য়হোশু 1:9

য়হোশুহিং প্রভুসেংজাকো আজ্ঞা

1য়হোশুহিং সেংজাহা আজ্ঞা জোওয়া প্রভুসেংজাকো ডেইয়া মোসাকো সিপুওয়াকো নোইতাহা আকুহিং সহায়তা জোওয়া নুনকো চেংওয়া য়হোশুহিং সেংজাহা জাংয়ে, 2“কুং ডেইয়া মোসাহা সিপুয়ে। নাতি আসা তাংসা ইস্রাইলিবিহা নেহা তৈয়ার জিং আসা য়র্দন জোরা পেংমসা কা আবিহিং পিচাদাংওয়া দেশতা হোতু। 3কা মোসাহিং জাংমি ত্যাবাপা নাবিকো তাংবাসো হুইংদ্যাওয়া তাংসা দেশ কাহা নাতিহিং আসা কুং তাংসা দিংঙাহিং পিচামি নিও। 4নাবিকো দেশকো লুংবি ম্যাব্যা কাটুতা নিওয়া বার্পুইবিরিসোহা দ্যাম্যা কাটুতা নিওয়া লেবনানকো লাগাবি চোইপা, নুব্যা কাটুকো টেবো জোরা য়ুফ্রেটিসসোহা হিত্তিবিকো দেশ জিংপুমসা দিব্যা কাটুতা নিওয়া ভূমধ্য ঝাহাদি চোইপা দেকারোওয়া। 5য়হোশু, নাকোতা সাদি নিনু চোইপা হাংসুরে নাতিহিংয়া পোঙাপাকো মাছুরোওয়া। মোসাহিং ত্যাবাপা কা নাতিহিংপারে নিরোওয়া। কা হাত্রংদো নাতিহিংপা য়ুংরোওয়া, কা নাতিহিংয়া হাত্রংরে মাপেই। 6সাডুংপা জিং, আসা সাহস জো, হাংপাতানাহা ই দিংঙাবিহিংয়া কা আবিকো আটা-আজাবিহিং প্রতিজ্ঞা জোওয়া দেশ অধিন জোনুওয়া নাতিহা আবিকো অগুওয়াই জোরোওয়া। 7সাডুপা জিং আসা সাহস জো, আসা কুং ডেইয়া মোসাকো পিচাওয়া লিংপাংবি তাংসা পালন জোকো নির্ণয় জো। আসা আকো হাই ভাগরে মাল্যা আসা নাতি হাংতা হ্যা, আউতাহা নাতিহা সফল মুংরোওয়া। 8লিংপাংকো হিগা হাত্রংদো পড়াইকো জো। জেইসুং লিসুং পড়াইমসা আউতা লাওয়া তাংসা নুওয়াংহিং তুংসিং নাপোসো নো। আত্রং মেংচে নাকোহা উন্নতি জিংরোওয়া আসা নাবিহা সফল জিংরোওয়া। 9প্যারাপাকো জো, কাহা নাতিহিংয়া সাডুংপা জিংকো আসা সাহস জোকো আজ্ঞা পিচামি নিও। মাচ্ছুংগে আসা লোচোপেংঙেংপা মাজিংঘ্যই, হাংপাতানাহানা কা পরমপ্রভু নাকো সেংজা নাতি হাংতা হ্যাদো নাতিহিংপারাং নিও।”

য়হোশুহা লুইসুকো সোতা তৈয়ার জোওয়া

10-11আত্রংহা য়হোশুহা অগুওয়াবিকোতা হোমসা দিংঙাবিহিং এপা জাংকো আজ্ঞা জোয়ে, “হাইক্রি চাওয়া-আংওয়াবি মো, হাংপাতানাহা নেহা সাসুংয়ুতা য়র্দন জোরা পেংমসা নাবিহা পরমপ্রভু নাবিকো সেংজাকো পিচাদাংওয়া দেশহিংয়া অধিন জোনেরোওয়া।”

12রুবেন আসা গাদকো জিরিকো আসা মনশ্শেকো জিরিকো আদি দিংঙাবিহিংয়া য়হোশুহা জাংয়ে, 13“‘পরমপ্রভু নাবিকো সেংজাহা য়র্দনকো নুব্যা কাটুকো দেশ নাবিহিং পিচারোওয়া আসা আউতা নাবিহা আপনিকো সা বানাইরোওয়া’ তামসা প্রভুসেংজাকো ডেইয়া মোসাকো জাংওয়া নুওয়াং প্যারাপাকো জো। 14নাকো মে, চেংওয়া চেমেবি আসা পিকা-এতাবিহা মোশাকো পিচাওয়া য়র্দন জোরাকো নুব্যা কাটুকো দেশতারাং য়ুংরোওয়া, আদো লুইসুকো তৈয়ার নিওয়া দিংঙাবিহা আপনিকো ইস্রাইলি আপু-এবিকো সহায়তাকো সোতা হোরোওয়া। 15পরমপ্রভু নাবিকো সেংজাকো পিচাওয়া য়র্দন জোরাকো দিব্যা কাটুকো দেশ মাগিংচানু চোইপা আবিহা নাগাই নাগাই হোরোওয়া। আকুহা ইস্রাইলকো তাংসা জিরিহিং এনতাপা জোপুনতেনুকো নোইতা মেংচে নাবিহা হুরাপামসা প্রভুসেংজাকো ডেইয়া মোসাকো নাবিহিং য়র্দনকো নুব্যা কাটু পিচাওয়া আপনিকো দেশতা য়ুংকো চুরোওয়া।”

16আবিহা য়হোশুহিংয়া জাংয়ে, “নাকো জাংওয়া তাংসা নুওয়াং কাবি জোরোওয়া আসা হাংতা নিংপুদো হোরোওয়া। 17কাবিহা হাত্রংদো মোসাকো নুওয়াং হিংমি ত্যাবাপা, নাকো নুওয়াংরে হিংরোওয়া আসা পরমপ্রভু নাকো সেংজা মোসাহিংপা য়ুংমি ত্যাবাপা নাতিহিংপারে য়ুংকো! 18হাংসু নাকো অধিকারকো তোইতা শঙ্কা জো, কিতা আজ্ঞা পালন মোজো, আকুহা সিনেরোওয়া। নাতিহা ভরসা আসা সাহস জো!”