Toto
য়হোশু 12
পোঙাওয়া জাইপুবিকো মিংবি
য়র্দন জোরাকো নুব্যা কাটুতা নিওয়া দেশ, অর্নানকো ওয়াংবোইসোহা য়র্দনকো ওয়াংবোই আসা দ্যাম্যা হেম্রোন য়্যাগ্যই চোইপা, ইস্রাইলিবিহা জিয়োমসা আপনিকো অধিনতা এচপুওয়া নিমগা। আবিহা নিহসো জাইপুহিং জিয়োওয়া নিমগা। ইচো হেশ্বোনতা রাজ জোওয়া এমোরি জাইপু সীহোন নিমি। আকো রাজ্যতাহা ইপো গিলাত দেশহা পরেয়ে, আকো লুংবিহা অরোয়েরা (অর্নোন ওয়াংবোইকো আরিতা) ওয়াংবোইকো প্যাকোতা নিওয়া শহরসোহা আমোনকো লুংবিতা নিওয়া য়ব্বোক জোরা চোইপা পরেয়ে। আকু দেশকো নাপোতাহা গালিল ঝাহাদিসোহা ম্যাম্যা কাটুকো বেথ-য়শিমত চোইপা পরেওয়া য়র্দন ওয়াংবোই (সিপুওয়া ঝাহাদিকো নুব্যা কাটু) আসা আকো আইসি তানাং পিসগা য়্যাগ্যইকো ডেবে চোইপা পরেয়ে।
আবিহা বাসানকো জাইপু অৗগহিং জিয়োয়ে, হাংসু রপাইবিকো নোইস্যাকো পুস্তাবিতাহা ইচো দৈত্য নিমমে। আকুহা অস্তারোত আসা এদ্রোইতা রাজ জোমগা। আকো রাজকো নাপোতাহা হের্মোন য়্যাগ্যই, সলকা, তাংসা বাসান, ইপো গিলাত, গশুরি আসা মাকাতিকো লুংবি চোইপা আসা হেশ্বোনকো জাইপু সিহোনকো দেশকো লুংবি চোইপা পরেমগা।
ই নিহসো জাইপুবিহিংয়া মোসা আসা ইস্রাইলকো দিংঙাবিহা জিয়োয়ে। প্রভুসেংজাকো ডেইয়া মোসাহা আবিকো দেশ রুবেন আসা গাতকো জিরি আসা মনশেকো আধি জিরিহিংয়া আপনিকো পুংজি বানাইকো পিচায়ে।
য়হোশুকো জিয়োওয়া জাইপুবি
য়র্দনকো দিব্যা কাটু পরেওয়া লেবনানকো ওয়াংবোইকো বাল-গাতসো লাংমসা ম্যাম্যা কাটু এদোমকো আবেই, হালাক য়্যাগ্যই চোইপাকো তাংসা জাইপুবিহিং য়হোশু আসা ইস্রাইলকো দিংঙাবিহা জিয়োওয়া নিমি। আকু দেশহা য়হোশু আসা ইস্রাইলকো জিরিবিকো প্যাকোতা পোওপিয়ে আসা আবিহা হাত্রংদো পুংজি বানাই চোইপুকো তামসা পিচাপুয়ে। আকো নাপোকো য়্যাগ্যইকো দেশ, দিব্যাকো ওয়াংবোই, নুব্যাকো য়্যাগ্যইকো দেশ আসা ম্যাম্যা কাটুকো সেক্কোউওয়া দেশ চোইপা পরেমি নিমি। ই দেশতাহা হিত্তি, এমোরি, কনানী, পরিজ্জি, হিব্বি আসা য়ুবোসিবিহা সাবি বানাইমসা য়ুংওয়া নিমি। ইস্রাইলকো দিংঙাবিহা ই লিকো লাওয়া শহরকো জাইপুবিহিং জিয়োয়ে – য়রিহো, এহ (বেথেলকো আবেইকো), য়রুশালেম, হেব্রোন, য়র্মুত, লাকিশ, এগ্লোন, গেরেজ, দবির, গেদের, হোর্মা, আরাদ, লিব্না, অদুল্লাম, মক্কেদা, বেথেল, তপ্পুহ, হেপের, অপেক, লশ্শারোন, মাদোন, হাসোর, শিম্রোন-মোরন, অছাপ, তানাক, মগিদ্দো, কাদেশ, য়োক্নাম (কর্মোলতা), ডোর (ঝাহাদিকো আরিতা), গয়িম (গালিলতা) আসা তির্সাকো জাইপুহিং, জম্মা একতিশ জনা জাইপুবিহিং আকুহা জিয়োমি নিমগা।
Toto. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.