নুংনাংরি মেমে আসা ইশু
ইশুহা জেইতুন য়্যাগ্যইতা হোপুয়ে।
আসা ইশুহা আকো জুকুং হাপকুংসো দেমসাতা ওয়াংমসা গায়ে, আসা তাংসা দিংঙাবিহা আকো হুরাপা দেরেয়ে আসা দিংঙাবিহিং ঝিপায়ে। তাংজিকো উটকেওয়া আসা ফরিসিবিহা নুংনাংসুওয়াতা প্যইওয়া মেমেহিং তাংসাকো প্যাকোতা জাপায়ে। আসা আবিহা ইশুহিং জাংয়ে, “উটকেওয়া, ই মেমেহিংয়া নুংনাংসুদিংনুরাং প্যইপুয়ে। য়োংকো লিংপাংতাহা মোসাহা এপাজিংওয়া মেমেহিংয়া লুংটুই টোমসা স্যাকো জাংমি নিও। নাতিহা হাং জাংকোগা?” আবিহা আকুহিংয়া দোষ তিংপাকো সোতা মৌকা মুংমে তামসা ই নুওয়াং উইমগা। আদো ইশুহা লিতা নুউমসা আপনিকো ক্র্যইসো মোংটোতা লায়ে। আবিহা ইশুহিংয়া উইওয়া উইওয়া জোয়ে। আকো সোতা ইশুহা জামসা জাংয়ে, “হাংসু হাত্রংরে পাপ মোজোয়াং, আকুরাং হাংসুরোমা নাগাই ই মেমেহিং লুংটুই তোওকো।” আকো নোইতাহা ইশুহা ন্যাসারাং লিতা নুউমসা ক্র্যইসো মোংটোতা লায়ে।
ই নুওয়াং হিংমসা আবিহা আউসো ইচো ইচো জোমসা হোপুইয়ে। নাগাইহা ওয়ারাংপাবি হোপুয়ে। নোইস্যাতাহা ইশু মেংচে আকু মেমেহিংপা ল্যইতেহে। আকু মেমেহা ইশুকো নাগাইতা জাদিংমি নিমি। ইশুহা জামসা আকু মেমেহিং জাংয়ে, “ও মেমে, হানিসা নাতিহিং দোষি চুসুমবিহা? হাংসুরে নাতিহিংয়া দন্ড মিচাংগা?”
আকু মেমেহা জাংয়ে, “উটকেওয়া, মিচানা।”]
ইশুহা জাংয়ে, “মেনা কারে নাতিহিংয়া দন্ড মিচারো। নেহা নাতিহা হোতু, আদো ন্যাসারাং পাপ মোজো।”
বাসিমতিকো হাহাইওয়া ইশু
ন্যাসারাং ইশুহা দিংঙাবিহিং ঝিপামসা জাংয়ে, “কা বাসিমতিকো হাহাইওয়াগা। কুং নুনুই হুইওয়া হাংসুরে নাঘিওয়াতা মেতেইরোওয়া, হাংপাতানাহা আকুহা সাদি পিচাওয়া হাহাইওয়া মুংচারোওয়া।”
আত্রংহা ফরিসিবিহা ইশুহিং জাংয়ে, “নাতিহা হাত্রংদো আপনিকো তোইতা মেংচে নুওয়াং য়্যইমগা, নাকো নুওয়াংহা আজিপ্পা মোতো।”
ইশুহা জাংয়ে, “কাহা আপনিকো তোইতা জাংদো কুং জাংওয়াহা আজিপ্পা নিও, হাংপাতানাহা কা হানিসো লে আসা হাংতা হোদাংমে আকুহা কা গেমি নিও, আদো নাবিহা মেগেমগা। নাবিহা দিংঙাকো নোমি ত্যাবাপা কাহিং ন্যায় জোমগা। আদো কা হাংসুনে ন্যায় মোজোমগা। কামি ন্যায় তিংপানেনাহা, কুং তিংপাওয়া ন্যায়হা আজিপ্পা জিংরোওয়া, হাংপাতানাহা ন্যায় জোওয়াহা কা ইচোদাং মোতো। আদো কাহিংপাহা কাহিং নিংপুওয়া আপারে নিও। নাবিকো লিংপাংতারে ‘নিহসো দিংঙাকো জাংওয়া নুওয়াংমি তিতিনাহা আজিপ্পা জিংমগা’1 তামসা লামি নিও। কুং তোইতা জাংওয়া ইচোহা কারাংগা, আসা দোসরাহা কাহিং নিংপুওয়া কুং আপাগা”
আত্রংহা আবিহা উইয়ে, “নাকো আপাহা হাংতা নিংগাসা?”
ইশুহা জাংয়ে, “নাবিহা কাহিং নাইংগা না কুং আপাহিংনাং নাইংগা। নাবিবেমি কাহিং নাইনাহা কুং আপাহিংনে নাইকোগা।” ই তাংসা নুওয়াংহা ইশুহা দেমসাকো ভেটি পিচাওয়া বাক্সোবিকো আবেইতা ঝিপাদিংনু জাংমগা। আদো হাংসুরে আকুহিংয়া মোপ্যইতো, হাংপাতানাহা আকো সময়হা মাজিংয়াংমি।
ইশুহিং মানাইওয়া
আকো নোইতাহা ন্যাসারাং ইশুহা আবিহিং জাংয়ে, “কা ইসো হোপুরোওয়া। নাবিহা কাহিং মোরোওয়া, আদো নাবিহা আপনিকো পাপতা সিপুরোওয়া, হাংপাতানাহা নাবিহা কুং হোওয়া জায়গাতা ওয়াংকো মোচুরোওয়া।”
ই হিংমসা য়হুদি মাটাবিহা তাইবিলারাই জাংসুয়ে, “ইহা হাং জাংমগা? আকুহা হাংতা হোকোমে, আউতা য়াংবিহা হোকো মোচুকোহে! ইহা সেচেয়াকোতুং?”
ইশুহা আবিহিং জাংয়ে, “নাবিহা লিকোগা, কাহা তোইকোগা। নাবিহা ই বাসিমতিকোগা, আদো কাহা ই বাসিমতিকো মোকো। আকো সোতা কা নাবিহিংয়া নাবিহা আপনিকো পাপতা সিরোওয়া, তামসা জাংমগা। নাবিমি কা আকুরাংগা, তামসা দেংমক্যইনাহা নাবিহা আপনিকো পাপতা দাংপুরোওয়া।”
আবিহা ইশুহিং উইয়ে, “নাতিহা হাংসুগা?”
ইশুহা জাংয়ে, “আকুহা কা নাবিহিংয়া নাগাইসোরাং জাংপুনতেয়ো। নাবিকো তোইতাহা কুং জাংকো আসা ন্যায় জোকো নুওয়াংহা উইসে নিও, আদো কাহিং নিংপুওয়াহা আজিপ্পা নিও। আকোসো হিংওয়া নুওয়াং মেংচে কা ই বাসিমতিহিং হিংপাকো কেংমি।”
ইশুহা লোডিংবাতা য়ুংওয়া আপাকো তোইতা জাংদিংয়ো তামসা আবিহা মেগেতো। আত্রংহা ইশুহা আবিহিংয়া জাংয়ে, “নাবিহা দিংঙাকো চেংওয়াহিংয়া ক্রুসতা টামসা তোরোইপুনতেনুওয়া ‘নাবিহা কা আকুরাংগা’ তাওয়াহা সিদা চ্যইরোওয়া। কা কুং ইচ্ছাসো হাইরে মোজো, আদো কুং আপাকো ঝিপাওয়া মেংচে জোমগা তাওয়া নুওয়াং নাবিহা গেরোওয়া। কাহিং নিংপুওয়াহা কাহিংপারাং নিও, আকুহা কাহিং ইচোহিংদাং মাল্যায়াংতো, হাংপাতানাহা কাহা হাত্রংদো আকো গাগ্রুওয়া কাম মেংচে জোমগা।” ইশুকো জাংওয়া নুওয়াংবি হিংমসা উইসে দিংঙাবিহা আকো তোইতা দেংয়ে।
অব্রাহামকো চেংচুংবি
ইশুহা আকো তোইতা দেংওয়া য়হুদিবিহিং জাংয়ে, “কুং ঝিপাওয়ামি নাবি জোনাহা নাবিহা আজিপ্পারাং কুং য়োংতোংগা।
“আসা নাবিহা আজিপ্পাহিং নাইরোওয়া আসা আকু আজিপ্পাহা নাবিহিংয়া ছুটকারা পিচারোওয়া।”
আবিহা জাংয়ে, “কাবিহা অব্রাহামকো চেংবিগা, কাবিহা হাত্রংরে হাংসুকোরে ডেইয়া মাজিংয়াংতো। এপা বেনাহা কাবিহিং ছুটকারা পিচারোওয়া তাওয়াহা হাংগাসা?”
ইশুহা জাংয়ে, “কা আজিপ্পারাং, নাবিহিং জাংরোওয়া, পাপ জোমবিহা পাপকো ডেইয়াগা। ডেইয়াহা সদাইবিরি সাকো প্যাপাম্যাম্যা মাজিংমগা, আদো সাকো চেংওয়াহা হাত্রংদো সাকোরাং জিংমগা।
“এপারাং সেংজাকো চেংওয়ামি নাবিহিং পাপসো ছুটকারা পিচানাহা নাবিহা আজিপ্পারাং পাপসোহা ছুটকারা মুংচাপুরোওয়া। নাবিহা অব্রাহামকো চেংবিগা তাওয়া কা গেমি নিও। আদো নাবিহা কুং জাংওয়া নুওয়াং সহায়মক্যইমসা কাহিং স্যাকো কেংদিংয়ো। কাহা কুং আপাহিংপা নিনু তিংওয়া নুওয়াংকো তোইতা য়্যইমগা, আদো নাবিহা নাবিকো আপাকোসো হিংওয়া নুওয়াংবি য়্যইমগা।”
আবিহা জাংয়ে, “কাবিকো আপাহা অব্রাহামরাংগা!”
ইশুহা জাংয়ে, “আজিপ্পারাং অব্রাহামকো চেংবি বেনাহা নাবিহা অব্রাহামকো জোমি ত্যাবাপারাং কাম জোকোগা। আদো কা নাবিহিংয়া সেংজাসো হিংওয়া আজিপ্পা নুওয়াং হিংপাদো নাবিহা কাহিং স্যাকো কেংয়ো। এপা জিংওয়া কামহা অব্রাহামহা মোজোতো! নাবিহা আপনিকো আপাকো কাম জোমি ত্যাবাপারাং নাবিরে জোদিংয়ো।”
আবিহা জাংয়ে, “কাবিহা নুংনাংসুওয়াসো কেংওয়া মোকো। সেংজারাং কাবিকো ইচো চিংওয়া আপাগা”
ইশুহা জাংয়ে, “আজিপ্পারাং নাবিকো আপাহা সেংজাবেমি জিংনাহা নাবিহা কাহিংয়া জেজেংপা জোকোগা, হাংপাতানাহা কাহা সেংজাকোসোরাং লেমগা। কা আপনিরাং লেওয়া মোকো, সেংজারাং কাহিং নিংপুমগা। কুং জাংওয়া নুওয়াংবিহা নাবিহা হাংপা মোকোইমগা? হাংপাতানাহা নাবিহা কুং জাংওয়া য়্যইদিরাং হিংকো মেকেংমগা। নাবিহা আপনিকো আপা শয়তানকো চেংবিগা, আসা নাবিহা আপনিকো আপাকো জাংওয়া সেই জোকো কেংমগা। আকুহা নাগাইসোরাং দিংঙা স্যাওয়াগা, আকুহা হাত্রংরে আজিপ্পাতা য়ুংমক্যইমগা, হাংপাতানাহা আকোতাহা আজিপ্পা তাওয়ারাং মোতোতো। আকুহা আপনিকো মেংতাওয়া লোংস্ত্যাইওয়া ত্যাবাপা আকুহা প্যায়োং য়্যইমগা। আকো সোতা আকুহা প্যায়োংগা আসা প্যায়োং য়্যইমবিকো আপাগা আদো কা আজিপ্পা নুওয়াং য়্যইমগা। আকো সোতা নাবিহা কাহিং মাদেংমগা। নাবিকো প্যাকোতাহা হাংসু কাহিং পাপকো দোষ তিংপাকো চুকোগা? কা আজিপ্পা য়্যইনাহা নাবিহা হাংপা কাহিং মেদেংমগা? নাবিহা সেংজাকো দিংঙাবিমি বেনাহা সেংজাকো নুওয়াং হিংকোগা, আদো নাবিহা সেংজাকো দিংঙাবি মোকোমকো সোতা আকো নুওয়াংবি মাহিংমগা।”
অব্রাহামরোমা ইশু টেবো
য়হুদি মাটাবিহা ইশুহিং জাংয়ে, “কাবিকো জাংওয়াহা তিতিয়ে! নাতিহা সামরিগা আসা নাতিহিংয়া জেসাং বাইমি নিও।”
ইশুহা জাংয়ে, “কাহিংয়া জেসাং মাবাইয়াংতো। কা কুং আপাকো আদর জোমগা, আদো নাবিহা কাহিংয়া আদর মোজোমগা। কাহা আপনিরাং কুং আদর মোমোমগা, আদো কুং আদর জোকো মোওয়া আসা কাহিং ন্যায় জোওয়াহা দোসরা ইচো নিও। আজিপ্পারাং কা নাবিহিং জাংরোওয়া, কুং জাংওয়া হিংমসা জোমবিহা সিমঘ্যইরোওয়া।”
য়হুদি মাটাবিহা জাংয়ে, “আজিপ্পারাং নাতিহিংয়া জেসাং বাইমি নিয়ুং। অব্রাহামরে সিপুনতেয়ে, অগমবক্তাবিরে সিপুনতেয়ো, আদো নাতিহা ‘কুং জাংওয়া জোনাহা হাত্রংরে সিমঘ্যইরোওয়া’ তামসা জাংদিংয়ো! নাতিহা সিপুওয়া কাবিকো আটা অব্রাহাম আসা অগমবক্তাবিরোমা টেবোগা? নাতিহা আপনিরাং হাং নোমগা?”
ইশুহা জাংয়ে, “কাহা আপনিকো আদরবেমি মোনাহা আকুহা হাইরে মোকো। আদো কাহিং আদর জোওয়াহা কুং আপারাংগা, আকু আপা, হাংসুহিং নাবি ‘কাবিকো সেংজা’ তামসা জাংমমে। আদো নাবিহা আকুহিংয়া মানাইয়াংতো। কাহা আকুহিংয়া এনতাপা নাইমগা। কাহা আকুহিংয়া মানাইমি তানাহা কারে নাবি ত্যাবাপারাং প্যায়োং জিংপুকোগা। আদো কা আকুহিংয়া নাইমগা আসা আকো জাংওয়া নুওয়াংবি জোমগা। নাবিকো আটা অব্রাহামহা কুং লেওয়া দিন কাংকো গাগ্রুদিংমগা। আসা আকুহা তিংমসা সিয়োপারাং গাগ্রুপা জিংপুয়ে।”
য়হুদি মাটাবিহা আকুহিংয়া জাংয়ে, “নাতিহা লো নিহকাইসো ত্যানিংরে মেদেকায়াংতো, মেনাহা হেপা কাবিকো আটা অব্রাহামহিংয়া তিংগাসা?”
আত্রংহা ইশুহা জাংয়ে, “আজিপ্পারাং কা নাবিহিংয়া জাংরোওয়া, কা অব্রাহাম কেনুরোমা নাগাইসোরাং নিমগা।”
আত্রংরাং আবিহা ইশুহিং তোওকো লুংটুই য়োয়ে। আদো ইশুহা গুংপুমসা দেমসাসো বাইরে নোপুয়ে।
Source notes (1)
- Cross-reference ব্যবস্থা ১৯:১৫
Toto. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.