া গুং। ই দিংঙাহা অধিকার নিওয়া বেপারাং জেসাংবিহিং নোপাকো চুমগুং! আসা জেসাংবিরে ইকো নুওয়াং হিংনেমগুং। আসা এপা জিংতানি ইশুকো জোওয়া কাম গালীলকো তাংসা দিংঙাবিকো প্যাকোতা বেইপুয়ে।
ইশু উইসে হাইমবিহিং সাংপাওয়া
(মথি ৮:১৪-১৭; লুক ৪:৩৮-৪১)
ইশুহা জোংসুওয়া সাসো নোমসা সেন্নেপা য়াকুবসো য়হুন্নাহিংপা, সিমোনসো আন্দ্রিয়াসকো সাতা হোয়ে। আত্রংকো দিনহা সিমোনকো জুমেহা হাইমসা ন্যাগুতা জিংদিংমি, আসা দিংঙাবিহা ইশুহিং আকুহা হাইদিংনা তামসা হিংপায়ে। ইশুহা আকো আবিতা হোমসা আকুহিং খুই চুংমসা লোপায়ে, আসা আত্রংতারাং আকো হাইওয়া সাংপুয়ে। আসা আকুহা আবিহিং চাওয়া-আংওয়াবি পিচায়ে।
জিরুং সিনি হুইপুনুকো নোইতা দিংঙাবিহা হাইমবিহিং আসা জেসাং দ্যইংচপুওয়াবিহিং আকোতা পারায়ে। আসা আকু শহরকো তাংসা দিংঙাবিরে সাকো লাঙাংতা লেহে। ইশুহা দিংঙাবিকো উইসে হাইওয়া-মোংওয়া সাংপায়ে আসা উইসে জেসাংবিহিং দিংঙাবিকোসো নোপায়ে। আকু জেসাংবিরে গেদিংওয়া নিমি। ইশুহা হাংসুমে তামসা, আকো সোতা ইশুহা আবিহিংয়া য়্যইকো মিচাতো।
ইশু গালীলতা ঝিপাওয়া
(লুক ৪:৪২-৪৪)
আকো জুকুং হাপকুং মেজেংয়াংনুরোমা নাগাই ইশুহা লোমসা সা হুইতেমসা চিচ্চোওয়া জায়গাতা হোমসা পাচাইয়ায়ে। আসা সিমোনহিংপা নিওয়া আকো ব্যারোবিহা ইশুহিং মোপুমসা হোয়ে। ইশুহিং দোসুনুওয়া আবিহা জাংয়ে, “তাংসা নাতিহিং মোদিংনা।” ইশুহা আবিহিং জাংয়ে, লেই, য়াংবিহা তোংনাংকো লোইবিতা হোকো, আউতারে এনতাওয়া দেরেং হিংপানেরোওয়া, হাংপাতানাহা কাহা ই হিংপাকোরাং লেমগা। আসা তাংসা গালীলকো লুংবিবিতা হোয়ে। আসা আকুহা জোংসুওয়া সাবিতা এনতাওয়া দেরেংবি হিংপামসা জেসাংবিহিং নোপায়ে।
ইশুহা য্যাকো মাকাসো মেইপুওয়া দিংঙাহিং সাংপাওয়া
(মথি ৮:১-৪; লুক ৫:১২-১৬)
ইচো য্যাকো মাকাসো মেইপুওয়া দিংঙাহা ইশুকো নাগাইতা চুনুইমসা জাংচারেহে, “নাতিমি কাহিং সাংপাকো ইচ্ছা জোনাহা কাহিং সাংপাকো চুরোওয়া।”
ই নুওয়াং হিংমসা ইশু লামতুপুয়ে, আসা আকো তোইতা খুই এমসা জাংয়ে, “কা ইচ্ছা জোরোওয়া, নাতিহা সাংপু।” আত্রংতারাং আকো য্যাকো মাকাহা সাংচপুয়ে। আসা ইশুহা আকু দিংঙাহিং জাংয়ে, “কা নাতিহিং আজিপ্পারাং জাংরোওয়া, ই নুওয়াং হাংসুহিংনে মিহিংপাপি” আদো নাতিহা হোমসা পাউবিহিং তিংপাতু। আসা মোসাকো জাংতেওয়া লিংপাংতা ত্যাবাপা সেংজাকোতা বলি জোমসা আপনিকো সাংওয়া তাংসাহিং তিংপা।
আদো আকু দিংঙাহা নোপুমসা আপনিকো সাংওয়া তাংসাহিং হিংপায়ে, আসা আকো নুওয়াং তাংসাতা বেইপায়ে। আকো সোতা ইশুহা দিংঙাবিকো নাগাইতা হানি শহরতারে হোমক্যইতো, আদো আকুহা চিচ্চোওয়া জায়গাতা হোমসা য়ুংপুয়ে, আসা উইসে দিংঙাবিহা তাংসা লোইসো আকোতা লেহে।
Source notes (1)
- Cross-reference মলাকী ৩:১
Toto. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.